Breaking: କାଲି ପୱନ ହଂସରେ ହେବ ‘ଭାରତ କୁମାର’ଙ୍କ ଅନ୍ତିମ ସଂସ୍କାର, ପୁଅ କୁନାଲ ଦେଲେ ସୂଚନା

ମୁମ୍ବାଇ: ବଲିଉଡ୍ ଅଭିନେତା ତଥା ଫିଲ୍ମ ନିର୍ଦ୍ଦେଶକ ମନୋଜ କୁମାରଙ୍କ ଶେଷକୃତ୍ୟ ଆସନ୍ତା କାଲି କରାଯିବ । ମନୋଜ କୁମାରଙ୍କ ବିୟୋଗ ଇଣ୍ଡଷ୍ଟ୍ରି ପାଇଁ ଏକ ଅପୁରଣୀୟ କ୍ଷତି ।

ମୁମ୍ବାଇରେ ମନୋଜଙ୍କ ଶେଷକୃତ୍ୟ କରାଯିବ ବୋଲି କହିଛନ୍ତି ମନୋଜଙ୍କ ପୁଅ କୁନାଲ ଗୋସ୍ୱାମୀ । ଶନିବାର ୧୧ଟାବେଳେ ମନୋଜଙ୍କ ଅନ୍ତିମ ସଂସ୍କାର କରାଯିବ ବୋଲି ସେ ସୂଚନା ଦେଇଛନ୍ତି । ଭିଲେ ପାର୍ଲେ ସ୍ଥିତି ନାନାବତୀ ହସ୍ପିଟାଲ ସମ୍ମୁଖରେ ଥିବା ପୱନ ହଂସରେ ମନୋଜଙ୍କ ଶେଷକୃତ୍ୟ କରାଯିବ ।

ଶୁକ୍ରବାର ଭୋର ୪ଟା ୦୩ ମିନିଟରେ ମନୋଜ ଚିକିତ୍ସାଧୀନ ଅବସ୍ଥାରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ସ୍ୱାସ୍ଥ୍ୟଗତ ସମସ୍ୟା କାରଣରୁ ତାଙ୍କୁ କୋକିଲାବେନ୍ ଧିରୁବାଇ ଅମ୍ବାନୀ ହସ୍ପିଟାଲରେ ଭର୍ତ୍ତି କରାଯାଇଥିଲା ।

ମନୋଜ କୁମାର(୮୭)ଙ୍କ ବିୟୋଗ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକ୍ସରେ ଶୋକ ବ୍ୟକ୍ତ କରି ଏକ ପୋଷ୍ଟ ଶେୟାର କରିଛନ୍ତି । ବଲିଉଡର ବହୁ କଳାକାର ଓ ନେତା ମନୋଜ କୁମାରଙ୍କ କାମକୁ ସ୍ମରଣ କରି ଶୋକ ଜଣାଇଛନ୍ତି ।