ଦୀର୍ଘ ସମୟ ପର୍ଯ୍ୟନ୍ତ ଯୌବନାବସ୍ଥାରେ ରହିବା ପାଇଁ ପ୍ରଚୁର ପାଣି ପିଅନ୍ତୁ; ସୁସ୍ଥ ରହିବ ହୃଦୟ ଓ ମସ୍ତିଷ୍କ
ଆଜିର ସମୟରେ ସମସ୍ତେ ଦୀର୍ଘ ସମୟ ପର୍ଯ୍ୟନ୍ତ ଯୌବନ ରହିବାକୁ ଚାହାଁନ୍ତି । ଏଥିପାଇଁ କିଛି ଲୋକ ଜିମ୍ ଯାଇ କଷ୍ଟ କରିଥାନ୍ତି ତ କିଛି ଲୋକ ଖାଦ୍ୟ ଖାଇବା ବନ୍ଦ କରିଥାନ୍ତି । ଏହି ସମସ୍ତ କାର୍ଯ୍ୟକଳାପ ଆମ ଶରୀର ଉପରେ ବହୁତ ପ୍ରଭାବ ପକାଇଥାଏ । ତେବେ ଆପଣ ଘରେ ବସି କଠିନ ପରିଶ୍ରମ ନକରି ଦୀର୍ଘ ସମୟ ପର୍ଯ୍ୟନ୍ତ ଯୌବନବସ୍ଥାରେ ଏବଂ ସୁସ୍ଥ ରହିପାରିବେ । ଆପଣ ଏହାକୁ ହୁଏତ ବିଶ୍ୱାସ କରୁନଥିବେ । ବିଶ୍ୱାସ କରୁନଥିଲେ ମଧ୍ୟ ଏହା ସମ୍ପୂର୍ଣ୍ଣ ସତ୍ୟ । ସଠିକ୍ ହାଇଡ୍ରେସନ୍ ସହିତ, ଆପଣ ଦୀର୍ଘ ସମୟ ପର୍ଯ୍ୟନ୍ତ ଯୌବନାବସ୍ଥାରେ ରହିପାରିବେ । ନିକଟରେ ହୋଇଥିବା ଏକ ଅଧ୍ୟୟନରେ ଏହା ପ୍ରକାଶ ପାଇଛି । ଏଥିରେ ଅନେକ ଆଶ୍ଚର୍ଯ୍ୟଜନକ ତଥ୍ୟ ସାମ୍ନାକୁ ଆସିଛି ।
ମିଳିଥିବା ସୂଚନା ଅନୁଯାୟୀ, ନିକଟରେ ହୋଇଥିବା ଏକ ଅଧ୍ୟୟନରୁ ଜଣାପଡିଛି ଯେ ଯେଉଁମାନେ ନିଜକୁ ଭଲ ଭାବେ ହାଇଡ୍ରେଟ୍ ରଖନ୍ତି ସେମାନେ ଅନ୍ୟ ଲୋକଙ୍କ ତୁଳନାରେ ଦୀର୍ଘ ସମୟ ପର୍ଯ୍ୟନ୍ତ ସୁସ୍ଥ ଏବଂ ନୀରୋଗ ରହିପାରିବେ । ଭଲ ହାଇଡ୍ରେସନ୍ ବାର୍ଦ୍ଧକ୍ୟ ପ୍ରକ୍ରିୟାକୁ ଧୀର କରିପାରେ ଏବଂ ଲୋକଙ୍କୁ ଅଧିକ ସମୟ ଯୌବନ ଦେଖାଯିବାରେ ସାହାଯ୍ୟ କରିଥାଏ । ଏହାଦ୍ୱାରା ହୃଦୟ ଏବଂ ଫୁସଫୁସ ରୋଗ ହେବାର ଆଶଙ୍କା ମଧ୍ୟ କମିଯାଏ ଏବଂ ଲୋକମାନେ ଅଳ୍ପ ବୟସରେ ମୃତ୍ୟୁ ହୁଏନାହିଁ । ଏହି ରିସର୍ଚ୍ଚ ଏବିଓମେଡିସିନ୍ ରେ ପ୍ରକାଶିତ ହୋଇଛି । ପ୍ରାୟ ୩୦ ବର୍ଷ ପାଇଁ ୧୧,୨୫୫ ବୟସ୍କଙ୍କ ଉପରେ ତଥ୍ୟ ସଂଗ୍ରହ କରିବା ପରେ, ଅନୁସନ୍ଧାନକାରୀମାନେ ସେରମ୍ ସୋଡିୟମ୍ ସ୍ତର ଏବଂ ଅନ୍ୟାନ୍ୟ ସ୍ୱାସ୍ଥ୍ୟ ସୂଚକ ଉପରେ ଆଧାର କରି ଅଧ୍ୟୟନ ଫଳ ପ୍ରସ୍ତୁତ କରିଛନ୍ତି ।
