ବଢ଼ିଲା କୁଲିଙ୍କ ମଜୁରୀ: ଆଉ ପୁରୁଣା ମଜୁରୀରେ କାମ କରିବେନି କୁଲି, ମହଙ୍ଗା ହେବ ରେଳଯାତ୍ରା
ନୂଆଦିଲ୍ଲୀ: କୁଲିମାନଙ୍କ ପାଇଁ ଖୁସି ଖବର। କାରଣ ପୋର୍ଟର ସୁବିଧା ବଢ଼ାଇବା ପରେ ବେତନ ବୃଦ୍ଧି କରିବାକୁ ରେଲୱେ ବୋର୍ଡ ନିର୍ଦ୍ଦେଶ ଦେଇଛନ୍ତି। ଫଳରେ କୁଲିମାନଙ୍କୁ ଆଉ ପୁରୁଣା ମଜୁରୀରେ କାମ କରିବାକୁ ପଡିବ ନାହିଁ । ତେବେ ବହୁ ବର୍ଷ ପରେ ରେଲୱେ ବୋର୍ଡ ପକ୍ଷରୁ ଏହି ପଦକ୍ଷେପ ଗ୍ରହଣ କରାଯାଇଛି । କୁଲିଙ୍କର ଆର୍ଥିକ ସ୍ଥିତିରେ ସୁଧାର ପାଇଁ ଏଭଳି ନିଷ୍ପତ୍ତି ରେଲୱେ ବୋର୍ଡ ପକ୍ଷରୁ ନିଆଯାଇଛି । ମୁଦ୍ରାସ୍ଫୀତି ବୃଦ୍ଧିକୁ ଦୃଷ୍ଟିରେ ରଖି ସାମଗ୍ରୀ ପରିବହନ ପାଇଁ ପୋର୍ଟର ହାର ବୃଦ୍ଧି କରିବାକୁ ଏକ ପୁରୁଣା ଚାହିଦା ରହିଥିଲା । ଏହା ବ୍ୟତୀତ ରେଳ କର୍ମଚାରୀଙ୍କ ପରି ସେମାନଙ୍କୁ ଅନେକ ପ୍ରକାରର ସୁବିଧା ଯୋଗାଇ ଦିଆଯାଉଛି ।
ତେବେ ଏନେଇ ରେଳ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ ଲଗେଜ୍ ପରିବହନ କରୁଥିବା ପରିବହନକାରୀଙ୍କ ଦର ପ୍ରାୟ ପାଞ୍ଚ ବର୍ଷ ପରେ ବୃଦ୍ଧି କରାଯାଇଛି । ରେଳ ବୋର୍ଡର ନିର୍ଦ୍ଦେଶ ପରେ ଏହା ରାୟପୁର ବିଭାଗରେ କାର୍ୟ୍ୟକାରୀ ହୋଇଛି । ବୋର୍ଡ କହିଛି ଯେ ଏହା ଦେଶର ୬୮ ଟି ବିଭାଗରେ କାର୍ୟ୍ୟକାରୀ ହେବ । ଅଧିକାରୀ କହିଛନ୍ତି ଯେ ପୋର୍ଟାଲ ହାରର ସମୀକ୍ଷା ଏବଂ ଯୁକ୍ତିଯୁକ୍ତ କରିବାର ଜୋନାଲ ରେଳବାଇର ଜେନେରାଲ ମ୍ୟାନେଜରଙ୍କର ଅଧିକାର ରହିବ ।
ସୂଚନା ଯୋଗ୍ୟ, ନୂଆ ନିୟମ ଅନୁସାରେ କୁଲିଙ୍କୁ ଏବେ ୪୦ କିଲୋଗ୍ରାମ୍ରୁ ଅଧିକ ଓଜନର ସାମଗ୍ରୀ ପରିବହନ ପାଇଁ ୩୪୦ ଟଙ୍କା ମଜୁରୀ ଦେବାକୁ ପଡ଼ିବ । ପୂର୍ବରୁ ଏହା ୨୫୦ ଟଙ୍କା ଥିଲା । ସେହିପରି ଷ୍ଟ୍ରେଚରରେ ରୋଗଗ୍ରସ୍ତ ବ୍ୟକ୍ତିଙ୍କୁ ନେବା ପାଇଁ ମଜୁରୀ ୨୭୦ ଟଙ୍କା ଧାର୍ୟ୍ୟ କରାଯାଇଛି । ପୂର୍ବରୁ ଏହା ୨୦୦ ଟଙ୍କା ଥିଲା ।
ସେହିପରି ହ୍ୱିଲ୍ ଚେୟାରରେ ବୟସ୍କ ବ୍ୟକ୍ତି ବିଶେଷଙ୍କ ନେବା ପାଇଁ ମଜୁରୀ ଏଣିକି ୧୮୦ ଟଙ୍କା ଦେବାକୁ ପଡ଼ିବ । ପୂର୍ବରୁ ଏହା ୧୩୦ ଟଙ୍କା ଥିଲା । ନୂଆ ମଜୁରୀ ଦର ଦେଶର ସମସ୍ତ ରେଲୱେ ଷ୍ଟେସନରେ ଲାଗୁ ହେବ । ‘ଏ-୧’ ଏବଂ ‘ଏ’ ବର୍ଗର ରେଲୱେ ଷ୍ଟେସନରେ ଏହି ନୂଆ ମଜୁରୀ ଲାଗୁ ହେଉଥିବା ବେଳେ ଛୋଟ ଷ୍ଟେସନରେ ମଜୁରୀ କମ୍ ରହିବ । ତେବେ ଏସବୁକୁ ନେଇ ବର୍ତ୍ତମାନ ରେଳଯାତ୍ରା ମହଙ୍ଗା ହେବ ବୋଲି କୁହାଯାଉଛି।