AK-47ରୁ ଦୁହେଁ ଦୁହିଁଙ୍କୁ ଗୁଳି କଲେ! ପୋଲିସ ଗାଡିରୁ 2 ମୃତଦେହ ଠାବ

ନୂଆଦିଲ୍ଲୀ: ଜମ୍ମୁକଶ୍ମୀରରୁ ଏକ ଅଭାବନୀୟ ଘଟଣା ସାମ୍ନାକୁ ଆସିଛି । ସାମାନ୍ୟ ବଚସାରୁ 2ଜଣ ପରସ୍ପରକୁ ଗୁଳି ମାରିଛନ୍ତି । ପୋଲିସ ଭ୍ୟାନରୁ 2 ପୋଲିସଙ୍କ ମୃତଦେହ ଉଦ୍ଧାର କରାଯାଇଛି । କାଶ୍ମୀରର ଉଧମପୁର ଜିଲ୍ଲାରୁ ସାମ୍ନାକୁ ଆସିଛି ଏଭଳି ଘଟଣା । ମୃତ ପୋଲିସ କର୍ମୀଙ୍କ ଦେହରେ ଗୁଳିମାଡର ଚିହ୍ନ ହୋଇଛି । ତେବେ ପୋଲିସ ଅଧିକାରୀଙ୍କ ପକ୍ଷରୁ ଏହି ସୂଚନା ଦିଆଯାଇଛି । ତେବେ ପ୍ରକୃତର କାରଣ ସ୍ପଷ୍ଟ ହୋଇନଥିବା ବେଳେ ଉଭୟେ ଉଭୟଙ୍କୁ ଗୁଳି କରିଥିବା ଜଣାପଡିଛି ।

ଜଣେ ପୋଲିସ ଅଧିକାରୀ କହିଛନ୍ତି ଯେ, ଆଜି ସକାଳ ପ୍ରାୟ 8ଟା 30 ମିନିଟ ସମୟରେ  ଜିଲ୍ଲା ମୁଖ୍ୟାଳୟରେ ଅବସ୍ଥିତ କାଳୀ ମାତା ମନ୍ଦିର ବାହାରେ ଏକ ପୋଲିସ ଭ୍ୟାନ ରହିଥିଲା । ସେଥିରୁ 2 ଜଣଙ୍କ ମୃତଦେହ ଠାବ କରାଯାଇଥିବା ବେଳେ ଅନ୍ୟ ଜଣେ ପୋଲିସ କର୍ମୀ ଆହତ ହୋଇଛନ୍ତି । ତାଙ୍କୁ ଶୀଘ୍ର ଉଦ୍ଧାର କରାଯାଇ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି  । ଅନ୍ୟପଟେ 2ଜଣ ପୋଲିସ ଅଧିକାରୀଙ୍କ ମୃତଦେହ ଉଦ୍ଧାର କରାଯାଇ ବ୍ୟବଚ୍ଛେଦ ପାଇଁ ପଠାଯାଇଛି ।  ଏହି ଘଟଣା ନେଇ ଏସଏସପି କହିଛନ୍ତି, ଏହି ଘଟଣା ସକାଳ 6.30ରେ ହୋଇଛି । ସୋପରରୁ କଲବାରା ସ୍ଥିତ ପ୍ରଶିକ୍ଷଣ କେନ୍ଦ୍ର ଯାଉଥିଲେ । ପୋଲିସ ଅଧିକାରୀ ଘଟଣାସ୍ଥଳରେ ପହଞ୍ଚି ଯାଞ୍ଚ ଆରମ୍ଭ କରିଛନ୍ତି । ପ୍ରାରମ୍ଭିକ ତଦନ୍ତରୁ ଜଣାପଡିଛି ଯେ, ଘଟଣାସ୍ଥଳରୁ ଏକେ-47 ରାଇଫଲ ଜବତ କରାଯାଇଛି । ଏଥିରୁ ଗୁଳିମାଡ କରି 2ଜଣଙ୍କ ମୃତ୍ୟୁ ହୋଇଛି । ତଦନ୍ତ ଶେଷ ହେବା ପରେ ପ୍ରକୃତ କାରଣ ସ୍ପଷ୍ଟ ହେବ ବୋଲି କୁହାଯାଇଛି ।