ଚାଇନାର ଷଡଯନ୍ତ୍ର! ବିଶ୍ୱ ମଞ୍ଚରେ ଭାରତକୁ ପାକିସ୍ତାନ ଆଗରେ ନୀଚା ଦେଖାଇବାକୁ ଚେଷ୍ଟା, ସିଧା ସିଧା ଶୁଣାଇ ଦେଲେ ରାଜନାଥ ସିଂ

ନୂଆଦିଲ୍ଲୀ: ଚାଇନାର କିଙ୍ଗଦାଓରେ ଚାଲିଥିବା ଶଙ୍ଘାଇ ସହଯୋଗ ସଂଗଠନ (ଏସସିଓ) ପ୍ରତିରକ୍ଷା ମନ୍ତ୍ରୀ ବୈଠକରେ ଭାରତ ଏକ ଦୃଢ଼ ବାର୍ତ୍ତା ପ୍ରଦାନ କରିଛି। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଏକ ମିଳିତ ବିବୃତିରେ ହସ୍ତାକ୍ଷର କରିବାକୁ ମନା କରିଦେଇଛନ୍ତି, କାରଣ ଏହି ଦଲିଲରେ ପହଲଗାମ ଆତଙ୍କବାଦୀ ଆକ୍ରମଣ, ଯେଉଁଥିରେ ୨୬ ନିରୀହ ଲୋକଙ୍କ ଜୀବନ ଯାଇଥିଲା, ତାହାର ଉଲ୍ଲେଖ ନଥିଲା ଏବଂ ଭାରତର ଆତଙ୍କବାଦ ବିରୋଧୀ ଦୃଢ଼ ଅବସ୍ଥାନକୁ ଏହା ପ୍ରତିଫଳିତ କରିନଥିଲା। ଏହା ସହିତ, ଦଲିଲରେ ବାଲୁଚିସ୍ତାନର ଉଲ୍ଲେଖ କରାଯାଇ ଭାରତ ଉପରେ ସେଠାରେ ଅଶାନ୍ତି ସୃଷ୍ଟି କରୁଥିବାର ଆଭାସ ଦିଆଯାଇଥିଲା।

ରାଜନାଥ ସିଂହ ବର୍ତ୍ତମାନ ଚାଇନାର କିଙ୍ଗଦାଓରେ ଏସସିଓ ପ୍ରତିରକ୍ଷା ମନ୍ତ୍ରୀମାନଙ୍କ ବୈଠକରେ ଅଂଶଗ୍ରହଣ କରୁଛନ୍ତି। ଏହି ବୈଠକରେ ରୁଷିଆ, ପାକିସ୍ତାନ, ଚାଇନା ସମେତ ଅନ୍ୟ ସଦସ୍ୟ ରାଷ୍ଟ୍ରମାନେ ଉପସ୍ଥିତ ରହି ଆଞ୍ଚଳିକ ଓ ଆନ୍ତର୍ଜାତୀୟ ସୁରକ୍ଷା ସମ୍ବନ୍ଧୀୟ ବିଷୟରେ ଆଲୋଚନା କରୁଛନ୍ତି। ୨୦୦୧ ମସିହାରେ ପ୍ରତିଷ୍ଠିତ ଏସସିଓର ଲକ୍ଷ୍ୟ ହେଉଛି ସହଯୋଗ ଜରିଆରେ ଆଞ୍ଚଳିକ ସ୍ଥିରତାକୁ ପ୍ରୋତ୍ସାହିତ କରିବା। ବର୍ତ୍ତମାନ ଏହି ସଂଗଠନରେ ୧୦ଟି ସଦସ୍ୟ ରାଷ୍ଟ୍ର ରହିଛନ୍ତି: ବେଲାରୁଷ, ଚାଇନା, ଭାରତ, ଇରାନ, କାଜାଖସ୍ତାନ, କିର୍ଗିଜସ୍ତାନ, ପାକିସ୍ତାନ, ରୁଷିଆ, ତାଜିକିସ୍ତାନ ଏବଂ ଉଜବେକିସ୍ତାନ। ଭାରତର ଏହି ଦୃଢ଼ ପଦକ୍ଷେପ ଆତଙ୍କବାଦ ବିରୋଧରେ ଦେଶର ଅଟଳ ଅବସ୍ଥାନକୁ ପୁନର୍ବାର ଦୋହରାଇଛି।