୭୦୦ କୋଟି ଟଙ୍କାରେ ନିର୍ମାଣ ହେବ UAEର ପ୍ରଥମ ହିନ୍ଦୁ ମନ୍ଦିର: ଜାଣନ୍ତୁ କ’ଣ ରହିଛି ବିଶେଷତ୍ୱ
ନୂଆଦିଲ୍ଲୀ: ୟୁନାଇଟେଡ଼ ଆରବ ଏମିରେଟ୍ସ (ୟୁଏଇ) ର ଆବୁଧାବିରେ ନିର୍ମାଣ ହେଉଛି ଏକ ଚମତ୍କାର କଳାକୃତି । ତେବେ ଏହା କୌଣସି ସାଧାରଣ କୋଠା କିମ୍ବା ଭବନ ନୁହେଁ ଯାହା ପର୍ୟ୍ୟଟକଙ୍କୁ ଆକର୍ଷିତ କରିବା ପାଇଁ ତିଆରି କରାଯାଉଛି। ପ୍ରକୃତରେ ଏହା ହେଉଛି ଏକ ହିନ୍ଦୁ ମନ୍ଦିର । ତେବେ ଏହା ଏହି ଅଞ୍ଚଳର ପ୍ରଥମ ପଥର ହିନ୍ଦୁ ମନ୍ଦିର ଏବଂ ପଶ୍ଚିମ ଏସିଆର ବୃହତ୍ତମ ହିନ୍ଦୁ ମନ୍ଦିର ହେବ ବୋଲି ଜଣାପଡ଼ିଛି। ୭୦୦ କୋଟି ଟଙ୍କା ବ୍ୟୟରେ ନିର୍ମାଣ ହେଉଥିବା ଏହି ମନ୍ଦିରରେ ସାତୋଟି ଶିଖର ରହିବ ଯାହାକି ଦେଶର ପ୍ରତ୍ୟେକ ଏମିରେଟକୁ ପ୍ରତିନିଧିତ୍ୱ କରିବ ।
ବୋକସାନବାସୀ ଅକ୍ଷର ପୁରୁଷୋତ୍ତମ ସ୍ଵାମୀନାରାୟଣ ସଂସ୍ଥା(BAPS)ର ଏହି ହିନ୍ଦୁ ମନ୍ଦିର ନିର୍ମାଣ କ୍ଷେତ୍ରରେ ଏକ ଚମତ୍କାର ବୋଲି ପ୍ରମାଣିତ ହେବ । ଏହି ମନ୍ଦିରରେ ୪୦,୦୦୦ ଘନ ମିଟର ମାର୍ବଲ, ୧,୮୦,୦୦୦ ଘନ ମିଟର ଷ୍ଟାଣ୍ଡଷ୍ଟୋନ ଏବଂ ୧.୮ ମିଲିୟନରୁ ଅଧିକ ଇଟାର ବ୍ୟବହାର ହେବ। ୟୁଏଇର ପ୍ରଥମ ପଥର ହିନ୍ଦୁ ମନ୍ଦିର ଭାବରେ BAPS ମନ୍ଦିର ଏହି ଅଞ୍ଚଳର ବିଭିନ୍ନ ସମ୍ପ୍ରଦାୟର ସାଂସ୍କୃତିକ ଏକୀକରଣ ପାଇଁ ପଥ ପରିଷ୍କାର କରିଛି । ତେବେ ଏହି ବିଶାଳ ମନ୍ଦିରର ଉଚ୍ଚତା ୧୦୮ ଫୁଟ ରହିଥିବା ସୂଚନା ମିଳିଛି ।
ମନ୍ଦିରର ଗଠନ ଶୈଳୀ ବୈଦିକ ସ୍ଥାପତ୍ୟ ଏବଂ ମୂର୍ତ୍ତିଗୁଡ଼ିକରୁ ପ୍ରେରିତ । ତେବେ ଏହି ମନ୍ଦିର ପାଇଁ ଆବଶ୍ୟକ ଅନେକ ମୂର୍ତ୍ତି ଭାରତର କାରିଗରମାନଙ୍କ ଦ୍ୱାରା ପ୍ରସ୍ତୁତ କରାଯାଇ ଆବୁଧାବି ପଠାଯାଇଛି ।
୨୦୧୫ ରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୟୁଏଇ ଗସ୍ତ ସମୟରେ ଆବୁଧାବି ଦୁବାଇ-ଆବୁଧାବି ରାଜପଥରେ ମନ୍ଦିର ପ୍ରକଳ୍ପ ପାଇଁ ୧୭ ଏକରରୁ ଅଧିକ ଜମି ବଣ୍ଟନ କରିଥିଲେ। ଏପରିକି ୨୦୧୭ ମସିହାରେ ପ୍ରଧାନମନ୍ତ୍ରୀ ମୋଦୀଙ୍କ ଦ୍ୱାରା ମନ୍ଦିରର ଭିତ୍ତି ପ୍ରସ୍ତର ସ୍ଥାପନ କରାଯାଇଥିଲା।
ତେବେ ମୁଖ୍ୟ ମନ୍ଦିର ବ୍ୟତୀତ ଏହାର କମ୍ପ୍ଲେକ୍ସରେ ଶ୍ରେଣୀଗୃହ, ପ୍ରଦର୍ଶନୀ କେନ୍ଦ୍ର ଏବଂ ପିଲାମାନଙ୍କ ପାଇଁ ଖେଳ ପଡିଆ ମଧ୍ୟ ରହିବ । ୭୦୦ କୋଟି ଟଙ୍କାର ମନ୍ଦିର ନିର୍ମାଣ ପାଇଁ ଅନେକ ଲୋକ ଦାନ କରିଥିବାବେଳେ ଅନେକ ବ୍ୟକ୍ତି ଏହି ନିର୍ମାଣରେ ସକ୍ରିୟ ସହଯୋଗ କରିଛନ୍ତ । ପ୍ରତୀକାତ୍ମକ ଭାବରେ ଏକ ଇଟା ରଖି ଐତିହାସିକ ତଥା ପ୍ରତୀକାତ୍ମକ ହିନ୍ଦୁ ମନ୍ଦିରର ଏକ ଅଂଶ ହେବାକୁ ଯାଉଛନ୍ତି।