ଆମେରିକାର ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ହେଲ୍ଥର ବିଶେଷଜ୍ଞମାନେ ଏହି ଅଧ୍ୟୟନ କରିଛନ୍ତି । କାର୍ଡିଓଭାସ୍କୁଲାର ରିଜେନେରେଟିଭ୍ ମେଡିସିନ୍ ଲାବୋରେଟୋରୀର ଗବେଷକ ଡାକ୍ତର ନତାଲିଆ ଡିମିଟ୍ରିଭାଙ୍କ ଅନୁଯାୟୀ, ଅଧ୍ୟୟନର ରିପୋର୍ଟରେ ଦର୍ଶାଯାଇଛି ଯେ ଉପଯୁକ୍ତ ହାଇଡ୍ରେସନ୍ ଆପଣଙ୍କୁ ଦୀର୍ଘ ସମୟ ଧରି ରୋଗରୁ ରକ୍ଷା କରିପାରିବ । ପ୍ରଚୁର ପାଣି ପିଇବା ଏବଂ ତରଳ ପଦାର୍ଥ ଗ୍ରହଣ କରିବା ଦ୍ୱାରା ହୃଦୟ ଏବଂ ଫୁସଫୁସ, ମଧୁମେହ ଏବଂ ଡିମେନ୍ସିଆର କ୍ରନିକ ରୋଗ ହେବାର ଆଶଙ୍କା କମିଯାଏ । ହାଇଡ୍ରେସନ୍ ସୁସ୍ଥ ଅବସ୍ଥାକୁ ପ୍ରୋତ୍ସାହିତ କରେ ଏବଂ ଆପଣଙ୍କୁ ଅଧିକ ଦିନ ବଞ୍ଚିବାକୁ ସାହାଯ୍ୟ କରେ । ଯଦି ଆପଣ ପ୍ରଚୁର ଜଳ ପିଅନ୍ତି ଏବଂ ଆପଣଙ୍କ ଖାଦ୍ୟରେ ତରଳ ଜିନିଷ ସାମିଲ କରନ୍ତି, ତେବେ ଆପଣ ଦୀର୍ଘ ସମୟ ପର୍ଯ୍ୟନ୍ତ ସୁସ୍ଥ ରହିପାରିବେ ।
ଏହି ଅଧ୍ୟୟନର ଅନୁସନ୍ଧାନକାରୀମାନେ କହିଛନ୍ତି ଯେ ବିଶ୍ୱର ପ୍ରାୟ ଅଧା ଲୋକ ପ୍ରତିଦିନ ପର୍ଯ୍ୟାପ୍ତ ପରିମାଣର ପାଣି ପିଉ ନାହାଁନ୍ତି । ସମସ୍ତେ ପ୍ରତିଦିନ ଅତି କମରେ ୧.୫ ଲିଟର ପାଣି ପିଇବା ଆବଶକ । କିନ୍ତୁ କୋଟି କୋଟି ଲୋକ ତାହା କରନ୍ତି ନାହିଁ । ଏହା ସ୍ୱାସ୍ଥ୍ୟ ଉପରେ ଏକ ବଡ ପ୍ରଭାବ ପକାଇଥାଏ । କମ୍ ପାଣି ପିଇବା ଶରୀରରେ ସେରମ୍ ସୋଡିୟମ୍ ବଢାଇଥାଏ, ଯାହା ସ୍ୱାସ୍ଥ୍ୟ ଉପରେ ଖରାପ ପ୍ରଭାବ ପକାଇଥାଏ । ଏପରି ଅବସ୍ଥାରେ ଲୋକମାନେ ନିଜକୁ ଭଲ ହାଇଡ୍ରେଟ୍ ରଖିବା ଉଚିତ୍ ଯାହା ଦ୍ୱାରା କ୍ରନିକ୍ ରୋଗକୁ ରୋକାଯାଇପାରିବ ।
