କରୋନାର କରୁଣ ପ୍ରଭାବ: ୧ ବର୍ଷ ମଧ୍ୟରେ ଆତ୍ମହତ୍ୟା କରିଛନ୍ତି ୧୧,୭୧୬ ଜଣ ବ୍ୟବସାୟୀ
ନୂଆଦିଲ୍ଲୀ: କରୋନା ଭାଇରସ୍ ସ୍ୱାସ୍ଥ୍ୟ ସହିତ ଅର୍ଥବ୍ୟବସ୍ଥା ଉପରେ ମଧ୍ୟ ଗଭୀର ପ୍ରଭାବ ପକାଇଛି । ଏହି କାରଣରୁ ୨୦୧୯ ବର୍ଷ ତୁଳନାରେ ୨୦୨୦ ରେ ଅଧିକ ଲୋକ ଆତ୍ମହତ୍ୟା କରିଛନ୍ତି । ଏହାକୁ ନେଇ ଏକ ରିପୋର୍ଟ ପ୍ରକାଶ ପାଇଛି । ଯେଉଁଥିରୁ ଆତ୍ମହତ୍ୟା ସଂଖ୍ୟାର ଖୁଲାସା ହୋଇଛି । କେନ୍ଦ୍ର ସରକାର ମଙ୍ଗଳବାର ଦିନ ସଂସଦରେ କହିଛନ୍ତି ଯେ, ୨୦୨୦ ରେ ୧୧ହଜାର ୭୧୬ ଜଣ ବ୍ୟବସାୟୀ ଆତ୍ମହତ୍ୟା କରିଛନ୍ତି । ଏହି ଆକଳନ ୨୦୧୯ ତୁଳନାରେ ୨୯ ପ୍ରତିଶତ ଅଧିକ ।
ଏହି ରିପୋର୍ଟ ସଫା ସଫା ଦର୍ଶାଉଛି ଯେ, କରୋନା କାଳରେ ଆର୍ଥିକ ସଙ୍କଟ ଓ ବ୍ୟବସାୟରେ କ୍ଷତି ସହି ଅନେକ ଲୋକ ଆତ୍ମହତ୍ୟା କରିଛନ୍ତି । ଅନ୍ୟପଟେ କୃଷି କ୍ଷେତ୍ରରେ ମଧ୍ୟ ଅନେକ କ୍ଷିତ ହୋଇଛି । ଗୃହମନ୍ତ୍ରାଳୟର ଏନସିଆରବି ରିପୋର୍ଟରେ ଭାରତରେ ଦୁର୍ଘଟଣା ଓ ଆତ୍ମହତ୍ୟା ସମ୍ପର୍କିତ ରିପୋର୍ଟରେ କୁହାଯାଇଛି ଯେ, ୨୦୧୯ ଆର୍ଥିକ ବର୍ଷରେ ୯ହଜାର ୫୨ ଜଣ ଆତ୍ମହତ୍ୟା କରିଥିବା ବେଳେ ୨୦୨୦ ରେ ଏହି ସଂଖ୍ୟା ବୃଦ୍ଧି ପାଇଛି । ଗତ ବର୍ଷ ୧୧ହଜାର ୭୧୬ ଜଣ ବ୍ୟବସାୟୀ ଆତ୍ମହତ୍ୟା କରିଛନ୍ତି ।
ବ୍ୟବସାୟୀଙ୍କ ଆତ୍ମହତ୍ୟା ହାର ୨୦୨୦ରେ ୨୯.୪% ବୃଦ୍ଧି ପାଇଥିବାବେଳେ କୃଷି କ୍ଷେତ୍ର ସହ ଜଡିତ ଲୋକଙ୍କ ଆତ୍ମହତ୍ୟା ହାର ୩.୯% ବୃଦ୍ଧି ପାଇଛି। ତଥାପି, ବିଶେଷଜ୍ଞମାନେ ଏହି ତଥ୍ୟକୁ ସଠିକ୍ ବୋଲି ବିବେଚନା କରିନାହାନ୍ତି । କାରଣ କୃଷି କ୍ଷେତ୍ର ସହିତ ଜଡିତ ମହିଳାଙ୍କ ଆତ୍ମହତ୍ୟାକୁ ଗୃହିଣୀ ଭାବରେ ଦେଖାଯାଏ । ଏନସିଆରବି ତଥ୍ୟ ଅନୁଯାୟୀ, ୨୦୨୦ ରେ ବ୍ୟବସାୟିକ ଆତ୍ମହତ୍ୟା ମଧ୍ୟରୁ ୪,୨୨୬ ଭେଣ୍ଡର୍, ୪,୩୫୬ ବ୍ୟବସାୟୀ ଏବଂ ଅନ୍ୟ ବ୍ୟବସାୟିକ କାର୍ୟ୍ୟରେ ନିୟୋଜିତ ୩,୧୩୪ ଜଣ ଆତ୍ମହତ୍ୟା କରିଛନ୍ତି।
