ପ୍ରଧାନମନ୍ତ୍ରୀଙ୍କ ସୁରକ୍ଷାରେ ତ୍ରୁଟି ପ୍ରସଙ୍ଗ: ପଞ୍ଜାବରେ ୧୫ ଆତଙ୍କବାଦୀ ସଂଗଠନ ସହ ଏହି ୨୪ କାରଣ ଥିଲା ବିପଦ!
ସୁପ୍ରିମକୋର୍ଟର ଜଣେ ପୂର୍ବତନ ବିଚାରପତିଙ୍କ ଅଧ୍ୟକ୍ଷତାରେ ଗଠିତ କମିଟି ପ୍ରଧାନମନ୍ତ୍ରୀଙ୍କ ସୁରକ୍ଷାରେ ହୋଇଥିବା ତ୍ରୁଟିର ଯାଞ୍ଚ କରିବେ । ଏହି କମିଟିରେ ଡିଜିପି ଚଣ୍ଡିଗଡ଼, ଏନଆଇଏର ଆଇଜି, ପଞ୍ଜାବ ପୋଲିସର ଅତିରିକ୍ତ ଡିଜି ଏବଂ ପଞ୍ଜାବର ରେଜିଷ୍ଟ୍ରାର ଜେନେରାଲ ଏବଂ ହରିୟାଣା ହାଇକୋର୍ଟ ସାମିଲ ହେବେ। ପ୍ରଧାନମନ୍ତ୍ରୀଙ୍କ ପଞ୍ଜାବ ଗସ୍ତ ପୂର୍ବରୁ ସ୍ଥାନୀୟ ପୋଲିସକୁ ଅନେକ ଗୁପ୍ତଚର ଆଲର୍ଟ ପଠାଯାଇଛି। ପ୍ରଧାନମନ୍ତ୍ରୀଙ୍କ ସୁରକ୍ଷା ସମ୍ପର୍କରେ କୁହାଯାଇଥିଲା ଯେ ପଞ୍ଜାବରେ ୧୫ ଟି ଆତଙ୍କବାଦୀ ସଂଗଠନ ସହ ୨୪ ଟି କାରଣ ରହିଛି ଯାହା ପ୍ରଧାନମନ୍ତ୍ରୀଙ୍କ ପାଇଁ ବିପଦ ହୋଇପାରେ।
ପାକିସ୍ତାନର ଅନେକ ଗୋଷ୍ଠୀ ବ୍ୟତୀତ ଆତଙ୍କବାଦୀ ସଂଗଠନରେ ଏଲଟିଟିଇ / ମାଓବାଦୀ କ୍ୟାଡର ମଧ୍ୟ ସାମିଲ ଅଛନ୍ତି । ଏସବୁ ସତ୍ତ୍ୱେ ସଡ଼କ ପଥ ପ୍ରଧାନମନ୍ତ୍ରୀଙ୍କ ପାଇଁ ଉପଯୁକ୍ତ ବୋଲି କୁହାଯାଇଥିଲା । ପଞ୍ଜାବ ପୋଲିସରୁ ଏସପିଜି ରୁଟ କ୍ଲିୟରାନ୍ସ ପାଇଥିଲା। ଏହି ଘଟଣାର ଅନୁସନ୍ଧାନ ପାଇଁ କେନ୍ଦ୍ର ସରକାର ଗଠନ କରିଥିବା କମିଟି ଉପରୋକ୍ତ ତଥ୍ୟକୁ ଗମ୍ଭୀରତାର ସହ ନେଇଛି। ଏହା ଉପରେ ଏକ ବିସ୍ତୃତ ନୋଟ୍ ମଧ୍ୟ ପ୍ରସ୍ତୁତ କରାଯାଇଛି । ସୂତ୍ରରୁ ପ୍ରକାଶ ଯେ ସେହି ନୋଟ୍ ବର୍ତ୍ତମାନ ସୁପ୍ରିମକୋର୍ଟଙ୍କ ଦ୍ୱାରା ଗଠିତ କମିଟିକୁ ହସ୍ତାନ୍ତର କରାଯିବ। ଏହି ‘ନୋଟ୍’ ଏହି ମାମଲା ସହ ଜଡିତ ପଞ୍ଜାବ ପୋଲିସର ବରିଷ୍ଠ ଅଧିକାରୀଙ୍କ ପାଇଁ ବଡ ଅସୁବିଧାର କାରଣ ହୋଇପାରେ।
