‘ପ୍ରତିଦିନ ୧୦ ହଜାର ଟଙ୍କାର ଜରିମାନା ଦେବାକୁ ପ୍ରସ୍ତୁତ ରୁହ’; ସରକାରଙ୍କ ଏପରି ନିର୍ଦ୍ଦେଶ ପରେ ମଦ୍ରାସାରେ ହଇଚଇ

ଓଡ଼ିଶା ଭାସ୍କର: ତ୍ତରପ୍ରଦେଶ ସରକାରଙ୍କ ପକ୍ଷରୁ ରାଜ୍ୟର ମଦ୍ରାସା ସର୍ଭେ ପରେ ପୁଣି ଥରେ ମୁଜାଫରନଗରର ମଦ୍ରାସା ଗୁଡ଼ିକ ଚର୍ଚ୍ଚାରେ ଅଛନ୍ତି। କାରଣ ମୁଜାଫରନଗରଶିକ୍ଷା ବିଭାଗ ମୁଜାଫରନଗରର ଏକ ଡଜନରୁ ଅଧିକ ମଦ୍ରାସାକୁ ନୋଟିସ୍ ଜାରି କରିଛି। ବିନା ପଞ୍ଜୀକରଣରେ ଚାଲୁଥିବା ମଦ୍ରାସାଗୁଡ଼ିକୁ ଦୈନିକ ୧୦ ହଜାର ଟଙ୍କା ଜରିମାନା ଦେବାକୁ ପଡ଼ିବ। ବିଜ୍ଞପ୍ତିରେ କୁହାଯାଇଛି ଯେ ଯଦି ମାଗଣା ଓ ବାଧ୍ୟତାମୂଳକ ଶିକ୍ଷା ଅଧିକାର ଆଇନ ୨୦୦୯ର ଚତୁର୍ଥ ଅଧ୍ୟାୟର ଧାରା ୧୮ ଅନୁଯାୟୀ ମଦ୍ରାସାକୁ ସ୍ୱୀକୃତି ଦିଆଯାଏ, ତେବେ ସମ୍ପୃକ୍ତ ରେକର୍ଡରେ ୩ ଦିନ ମଧ୍ୟରେ ମଦ୍ରାସାକୁ ମାନ୍ୟତା ପ୍ରଦାନ କରାଯିବ। ଯଦି ମଦ୍ରାସାକୁ ସ୍ୱୀକୃତି ଦିଆନଯାଏ ତେବେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ମଦ୍ରାସା ଖୋଲା ଥିବା ଜଣାପଡ଼ିଲେ ଦୈନିକ ୧୦ ହଜାର ଟଙ୍କା ଜରିମାନା ଆଦାୟ କରାଯିବ। ମୌଳିକ ଶିକ୍ଷା ବିଭାଗ ପକ୍ଷରୁ ନୋଟିସ୍ ମିଳିବା ପରେ ସମସ୍ତ ମଦ୍ରାସା ଅପରେଟରଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି। ଜମିୟତ ଉଲେମା-ଏ-ହିନ୍ଦ ପକ୍ଷରୁ ସମସ୍ତ ମଦ୍ରାସା ଅପରେଟରଙ୍କ ସହ ଏକ ବୈଠକ ମଧ୍ୟ ଅନୁଷ୍ଠିତ ହୋଇଥିଲା।

ବାସ୍ତବରେ ମଦ୍ରାସା ମ୍ୟାନେଜରଙ୍କୁ ନୋଟିସ୍ ପଠାଯାଇଥିବା ସୂଚନା ମିଳିଛି। କେବଳ ମୁଜାଫରନଗର ଜିଲ୍ଲାରେ ବିନା କାଗଜପତ୍ରରେ ୧୦୦ରୁ ଅଧିକ ମଦ୍ରାସା ଚାଲିଛି ବୋଲି ଜିଲ୍ଲା ପ୍ରଶାସନ କହିଛି। ସେଥିମଧ୍ୟରୁ ୧୨ଟି ମଦ୍ରାସାକୁ ନୋଟିସ ପଠାଯାଇଥିଲା ଯେ ଯଦି ସେମାନେ ତୁରନ୍ତ ବନ୍ଦ ନ କରନ୍ତି ତେବେ ଦୈନିକ ୧୦ ହଜାର ଟଙ୍କା ଜରିମାନା ଆଦାୟ କରାଯିବ। ରାଜ୍ୟରେ ପ୍ରାୟ ୨୪ ହଜାର ମଦ୍ରାସା ଥିବା ବେଳେ ସେଥିମଧ୍ୟରୁ ୧୬ ହଜାର ସ୍ୱୀକୃତିପ୍ରାପ୍ତ ଓ ୮ ହଜାର ଅଣସ୍ୱୀକୃତିପ୍ରାପ୍ତ।

