ଏଣିକି ବ୍ୟାଙ୍କ ଗ୍ରାହକମାନେ ୪ ଜଣ ନୋମିନୀ ରଖିପାରିବେ: ବ୍ୟାଙ୍କିଂ ସଂଶୋଧନ ବିଲ୍ ଲୋକସଭାରେ ପାସ୍

ନୂଆଦିଲ୍ଲୀ: ବ୍ୟାଙ୍କ ଗ୍ରାହକଙ୍କୁ ଏକ ବଡ଼ ଉପହାର ଦେବାକୁ ଯାଉଛନ୍ତି କେନ୍ଦ୍ର ସରକାର । ବର୍ତ୍ତମାନର ନିୟମ ମୁତାବକ, ଜଣେ ଖାତାଧାରୀ ନିଜର ବ୍ୟାଙ୍କ ଆକାଉଣ୍ଟ ପାଇଁ କେବଳ ଜଣେ ମାତ୍ର ନୋମିନୀ ରଖିବାର ବ୍ୟବସ୍ଥା ରହିଛି । ଏହାର ଅର୍ଥ ହେଉଛି, ଖାତାଧାରୀଙ୍କ ମୃତ୍ୟୁ ପରେ ତାଙ୍କ ଖାତାରେ ଜମା ଥିବା ଶତ ପ୍ରତିଶତ ଅର୍ଥ ଉକ୍ତ ଜଣେ ନୋମିନୀଙ୍କୁ ଦିଆଯିବ । ତେବେ କେନ୍ଦ୍ର ସରକାର ବ୍ୟାଙ୍କ ଗ୍ରାହକଙ୍କ ପାଇଁ ଏକ ନୂଆ ନିୟମ ଆଣିବାକୁ ଯାଉଛନ୍ତି । ଏହି ନିୟମ ଲାଗୁହେଲେ, ବ୍ୟାଙ୍କ ଗ୍ରାହକମାନେ ନିଜ ନିଜର ଆକାଉଣ୍ଟରେ ଜଣେ ବଦଳରେ ୪ ଜଣ ନୋମିନୀ ରଖିପାରିବେ ।

ସୂଚନା ମୁତାବକ, ବ୍ୟାଙ୍କିଂ ସଂଶୋଧନ ବିଲ୍ ଲୋକସଭାରେ ପାସ୍ ହୋଇଛି । ଏହି ବିଲ୍ ପାରିତ ହେବା ପରେ ବ୍ୟାଙ୍କ ନିଜର ରିପୋର୍ଟ ଭାରତୀୟ ରିଜର୍ଭ ବ୍ୟାଙ୍କ (ଆରବିଆଇ)କୁ ପ୍ରତି ଶୁକ୍ରବାର ବଦଳରେ ପ୍ରତି ୧୫ ଦିନରେ ପ୍ରଦାନ କରିବ । ବିଲରେ ଆଉ ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରାଯାଇଛି ବୋଲି ଅର୍ଥମନ୍ତ୍ରୀ ନିର୍ମଳା ସୀତାରମଣ କହିଛନ୍ତି । ଯଦି କୌଣସି ଖାତାରେ ୭ ବର୍ଷ ପର୍ଯ୍ୟନ୍ତ କୌଣସି ନେଣଦେଣ ହୋଇ ନଥିବ, ତେବେ ତାହାକୁ ନିବେଶକଙ୍କ ଶିକ୍ଷା ଓ ସୁରକ୍ଷା ଫଣ୍ଡକୁ ପଠାଇ ଦିଆଯିବ । ଏହି ସଂଶୋଧନ ପରେ ଖାତାଧାରୀ ନିବେଶ ଶିକ୍ଷା ଓ ସୁରକ୍ଷା ଫଣ୍ଡରୁ ରାଶି ଉଠାଣର ଦାବି କରିପାରିବେ ।

ଏହି ବିଲ୍ ଲାଗୁ ହେଲେ ଗ୍ରାହକଙ୍କ ମୃତ୍ୟୁ ପରେ ତାଙ୍କ ଆକାଉଣ୍ଟରୁ ସହଜରେ ଅର୍ଥ ଉଠାଣ କରିହେବ । ନୂଆ ବ୍ୟାଙ୍କିଂ ଆଇନ ବିଲରେ ଜମାକାରୀଙ୍କୁ ଅଧିକ ସୁରକ୍ଷା ଓ ପ୍ରାଇଭେଟ ବ୍ୟାଙ୍କରେ ଭଲ ସର୍ଭିସ ପ୍ରଦାନର ବ୍ୟବସ୍ଥା ରହିଛି । ଏଥିସହିତ ଶେୟାର, ବଣ୍ଡ, ଡିଭିଡେଣ୍ଡର ସୁଧ ବା ରିଡେମ୍ପସନ ଆୟକୁ ଶିକ୍ଷା ଓ ସଂରକ୍ଷଣ କୋଷକୁ ଟ୍ରାନ୍ସଫର କରିବାର ସୁବିଧା ମିଳିବ । ନିବେଶକଙ୍କ ହିତ ସୁରକ୍ଷିତ ରହିବ ଓ ରିଫଣ୍ଡ କ୍ଲେମ କରିବାର ସୁବିଧା ମଧ୍ୟ ମିଳିବ । ସୂଚନାଯୋଗ୍ୟ ଯେ, ବର୍ତ୍ତମାନ ରହିଥିବା ନିୟମ ଅନୁସାରେ, ବ୍ୟାଙ୍କ ଗ୍ରାହକ ନିଜ ଆକାଉଣ୍ଟ ପାଇଁ କେବଳ ଜଣେ ମାତ୍ର ନୋମିନୀଙ୍କୁ ରଖିବାର ବ୍ୟବସ୍ଥା ରହିଛି । ଏହି ନିୟମ ସଂଶୋଧନ ହେବା ପରେ ଗ୍ରାହକମାନେ ନିଜ ଆକାଉଣ୍ଟରେ ୧ ବଦଳରେ ୪ ଜଣ ନୋମିନୀଙ୍କୁ ରଖିବାର ବ୍ୟବସ୍ଥା ରହିବ ।