ସୂଚନାନୁସାରେ, ପ୍ରଧାନମନ୍ତ୍ରୀ ମୋଦିଙ୍କ ଗସ୍ତ ପୂର୍ବରୁ ଗୁପ୍ତଚର ଏଜେନ୍ସି ପଞ୍ଜାବ ପୋଲିସକୁ ଏକ ବିସ୍ତୃତ ନୋଟ ପଠାଇଥିଲା। ସେଥିରେ ପ୍ରଧାନମନ୍ତ୍ରୀଙ୍କ ସୁରକ୍ଷା ପ୍ରତି ବିପଦ ସୃଷ୍ଟି କରୁଥିବା ସମସ୍ତ ତଥ୍ୟ ଲେଖାଥିଲା । ପଞ୍ଜାବରେ କେଉଁ ଆତଙ୍କବାଦୀ ସଂଗଠନ ସକ୍ରିୟ ଅଛନ୍ତି? ଏହି ରିପୋର୍ଟରେ ଅନ୍ୟ ରାଜ୍ୟରେ କାର୍ୟ୍ୟ କରୁଥିବା ମାଓବାଦୀ ଏବଂ ଏଲଟିଟିଇ ଭଳି ଗୋଷ୍ଠୀ ବିଷୟରେ ମଧ୍ୟ ଉଲ୍ଲେଖ ରହିଛି। ଆତଙ୍କବାଦୀ ସଂଗଠନର ଏହି ତାଲିକାରେ ପାକିସ୍ତାନର ଅନେକ ଗୋଷ୍ଠୀର ନାମ ରହିଛି। ଏହି ତାଲିକାରେ ଇଣ୍ଡିଆନ୍ ମୁଜାହିଦ୍ଦିନ, ପୂର୍ବତନ ଷ୍ଟୁଡେଣ୍ଟ୍ ଇସଲାମିକ୍ ମୁଭମେଣ୍ଟ ଅଫ୍ ଇଣ୍ଡିଆ (ସିମୀ), ହର୍କତ-ଉଲ୍-ମୁଜାହିଦ୍ଦିନ, ହର୍କତ-ଉଲ-ଜିହାଦ-ଇ-ଇସଲାମି, ହିଜବୁଲ ମୁଜାହିଦ୍ଦିନ, ପାକିସ୍ଥାନ ଶିଖ ଆତଙ୍କବାଦୀ ଏବଂ ସୁବିଧାକାରୀ, ଭାରତରେ ଥିବା ମାଓବାଦୀ ସଂଗଠନ (ଏଲଡବ୍ଲୁଇ) । ଏଲଟିଟିଇ କ୍ୟାଡର ଏବଂ ଏହା ସହ ଜଡ଼ିତ ଅନ୍ୟ ସଂଗଠନ, ପାକିସ୍ତାନର ମିଲିଟାରୀ ନେତା ଭଧାଭା ସିଂ ବାବର (ବି.କେ.ଆଇ), ପରମଜିତ ସିଂ ପଞ୍ଜାୱାର (କେସିଏଫ / ପି), ରଣଜିତ ସିଂ ନୀତା (କେଜେଡଏଫ), ଲଖବୀର ସିଂ ରୋଧେ (ଆଇଏସୱାଇଏଫ/ଆର), ଲଶ୍କର-ଇ-ତାଇବା, ଆତଙ୍କବାଦୀ ଜୟଶ-ଇ-ମହମ୍ମଦ ଏବଂ ତେହେରିକ-ଇ-ତାଲିବାନ ଭଳି ସଂଗଠନ ଏଥିରେ ଜଡିତ ଅଛନ୍ତି।
ଏହା ସହ ଅନ୍ୟାନ୍ୟ କାରଣକୁ ମଧ୍ୟ ଗୁଇନ୍ଦା ସଂସ୍ଥା ବର୍ଣ୍ଣନା କରିଛି । ଯେମିତିକି ନିର୍ବାଚନ ସମୟରେ ପ୍ରଧାନମନ୍ତ୍ରୀଙ୍କ ଉପରେ ଆତଙ୍କୀ ଆକ୍ରମଣର ସମ୍ଭାବନା ବଢ଼ିଥାଏ । ଡ୍ରୋନ ହମଲା ଉପରେ ମଧ୍ୟ ସତର୍କ କରାଇଥିଲା ଏଜେନ୍ସି । କାରଣ ପଞ୍ଜାବର ସୀମାନ୍ତ ଅଞ୍ଚଳରେ ଡ୍ରୋନ୍ ମାଧ୍ୟମରେ ପାକିସ୍ତାନ ପକ୍ଷରୁ ନିଷିଦ୍ଧ ସାମଗ୍ରୀ ଉଦ୍ଧାର କରାଯାଇଛି। ଡ୍ରୋନର ବଡ ଘଟଣା କ୍ରମାଗତ ଭାବେ ସାମ୍ନାକୁ ଆସୁଛି । ଡ୍ରୋନ୍କୁ ନଷ୍ଟ ପାଇଁ ସିଷ୍ଟମ ପ୍ରସ୍ତୁତ ରଖିବା ପାଇଁ କେନ୍ଦ୍ରୀୟ ଏଜେନ୍ସି ପଞ୍ଜାବ ପୋଲିସକୁ ଏକ ଆଲର୍ଟ ପଠାଇଥିଲା ।
