ପ୍ରତିଦିନ ଅତି କମରେ ୭ କିମ୍ବା ୮ ଟି ଭୃସଙ୍ଗ ପତ୍ରକୁ ଖାଦ୍ୟରେ କରନ୍ତୁ ସାମିଲ: ବଢିବ ରୋଗ ପ୍ରତିରୋଧ ଶକ୍ତି

ଭୃସଙ୍ଗ ପତ୍ର ଭାରତୀୟ ରୋଷେଇ ଘରର ଏକ ଅତ୍ୟାବଶ୍ୟକ ଅଂଶ । ପୂର୍ବରୁ ଏହା ପ୍ରାୟତଃ ଦକ୍ଷିଣ ଭାରତରେ ବ୍ୟବହୃତ ହେଉଥିଲା, କିନ୍ତୁ ରୋଷେଇ ପାଇଁ ବର୍ତ୍ତମାନ ଏହା ଭାରତର ପ୍ରତ୍ୟେକ କୋଣ ଅନୁକୋଣରେ ବ୍ୟବହୃତ ହେଉଛି । ଏହା କେବଳ ଖାଦ୍ୟର ସ୍ୱାଦ ବଢ଼ାଏ ନାହିଁ ବରଂ ସ୍ୱାସ୍ଥ୍ୟ ପାଇଁ ମଧ୍ୟ ବହୁତ ଲାଭଦାୟକ ହୋଇଥାଏ । ଏହି ଛୋଟ ସବୁଜ ପତ୍ରଗୁଡ଼ିକ ଅନେକ ଗୁଣରେ ପରିପୂର୍ଣ୍ଣ ।

ଆୟୁର୍ବେଦ ବିଶେଷଜ୍ଞ କହିଛନ୍ତି ଯେ ଆପଣ ପ୍ରତିଦିନ ଅତି କମରେ ୭ କିମ୍ବା ୮ ଟି ଭୃସଙ୍ଗ ପତ୍ରକୁ ନିଜ ଖାଦ୍ୟରେ ଅନ୍ତର୍ଭୁକ୍ତ କରିବା ଉଚିତ୍ ।

ଯଦି ଆପଣ ଏହାକୁ ତରକାରୀରେ ଖାଇବାକୁ ପସନ୍ଦ କରନ୍ତି ନାହିଁ, ତେବେ ଆପଣ ଏହାକୁ ସିଧାସଳଖ ଖାଇପାରିବେ କିମ୍ବା ଆପଣ ଏହାକୁ ପାଣିରେ ଫୁଟାଇ ପିଇପାରିବେ । ତେବେ ଆସନ୍ତୁ ଭୃସଙ୍ଗ ପତ୍ର ଖାଇବାର ଲାଭ କ’ଣ ସେ ବିଷୟରେ ଜାଣିବା । ବିଶେଷଜ୍ଞମାନେ କହିଛନ୍ତି ଯେ ଯେଉଁମାନଙ୍କର ହଜମ ପ୍ରକ୍ରିୟା ସହ ଜଡିତ କୌଣସି ପ୍ରକାରର ସମସ୍ୟା ଅଛି ସେମାନେ ନିଶ୍ଚିତ ଭାବରେ ଭୃସଙ୍ଗ ପତ୍ର ଖାଇବା ଉଚିତ୍ । ଏହା ଖାଇବା ଦ୍ୱାରା ଆମର ହଜମ ପ୍ରକ୍ରିୟା ଭଲ ଭାବରେ କାମ କରିଥାଏ । ଭୃସଙ୍ଗ ପତ୍ର ଖାଇବା ଦ୍ୱାରା ଗ୍ୟାସ, ବଦହଜମି ଏବଂ ଏସିଡ଼ିଟି ମଧ୍ୟ କମିଯାଏ ।

ରୋଗ ପ୍ରତିରୋଧକ ଶକ୍ତି ବଢିଥାଏ:
ଆଣ୍ଟି-ଫଙ୍ଗଲ୍, ଆଣ୍ଟି-ବ୍ୟାକ୍ଟେରିଆଲ୍ ଏବଂ ଆଣ୍ଟି-ଅକ୍ସିଡାଣ୍ଟ ଭଳି ଅନେକ ଗୁଣ ଭୃସଙ୍ଗ ପତ୍ରରେ ମିଳିଥାଏ । ଏହି ସମସ୍ତ ଉପାଦାନ ଆମ ଶରୀରର ରୋଗ ପ୍ରତିରୋଧକ ଶକ୍ତି ବଢ଼ାଇବା ଅର୍ଥାତ ରୋଗରୁ ରକ୍ଷା କରିବା ପାଇଁ କାର୍ଯ୍ୟ କରିଥାଏ । ଏହା ବ୍ୟତୀତ ଭୃସଙ୍ଗ ପତ୍ର ଇନଫେକ୍ସନରୁ ରକ୍ଷା କରିବାରେ ମଧ୍ୟ ସାହାଯ୍ୟ କରିଥାଏ । ଏଥିରେ ମିଳୁଥିବା ଆଣ୍ଟିଅକ୍ସିଡାଣ୍ଟଗୁଡିକ ଫ୍ରି ରେଡିକାଲସ୍ ସହିତ ଲଢ଼ିବାରେ ସହାୟକ ହୋଇଥାଏ ।

ହୃଦୟ ଭଲ ରହିବ:
ଭୃସଙ୍ଗ ପତ୍ର ଫାଇବରରେ ଭରପୂର ହୋଇଥାଏ । ତେଣୁ ଖରାପ କୋଲେଷ୍ଟ୍ରଲକୁ ନିୟନ୍ତ୍ରଣରେ ରଖିବା ପାଇଁ ଏହା କାମ କରିଥାଏ । ଏହା ବ୍ୟତୀତ ଭୃସଙ୍ଗ ପତ୍ର ହୃଦଘାତର ଆଶଙ୍କା ମଧ୍ୟ ହ୍ରାସ କରିଥାଏ । ଭୃସଙ୍ଗ ପତ୍ରରେ ପ୍ରଚୁର ପରିମାଣରେ ପୋଟାସିୟମ୍ ମଧ୍ୟ ମିଳିଥାଏ, ଯେଉଁ କାରଣରୁ ଏହାକୁ ଖାଇବା ଦ୍ୱାରା ବ୍ଲଡ଼ ପ୍ରେସର ସହ ଜଡ଼ିତ କୌଣସି ଅସୁବିଧା ହୁଏ ନାହିଁ ।

ସ୍କିନ୍ ଏବଂ କେଶର ଯତ୍ନ ନିଏ:
ଭୃସଙ୍ଗ ପତ୍ରରେ ଭିଟାମିନ୍ ଏ, ବି, ସି ଏବଂ ଇ ଥାଏ । ଏହି ସମସ୍ତ ଉପାଦାନ ଆମ ରକ୍ତକୁ ସଫା ରଖିବାରେ ସାହାଯ୍ୟ କରେ । ଏହା ସ୍କିନକୁ ଉନ୍ନତ କରିଥାଏ ଏବଂ କେଶକୁ ମଧ୍ୟ ସୁସ୍ଥ ରଖିଥାଏ । ଯଦି ଆପଣ ପିମ୍ପଲ୍ ଏବଂ ଦାଗ ଇତ୍ୟାଦି ସ୍କିନ ସମସ୍ୟାର ସମ୍ମୁଖୀନ ହେଉଛନ୍ତି ତେବେ ଆପଣ ନିୟମିତ ଭାବରେ ଭୃସଙ୍ଗ ପତ୍ର ଖାଇବା ଉଚିତ୍ ।