ଦ୍ୱିତୀୟ ମ୍ୟାଚରେ ଚାଲିଲା ରୋହିତଙ୍କ ମାଷ୍ଟରମାଇଣ୍ଡ: ସବୁ ଆଶା ବାହାରେ କଲେ ଏମିତି କାମ
ନୂଆ ଦିଲ୍ଲୀ: ଭାରତ-ୱେଷ୍ଟଇଣ୍ଡିଜ ବିପକ୍ଷ ଦ୍ୱିତୀୟ ମ୍ୟାଚରେ ନୂଆ ପ୍ଲାନ ସହିତ ମଇଦାନକୁ ଓହ୍ଲାଇଛି ଟିମ ଇଣ୍ଡିଆ । ଏହି ମ୍ୟାଚରେ ଅଦିନାୟକ ରୋହିତ ଶର୍ମା ଖେଳିଛନ୍ତି ଆଉ ଏକ ନୂଆ ଚାଲ୍ । ସାରା ବିଶ୍ୱକୁ ଚମକାଇ ଦେଇଛି ଯେଉଁ ରଣନୀତି । ଦ୍ୱିତୀୟ ମ୍ୟାଚ ପାଇଁ ଇଶାନ କିଶାନଙ୍କ ବଦଳରେ ଦଳକୁ ଫେରିଛନ୍ତି ଉପଅଧିନାୟକ କେ.ଏଲ ରାହୁଲ । ସେ ଆସିବା ପରେ ସାରା କ୍ରିକେଟ ଜଗତ ନିଶ୍ଚିତ ଥିଲା ଯେ ରୋହିତଙ୍କ ସହିତ ସେ ଓପନ କରିବେ । କିନ୍ତୁ ରୋହିତଙ୍କ ମନରେ ଥିଲା ପ୍ଲାନ ନମ୍ବର ବି । କେ. ରାହୁଲ ନୁହେଁ ବରଂ ରୋହିତଙ୍କ ସହିତ ପାଳି ଆରମ୍ଭ କରିବାକୁ ପଡିଆକୁ ଆସିଥିଲେ ୱିକେଟ କିପର ଋଷଭ ପନ୍ତ ।
କିଛି ସିଜନରୁ ଖରାପ ଫର୍ମକୁ ନେଇ ସଂଘର୍ଷ କରୁଥିବା ଋଷଭଙ୍କ ଦ୍ୱାରା ମ୍ୟାଚ ଓପନ କରାଇବାକୁ ନିଷ୍ପତ୍ତି ନେଇଥିଲେ ରୋହିତ । ଏହାପରେ ଏହି ନିଷ୍ପତ୍ତି କ୍ରିକେଟ ଜଗତରେ ପାଲଟିଛି ଚର୍ଚ୍ଚାର କେନ୍ଦ୍ରବିନ୍ଦୁ । ଋଷଭ ପନ୍ତଙ୍କ ମଧ୍ୟରେ ଅଷ୍ଟ୍ରେଲିଆର ପୂର୍ବତନ ଅଧିନାୟକ ତଥା ୱିକେଟ କିପର ବ୍ୟାଟ୍ସମ୍ୟାନ ଆଡାମ ଗିଲକ୍ରିଷ୍ଟଙ୍କ ଝଲକ ଦେଖିବାକୁ ମିଳେ । ସେଥିପାଇଁ ତାଙ୍କୁ ଟିମରେ ଆଉ ଏକ ନୂଆ ରୋଲ ମିଳିପାରେ ବୋଲି ଚର୍ଚ୍ଚା ହେଉଛି । ତେବେ ରୋହିତଙ୍କର ଏହି ମାଷ୍ଟର ଷ୍ଟ୍ରୋକ ସେତେଟୋ ଫଳପ୍ରଦ ହୋଇ ପାରିନଥିଲା । ୩୪ଟି ବଲ ଖେଳି ୩ ଚୌକା ସହ ମାତ୍ର ୧୮ ରନରେ ଆଉଟ ହୋଇ ପାଭିଲିୟନ ଫେରଛନ୍ତି ଋଷଭ ।
ତେବେ ଓପନର ଭାବରେ ଏହି ଗୋଟିଏ ମ୍ୟାଚ ଆଧାରରେ କୌଣସି ନିଷ୍ପତ୍ତି ନିଆଯାଇ ନପାରେ । ଗିଲକ୍ରିଷ୍ଟ ୩୯୬ ମ୍ୟାଚ ଖେଳିଥିବା ବେଳେ ୯୬୧୯ ରନ ବନାଇଛନ୍ତି । ସେପଟେ ଋଷଭ ଏବେ ନିଜ କ୍ୟରିୟର ଆରମ୍ଭ କରୁଛନ୍ତି । ଆଗକୁ ଲମ୍ବା ଭବିଷ୍ୟତ ଏବଂ ଅନେକ ମ୍ୟାଚ ଖେଳିବାର ଅଛି । ତେଣୁ ତାଙ୍କୁ ସମୟ ଦିଆଯିବା ଦରକାର ।