Breaking- କଟକର ଏକ ଇଲେକ୍ଟ୍ରିକ ଦୋକାନରେ ନିଆଁ, କାରଣ ଅସ୍ପଷ୍ଟ

କଟକ- ଇଲେକ୍ଟ୍ରିକାଲ ଦୋକାନରେ ଲାଗିଲା ନିଆଁ । କଟକର ଏକ ଇଲେକ୍ଟ୍ରିକାଲ ଦୋକାନରେ ଅଗ୍ନିକାଣ୍ଡ ଘଟି ଲକ୍ଷ ଲକ୍ଷ ଟଙ୍କାର ଜିନିଷ ନଷ୍ଟ ହୋଇଛି । ଖବର ପାଇ ପୋଲିସ ଓ ଅଗ୍ନିଶମ ବାହିନୀ ନିଆଁକୁ ଆୟତ କରିଛନ୍ତି । ଏହି ଅଘଟଣ ମଣିସାହୁ ଛକରେ ଘଟଇଛି । ତେବେ କେମିତି ନିଆଁ ଲାଗିଛି ତାହା ଜଣାପଡିନାହିଁ ।

କଟକ ମଣିସାହୁ ଛକରେ ଅନେକଗୁଡିଏ ଇଲେକ୍ଟ୍ରିକାଲ ଦୋକାନ ରହିଛି । ସେଥିରୁ ଗୋଟିଏ ସରଞ୍ଜାମ ମରାମତି ଦୋକାନରେ ନିଆଁ ଲାଗିଥିଲା । ପାଖରେ ଅଗ୍ନିଶମ କାର୍ଯ୍ୟାଳୟ ଥିବାରୁ ଖୁବ ଶୀଘ୍ର ଅଗ୍ନିଶମ ବାହିନୀ ଆସୁ ନିଆଁକୁ ଆୟତ୍ତ କରିନେଇଥିଲେ । ଫଳରେ ଏକ ବଡ ଅଘଟଣକୁ ଏଡାଯାଇପାରିଲା । ନିଆଁ ଅନ୍ୟ ଦୋକାନକୁ ବ୍ୟାପୀ ନ ଥିଲା । ହେଲେ ଦୋକାନରେ ଥିବା ଅନେକ ଇଲେକ୍ଟ୍ରିକ ସରଞ୍ଜାମ ଏଥିରେ ପୋଡି ଯାଇଛି ।

ଅଗ୍ନିକାଣ୍ଡର କାରଣ ଜଣାପଡି ନ ଥିବା ବେଳେ କୁହାଯାଉଛି କି କମ୍ପ୍ରେସର ଫାଟିବାରୁ ଏହି ନିଆଁ ଲାଗିଥିଲା । ପୋଲିସ ଘଟଣାର ତଦନ୍ତ ଆରମ୍ଭ କରିଛି । ତଦନ୍ତ ପରେ ଅଗ୍ନିକାଣ୍ଡର ପ୍ରକୃତ କାରଣ ଜଣାପଡିବ ବୋଲି କୁହାଯାଉଛି ।

ସେପଟେ କେନ୍ଦ୍ରାପଡାରେ ଗତ ରାତିରେ ଏକ ଲୁଗା ଦୋକାନରେ ଅଗ୍ନିକାଣ୍ଡ ଘଟି ପୁରା ଦୋକାନ ଜଳି ଯାଇଛି । ଦୋକାନୀ ପ୍ରଥମାଷ୍ଟମୀ ପାଇଁ ଧାର କରି ଦୋକାନ ଭରିଥିଲେ ବୋଲି କହିଛନ୍ତି ।