ASER ରିପୋର୍ଟ ୨୦୨୨: ସରକାରୀ ବିଦ୍ୟାଳୟର ଅଧିକାଂଶ ପିଲା ଘରୋଇ ଟ୍ୟୁସନ ନେଉଛନ୍ତି
ନୂଆଦିଲ୍ଲୀ: ଶିକ୍ଷାର ବାର୍ଷିକ ସ୍ଥିତି ଉପରେ ହେଉଥିବା ସର୍ଭେ ଅନୁଆଲ ଷ୍ଟାଟସ ଅଫ ଏଜୁକେସନ(ଏଏସଇଆର ୨୦୨୨) ରିପୋର୍ଟ ୧୮ ଜାନୁଆରୀ ବୁଧବାର ଦିନ ପ୍ରକାଶ ପାଇଛି। ପ୍ରଥମ ଫାଉଣ୍ଡେସନ୍ ଦ୍ୱାରା ଚାରି ବର୍ଷ ପରେ ଏତେ ବଡ଼ ପରିମାଣରେ ଏହି ସର୍ଭେ କରାଯାଇଛି। ଏହାପୂର୍ବରୁ ୨୦୧୮ ରେ, ଏହି ରିପୋର୍ଟ ପ୍ରକାଶ ପାଇଥିଲା। ଏଏସଇଆର ୨୦୨୨ ର ସର୍ବଶେଷ ସଂସ୍କରଣରେ ଦର୍ଶାଯାଇଛି ଯେ ଗତ କିଛି ବର୍ଷ ମଧ୍ୟରେ ଭାରତର ସରକାରୀ ବିଦ୍ୟାଳୟରେ ଛାତ୍ରଛାତ୍ରୀଙ୍କ ନାମଲେଖାରେ ବୃଦ୍ଧି ଘଟିଛି।
କରୋନା ମହାମାରୀ ହେତୁ ୪ ବର୍ଷ ପରେ ଏଏସଇଆର ୨୦୨୨ ସଂସ୍କରଣ ଜାତୀୟ ସ୍ତରରେ କରାଯାଇଥିଲା। ଏଥିରେ ୬୧୬ ଟି ଜିଲ୍ଲା ଏବଂ ୧୯,୦୬୦ ଟି ଗାଁରୁ ତଥ୍ୟ ସଂଗ୍ରହ କରାଯାଇଥିଲା। ଏହି ସର୍ଭେରେ ୩ ରୁ ୧୬ ବର୍ଷ ବୟସର ୩,୭୪,୫୪୪ ପରିବାର ଏବଂ ୬,୯୯,୫୯୭ ପିଲାଙ୍କୁ ସାମିଲ କରାଯାଇଛି। ସର୍ଭେ କରିଥିବା ଏବଂ ରିପୋର୍ଟ ପ୍ରସ୍ତୁତ କରିଥିବା ପ୍ରଥମ ଶିକ୍ଷା ଫାଉଣ୍ଡେସନ୍ ବୁଧବାର ଏହି ସୂଚନା ଦେଇଛି। ରିପୋର୍ଟ ଅନୁଯାୟୀ, ୨୦୧୮ ମସିହାରୁ ସରକାରୀ ବିଦ୍ୟାଳୟରେ ନାମଲେଖାରେ ଉଲ୍ଲେଖନୀୟ ବୃଦ୍ଧି ଘଟିଛି। ୨୦୧୮ ସର୍ଭେରେ, ଏହି ସଂଖ୍ୟା ୬୫.୬ ପ୍ରତିଶତ ଥିଲା, ଯାହା ୨୦୨୨ ମସିହାରେ ୭୨.୯ ପ୍ରତିଶତକୁ ବୃଦ୍ଧି ପାଇଛି।
ହିନ୍ଦୁସ୍ତାନ ଟାଇମ୍ସର ଏକ ରିପୋର୍ଟ ଅନୁଯାୟୀ, ସରକାରୀ ବିଦ୍ୟାଳୟରେ ନାମ ଲେଖାଇଥିବା ପିଲାଙ୍କ ଅନୁପାତ (୬ ରୁ ୧୪ ବର୍ଷ) ୨୦୦୬ ରୁ ୨୦୧୪ ମଧ୍ୟରେ କ୍ରମାଗତ ହ୍ରାସ ଘଟିଛି। ୨୦୧୪ ରେ ଏହି ସଂଖ୍ୟା ୬୪.୯% ଥିଲା ଏବଂ ଚାରି ବର୍ଷ ମଧ୍ୟରେ ଅଧିକ ପରିବର୍ତ୍ତନ ହୋଇନାହିଁ। ଅନ୍ୟପକ୍ଷରେ, ସରକାରୀ ବିଦ୍ୟାଳୟରେ ନାମ ଲେଖାଇଥିବା ପିଲାଙ୍କ ଅନୁପାତ (୬ ରୁ ୧୪ ବର୍ଷ) ୨୦୧୮ ରେ ୬୫.୬% ଥିଲା, ଯାହା ଚାରି ବର୍ଷ ମଧ୍ୟରେ ଦ୍ରୁତ ଗତିରେ ୨୦୨୨ ରେ ୭୨.୯% କୁ ବୃଦ୍ଧି ପାଇଥିଲା। ସରକାରୀ ବିଦ୍ୟାଳୟରେ ନାମଲେଖା ବୃଦ୍ଧି ଦେଶର ପ୍ରାୟ ପ୍ରତ୍ୟେକ ରାଜ୍ୟରେ ଦୃଶ୍ୟମାନ ହେଉଛି।
ତେବେ ଏହି ସମୟରେ ଟ୍ୟୁସନରେ ପାଠ୍ୟକ୍ରମ ଗ୍ରହଣ କରୁଥିବା ଛାତ୍ରଙ୍କ ସଂଖ୍ୟା ମଧ୍ୟ ବୃଦ୍ଧି ପାଇଛି। ଏଏସଇଆର ୨୦୨୨ ରିପୋର୍ଟ ଅନୁଯାୟୀ, ୨୦୨୨ ବର୍ଷରେ ଟ୍ୟୁସନ କ୍ଲାସ୍ ନେଉଥିବା ୧-୮ ଶ୍ରେଣୀର ଛାତ୍ରଛାତ୍ରୀଙ୍କ ସଂଖ୍ୟା ୩୦.୫% ଥିବାବେଳେ ୨୦୧୮ ରେ ଏହି ସଂଖ୍ୟା ୨୬.୪% ଥିଲା। ଏହି ରିପୋର୍ଟରେ ଆହୁରି ମଧ୍ୟ କୁହାଯାଇଛି ଯେ ଉତ୍ତରପ୍ରଦେଶ, ବିହାର ଏବଂ ଝାଡଖଣ୍ଡରେ ଘରୋଇ ଶିକ୍ଷା ଗ୍ରହଣ କରୁଥିବା ପିଲାଙ୍କ ଅନୁପାତ ୨୦୧୮ ସ୍ତର ତୁଳନାରେ ୮ ପ୍ରତିଶତ କିମ୍ବା ଅଧିକ ବୃଦ୍ଧି ପାଇଛି।
