ପିନ୍ଧିଲେ ଶଙ୍ଖା ଆଉ ସିନ୍ଦୁର: ନିଜକୁ ନିଜେ ବିବାହ କଲେ ସୁନ୍ଦରୀ କ୍ଷମା

ନୂଆଦିଲ୍ଲୀ: ସବୁ ବାଦ ବିବାଦରେ କ୍ଷମା ପକାଇଲେ ପୂର୍ଣ୍ଣଚ୍ଛେଦ । ସବୁ ଆଲୋଚନା-ପର୍ଯ୍ୟାଲୋଚନା ଏବଂ ସମାଲୋଚନାକୁ ପଛରେ ପକାଇ ଆଜି ବିବାହ କରିଛନ୍ତି ସୁନ୍ଦରୀ କ୍ଷମା । ତାଙ୍କ ବିବାହକୁ ନେଇ ଦୀର୍ଘ ଦିନରୁ ଲାଗି ରହିଥିବା ଚର୍ଚ୍ଚା ଉପରେ ସେ ବିରାମ ଲଗାଇଛନ୍ତି । ଆଜି ନିଆରା ଢଙ୍ଗରେ ନିଜକୁ ନିଜେ ବିବାହ କରି ଇତିହାସରେ ଲେଖିଛନ୍ତି ଏକ ନୂଆ କାହାଣୀ । ନିଜ ନାଁରେ ସିନ୍ଦୁର ଆଉ ନିଜ ନାଁରେ ଶଙ୍ଖା ପିନ୍ଧିଛନ୍ତି କ୍ଷମା ।

୧୧ ତାରିଖରେ ବିବାହ କରିବା ପାଇଁ ସେ ଘୋଷଣା କରିଥିଲେ । କିନ୍ତୁ ଏହି ଘଟଣାକୁ ନେଇ ବିବାଦ ବଢୁଥିବାର ଦେଖି ସେ ଧାର୍ଯ୍ୟ ସମୟ ପୂର୍ବରୁ ବିବାହ କରି ନେଇଛନ୍ତି । କ୍ଷମା ନିଜ ଘରେ ହିଁ ବାହାଘରର ସମସ୍ତ କାର୍ଯ୍ୟକ୍ରମ ଶେଷ ହୋଇଛି । ମେହେନ୍ଦୀ, ହଳଦୀ ଇତ୍ୟାଦି ସମସ୍ତ କାର୍ଯ୍ୟକ୍ରମ କ୍ଷମା ତାଙ୍କ ଘରେ ସମ୍ପନ୍ନ କରିଛନ୍ତି । ସବୁ ପରମ୍ପରା ଆଉ ବିଧି ଅନୁଯାୟୀ ହୋଇଛି । କିନ୍ତୁ ବିବାହ କରିବା ବେଳକୁ କ୍ଷମାଙ୍କ ପାଇଁ ନଥିଲେ ବରଯାତ୍ରୀ ନା ଥିଲେ ବର । ନିଜେ ବର ଏବଂ ନିଜେ ହିଁ କନିଆଁ ସାଜିଛନ୍ତି କ୍ଷମା ।

ବିବାହ ସମୟରେ ଘର ଆଗରେ ସେ “ନୋ ମିଡିଆ’ର ବୋର୍ଡ ଲଗାଇଥିଲେ । ତଥାପି ଅନେକ ମିଡିଆ ତାଙ୍କ ଇଣ୍ଟରଭ୍ୟୁ ପାଇଁ ଆସିଥିବା ସେ କହିଛନ୍ତି । ତେବେ ବିବାହ ପରେ ଏକ ଭିଡିଓ ଜରିଆରେ କ୍ଷମା ସମସ୍ତଙ୍କୁ ଧନ୍ୟବାଦ ଜ୍ଞାପନ କରିଛନ୍ତି । ଏହା ସହିତ ବିବାହ ପାଇଁ ତାଙ୍କୁ ଶୁଭେଚ୍ଛା ଜଣାଇଥିବା ସମସ୍ତ ବ୍ୟକ୍ତିଙ୍କୁ ସେ ଧନ୍ୟବାଦ ଦେଇଛନ୍ତି ।