ଅନ୍ୟପକ୍ଷରେ ଜମିୟତ ଉଲେମା-ଏ-ହିନ୍ଦ ର ରାଜ୍ୟ ସମ୍ପାଦକ ଜାକିର ହୁସେନ କହିଛନ୍ତି ଯେ ମୁଜାଫରନଗରରେ ଚାଲୁଥିବା ଧାର୍ମିକ ମଦ୍ରାସାଗୁଡ଼ିକରେ ମାଗଣା ଶିକ୍ଷା ପ୍ରଦାନ କରାଯାଉଛି। ଏହି ମଦ୍ରାସାଗୁଡ଼ିକରେ କ୍ଲାସ୍ ମଧ୍ୟ ଆୟୋଜନ କରାଯାଏ ନାହିଁ। ସ୍ୱାଧୀନତା ପୂର୍ବରୁ ମଧ୍ୟ ଏହି ମଦ୍ରାସା ଚାଲିଛି। ଯାହା ସମ୍ବିଧାନ ଦ୍ୱାରା ଦିଆଯାଇଥିବା ଧାର୍ମିକ ସ୍ୱାଧୀନତାର ମୌଳିକ ଅଧିକାର ଅଧୀନରେ ପରିଚାଳିତ ହେଉଛି । ତେଣୁ ଏହି ମଦ୍ରାସାଗୁଡ଼ିକ ବିଦ୍ୟାଳୟ ଶ୍ରେଣୀରେ ଆସୁନାହିଁ, କିନ୍ତୁ ଉକ୍ତ ମଦ୍ରାସାଗୁଡ଼ିକୁ ସ୍ୱୀକୃତି ଦିଆଯାଉ ନାହିଁ ବୋଲି କିଛି ଦିନ ହେଲା ଶିକ୍ଷା ବିଭାଗ ପକ୍ଷରୁ ଲଗାତାର ନୋଟିସ୍ ଦିଆଯାଉଛି।

ଉକ୍ତ ମଦ୍ରାସାଗୁଡ଼ିକୁ ତୁରନ୍ତ ବନ୍ଦ କରାଯାଉ ନଚେତ୍ ଦୈନିକ ୧୦ ହଜାର ଟଙ୍କା ଜରିମାନା ଆଦାୟ କରାଯିବ ବୋଲି ନିର୍ଦ୍ଦେଶନାମାରେ କୁହାଯାଇଛି। ମାଗଣା ଓ ବାଧ୍ୟତାମୂଳକ ଶିକ୍ଷା ଆଇନ, ୨୦୦୯ର ଧାରା ୧୮ ଅନୁଯାୟୀ ଶିକ୍ଷା ବିଭାଗ ପକ୍ଷରୁ ଏହି ନୋଟିସ୍ ପଠାଯାଉଥିବା ବେଳେ ସଂଶୋଧିତ ମାଗଣା ଓ ବାଧ୍ୟତାମୂଳକ ଶିକ୍ଷା ଅଧିକାର ଆଇନ, ୨୦୦୯ର ଧାରା ୨(୫)ରେ ସ୍ପଷ୍ଟ ଭାବେ ଉଲ୍ଲେଖ ରହିଛି ଯେ ମୁସଲମାନ ମଦ୍ରାସା, ବିଦ୍ୟାଳୟ କିମ୍ବା ଧାର୍ମିକ ଅନୁଷ୍ଠାନରେ ଏହି ନିୟମ ଲାଗୁ ହେବ ନାହିଁ।