ବଦଳିଲା ପାଗ: ମାର୍ଚ୍ଚ ଆରମ୍ଭରୁ ଜଳିଲା ଓଡ଼ିଶା, 37 ଟପିଲା ଝାରସୁଗୁଡ଼ା

ଭୁବନେଶ୍ବର: ମାର୍ଚ୍ଚ ଆରମ୍ଭରୁ ତାଉ ଦେଖାଇଲାଣି ତାତି । ଆଜି ରାଜ୍ୟରେ ବଢ଼ିଲା ତାପମାତ୍ରା । ଆଜି ଝାରସୁଗୁଡ଼ାରେ ତାପମାତ୍ରା 37 ଡିଗ୍ରୀ ଟପିଛି ।

ପାଣିପାଗ ବିଭାଗର ତଥ୍ୟ ଅନୁସାରେ, ଆଜି ଦିନ 2ଟା 30 ସୁଦ୍ଧା ତାପମାତ୍ରା 37.4 ଡିଗ୍ରୀ ଛୁଇଁଛି । ସେହିପରି ସମ୍ବଲପୁରରେ ତାପମାତ୍ରା 36.8 ଡିଗ୍ରୀ ହୋଇଛି ।

ତେବେ ଗତ କିଛି ଦିନ ହେବ ରାଜ୍ୟରେ ପାଗ ଶୁଖିଲା ରହିଛି । ମାର୍ଚ୍ଚରୁ ମେ ଯାଏଁ ତାପମାତ୍ରା ଅଧିକ ରହିବା ନେଇ ପାଣିପାଗ ବିଭାଗ ପକ୍ଷରୁ କୁହାଯାଇଛି । ତାପମାତ୍ରା 2ରୁ3 ଡିଗ୍ରୀ ବୃଦ୍ଧି ପାଇବ ବୋଲି ଭୁବନେଶ୍ବର ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ କୁହାଯାଇଥିଲା ।

ଧୀରେଧୀରେ ଦିନ ଏବଂ ରାତିର ତାପମାତ୍ରା ବୃଦ୍ଧି ପାଇବ ବୋଲି ଆଞ୍ଚଳିକ ପାଣିପାଗ କେନ୍ଦ୍ରର ନିର୍ଦ୍ଦେଶିକା ମନୋରୋମା ମହାନ୍ତି କହିଥିଲେ । ତେବେ ରାଜ୍ୟରେ ଦିନର ତାପମାତ୍ରା 35 ଡିଗ୍ରୀ ରହିବା ନେଇ ଆକଳନ କରାଯାଇଥିବା ବେଳେ ଆଜି ତାପମାତ୍ରା 37 ଡିଗ୍ରୀ ଟପିଛି ।

ରାତିରେ ମଧ୍ୟ ତାପମାତ୍ରା ବୃଦ୍ଧି ପାଉଛି । ତେବେ ଏବେଠୁ ବୈଶାଖର ରୁଦ୍ରତାପ ଦେଖାଇଥିବା ବେଳେ ଆଗକୁ କଣ ହେବ ସେନେଇ ସମସ୍ତଙ୍କର ମନରେ ପ୍ରଶ୍ନବାଚୀ ସୃଷ୍ଟି ହୋଇଛି ।