ଘରର ଛାତ ଉପରେ ଉଡ଼ିଲା ପାକିସ୍ତାନୀ ପତାକା, ଦେଶଦ୍ରୋହ ଅପରାଧରେ ୪ ଅଟକ

ନୂଆଦିଲ୍ଲୀ: ଉତ୍ତରପ୍ରଦେଶରେ ଜଣେ ବ୍ୟକ୍ତିଙ୍କ ଛାତ ଉପରେ ପାକିସ୍ତାନୀ ପତାକା ଦେଖିବାକୁ ମିଳିଛି । ଗତ ୧୦ ତାରିଖରେ ଚୌରୀଚୌରା ଅଞ୍ଚଳର ମୁନ୍ଦ୍ରା ବଜାରର ୧୦ନଂ ୱାର୍ଡରେ ଏହି ଘଟଣା ଦେଖିବାକୁ ମିଳିଥିଲା । ପାକିସ୍ତାନୀ ପତାକା ତଳେ କିଛି ବ୍ୟକ୍ତି ଏକତ୍ରିତ ହୋଇଥିବା ଏକ ଭିଡିଓକୁ ନେଇ ପୋଲିସରେ ଅଭିଯୋଗ ହୋଇଥିଲା । ରାଷ୍ଟ୍ରୀୟ ସ୍ୱୟଂସେବକ ସଂଘ (ଆରଏସଏସ), ବିଶ୍ୱ ହିନ୍ଦୁ ପରିଷଦ (ଭିଏଚପି) ଓ ବ୍ରାହ୍ମଣ ଜନ କଲ୍ୟାଣ ସମିତି ଏହାକୁ ନେଇ ଅଭିଯୋଗ ଦାଖଲ କରିଥିଲେ । ତେବେ ଏହି ଘଟଣା ପରେ ଦେଶଦ୍ରୋହ ଅପରାଧରେ ୪ ଜଣଙ୍କୁ ଅଟକ ରଖାଯାଇଥିବା ନେଇ ଗୋରଖପୁର ପୋଲିସ ଟ୍ୱିଟ୍ କରି ଜଣାଇଛି ।

ପୋଲିସ ଘଟଣାସ୍ଥଳରେ ପହଞ୍ଚି ପତାକା ଜବତ କରିବା ସହ ୩ଟି ଟିମ୍ ଗଠନ କରି ଘଟଣାର ତଦନ୍ତ ଆରମ୍ଭ କରିଦେଇଛି । ଅଟକ ଚାରିଜଣ ଅପରାଧୀ ହେଉଛନ୍ତି ତଲିମ, ପପୁ, ଆସିକ୍ ଓ ଆରିଫ୍ । ତେବେ ଏହି ପତାକା ଇସଲାମର ପ୍ରତୀକ ହୋଇଥିଲେ ହେଁ ପାକିସ୍ତାନ ସହ ତାଙ୍କର କୌଣସି ସମ୍ପର୍କ ନଥିବା ଉକ୍ତ ଘରର ମାଲିକ ପୋଲିସକୁ କହିଛନ୍ତି । ଉକ୍ତ ଘର ଉପରକୁ ପଥର ମାଡ଼ କରିଥିବା ବ୍ୟକ୍ତିଙ୍କ ବିରୋଧରେ ପୋଲିସ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନଥିବା ବେଳେ ଦୋଷୀଙ୍କ ବିରୋଧରେ କଡ଼ା ପଦକ୍ଷେପ ନିଆଯିବ ବୋଲି କହିଛନ୍ତି ଗୋରଖପୁର ଏସପି।