ଦିଲ୍ଲୀବାସୀଙ୍କ ପାଇଁ ଏବେ ନୂଆ ଟେନସନ୍! ଘରୁ ବାହାରୁଛନ୍ତି ନାଗ ସାପ, ସରକାର ନେଲେ ଏହି ପଦକ୍ଷେପ
ନୂଆଦିଲ୍ଲୀ: ଦିଲ୍ଲୀରେ ବନ୍ୟା ଜଳର ଅବନତି ସମୟରେ ସାପ ଦେଖିବାର ଘଟଣା ବୃଦ୍ଧି ପାଇବା ପରେ ସରକାର ମଙ୍ଗଳବାର ଏହି ପରିସ୍ଥିତିର ମୁକାବିଲା ପାଇଁ ଶୀଘ୍ର ପ୍ରତିକ୍ରିୟା ଦଳ ଗଠନ କରିବାକୁ ନିଷ୍ପତ୍ତି ନେଇଛନ୍ତି। ଜଣେ ଅଧିକାରୀଙ୍କ କହିବାନୁସାରେ, ପ୍ରଥମ ଥର ପାଇଁ ଏଭଳି ଦଳ ଗଠନ ପାଇଁ ନିଷ୍ପତ୍ତି ନିଆଯାଇଛି। ଏହି ପଦକ୍ଷେପ ସାମ୍ପ୍ରତିକ ବନ୍ୟା ପରିସ୍ଥିତିର ଗମ୍ଭୀରତାକୁ ପ୍ରତିଫଳିତ କରିଛି । ଏହି ସମୟରେ ଦିଲ୍ଲୀର ଯମୁନା ଜଳ ସ୍ତର ଚାରି ଦଶନ୍ଧିର ରେକର୍ଡ ଭାଙ୍ଗିଥିଲା।
ପରିବେଶ ମନ୍ତ୍ରୀ ଗୋପାଳ ରାୟ କହିଛନ୍ତି ଯେ, ଦ୍ରୁତ ପ୍ରତିକ୍ରିୟା ଦଳ ଦିଲ୍ଲୀର ବନ୍ୟା ପ୍ରଭାବିତ ଅଞ୍ଚଳରେ କାର୍ଯ୍ୟ କରିବେ ଏବଂ ସାପ ସହ ଜଡିତ ସମସ୍ୟାର ସମାଧାନ କରିବେ। ସାପ ଦେଖିବା ଘଟଣା ବିଷୟରେ ସୂଚନା ଦେବା ଏବଂ ତୁରନ୍ତ ସହାୟତା ଯୋଗାଇବା ପାଇଁ ବନ ବିଭାଗ ଏକ ହେଲ୍ପଲାଇନ ନମ୍ବର ଆରମ୍ଭ କରିଛି।
ଏକ ବିବୃତ୍ତିରେ କୁହାଯାଇଛି ଯେ, ଗତ କିଛି ଦିନ ହେବ ଘରୁ ସାପ ବାହାରିବା ନେଇ ଅନେକ ଖବର ଆସିଛି ଯାହା ଦିଲ୍ଲୀ ବାସିନ୍ଦାଙ୍କ ପାଇଁ ବିପଦ ସୃଷ୍ଟି କରିଛି। ବନ୍ୟା ସହାୟତା ଶିବିର ନିକଟରେ ସାପ ମିଳିବା ନେଇ ଚିନ୍ତା ବଢିଛି। ଜଣେ ଅଧିକାରୀ କହିଛନ୍ତି ଯେ, ପୁରୁଣା ରେଳ ସେତୁ ଆଖପାଖ ଅଞ୍ଚଳରୁ ଆସୋଲା ଭଟ୍ଟୀ ବନ୍ୟପ୍ରାଣୀ ଅଭୟାରଣ୍ୟରେ ୨୫ ରୁ ଅଧିକ ସାପ ଧରାଯାଇ ମୁକ୍ତ କରାଯାଇଛି।
ଦିଲ୍ଲୀର ମୁଖ୍ୟ ବନ୍ୟପ୍ରାଣୀ ୱାର୍ଡେନ ସୁନୀଶ ବକ୍ସି କହିଛନ୍ତି ଯେ, ଯେତେବେଳେ ବନ୍ୟା କିମ୍ବା ବର୍ଷା ଜଳ ସାପ ଏବଂ ଅନ୍ୟ ସରୀସୃପମାନଙ୍କର ପ୍ରାକୃତିକ ବାସସ୍ଥାନରେ ପ୍ରବେଶ କରେ, ସେତେବେଳେ ସେମାନେ ଶୁଷ୍କ ସ୍ଥାନ ଖୋଜନ୍ତି। ଦିଲ୍ଲୀ ବନ୍ୟା ସମୟରେ ମିଳିଥିବା ଅଧିକାଂଶ ସାପ ବିଷାକ୍ତ ନୁହେଁ। ସେ କହିଛନ୍ତି ଯେ, କିଛି କୋବ୍ରା ଏବଂ କ୍ରାଇଟ୍ ସାପ ମଧ୍ୟ ମିଳିଛି।
