ଖେଳ ପଡ଼ିଆରୁ ଟେକିନେଲେ, ସ୍କୁଲ ପରିସରରେ ନାବାଳିକାକୁ ଗଣଦୁଷ୍କର୍ମ କଲେ

କର୍ଣ୍ଣାଟକ: ୮ ବର୍ଷର ଝିଅ ସହ ଗଣଦୁଷ୍କର୍ମ। ତାହା ପୁଣି ସରକାରୀ ସ୍କୁଲ ପରିସର ଭିତରେ। ଖେଳ ପଡିଆରେ ଖେଳୁଥିବା ବେଳେ ନାବାଳିକାକୁ ଟେକି ନେଇଥିଲେ ଦୁଷ୍କର୍ମକାରୀ। ପରେ ଗଣଦୁଷ୍କର୍ମ କରିଥିବା ଜଣାପଡିଛି।

ଘଟଣାଟି ଅବସ୍ୟ କର୍ଣ୍ଣାଟକରେ ଘଟିଛି। କିନ୍ତୁ ଏହି ଘଟଣା ସାମ୍ନାକୁ ଆସିବା ପରେ ଚାଞ୍ଚଲ୍ୟ ଖେଳିଯାଇଛି। କର୍ଣ୍ଣାଟକ ସରକାରଙ୍କ ଆଇନ ଶୃଙ୍ଖଳା ଉପରେ ମଧ୍ୟ ପ୍ରଶ୍ନ ଉଠାଇଛି ବିଜେପି। ଘଟଣାର ତଦନ୍ତ ଆରମ୍ଭ କରିଛି ପୋଲିସ।

ମାଙ୍କୁ ସମ୍ପୂର୍ଣ୍ଣ ଘଟଣା କହିଥିଲା ଝିଅ: ପୋଲିସର କହିବା କଥା ଜଣେ ଆଠ ବର୍ଷର ଝିଅକୁ ତିନି ଜଣ ଅଜ୍ଞାତ ବ୍ୟକ୍ତି ଗଣବଳାତ୍କାର କରିଥିବା ଅଭିଯୋଗ ହୋଇଛି। ଘଟଣାଟି ଜାନୁଆରୀ ୩୧ ତାରିଖରେ ଘଟିଥିଲା, କିନ୍ତୁ ରବିବାର, ଫେବୃଆରୀ ୨ ତାରିଖରେ ଏହା ସାମ୍ନାକୁ ଆସିଥିଲା।

ପୋଲିସର କହିବା ଅନୁଯାୟୀ, ଝିଅଟିର ପେଟରେ ଯନ୍ତ୍ରଣା ହେଉଥିଲା ଏବଂ ତାଙ୍କ ଗୁପ୍ତାଙ୍ଗରୁ ରକ୍ତସ୍ରାବ ହେଉଥିଲା। ଝିଅଟି ଘଟଣା ବିଷୟରେ ତାଙ୍କ ମାଆଙ୍କୁ ସବୁକିଛି କହିଥିଲା। ଯାହା ପରେ ଝିଅଟିର ମାଆଙ୍କ ଅଭିଯୋଗ ଆଧାରରେ ରବିବାର ତିନି ଜଣ ଅଜଣା ବ୍ୟକ୍ତିଙ୍କ ବିରୋଧରେ ଏଫଆଇଆର ରୁଜୁ ହୋଇଛି।

ଝିଅଟିର ଅପହରଣ କରିନେଲେ: ସୂଚନାଅନୁସାରେ, ଜାନୁଆରୀ ୩୧ ତାରିଖରେ ଯେତେବେଳେ ଝିଅଟି ତାଙ୍କ ଘର ପାଖରେ ଥିବା ଏକ ପଡ଼ିଆରେ ଖେଳୁଥିଲା, ତିନି ଜଣ ଅଜଣା ଲୋକ ତାଙ୍କୁ ପ୍ରଲୋଭିତ କରି ନିକଟସ୍ଥ ଏକ ସରକାରୀ ସ୍କୁଲକୁ ନେଇଯାଇ ଗଣଦୁଷ୍କର୍ମ କରିଥିଲେ।

ଅଭିଯୁକ୍ତମାନେ ଝିଅଟି ଉପରେ ଅତ୍ୟାଚାର କରିବା ପରେ ତାକୁ ହତ୍ୟା ଧମକ ଦେଇଥିଲେ। ଫଳରେ ଭୟଭୀତ ଝିଅଟି ଘରକୁ ପହଞ୍ଚିବା ପରେ ସେ ଚୁପ୍ ଥିଲା ଏବଂ ଭୟରେ ସେ ପରିବାରର କାହାକୁ ଏହି ଘଟଣା ବିଷୟରେ କହିନଥିଲା। କିନ୍ତୁ ଝିଅଟି ଏହି ସ୍କୁଲରେ ପଢେନାହିଁ ବୋଲି ସ୍ପଷ୍ଟ କରିଛି ପୋଲିସ।

ହସ୍ପିଟାଲରେ ଭର୍ତ୍ତି: ବର୍ତ୍ତମାନ ଝିଅଟିକୁ ଜିଲ୍ଲା ସରକାରୀ ଡାକ୍ତରଖାନାରେ ଭର୍ତ୍ତି କରାଯାଇଛି। ଶିଶୁ ବିକାଶ ବିଭାଗର ପରାମର୍ଶଦାତାଙ୍କ ଏକ ଦଳ ଆଜି ଝିଅ ଏବଂ ତାଙ୍କ ପରିବାରକୁ ଭେଟିବେ।

ଅଭିଯୁକ୍ତଙ୍କ ବିଷୟରେ ସୁରାକ ପାଇବା ପାଇଁ ପୋଲିସ ସ୍କୁଲ ଚାରିପାଖରେ ଲାଗିଥିବା ସିସିଟିଭି କ୍ୟାମେରା ଗୁଡ଼ିକୁ ସ୍କାନ କରୁଛି। ଏହା ସହିତ, ସ୍ୱତନ୍ତ୍ର ଦଳ ଗଠନ କରି ସମ୍ପୂର୍ଣ୍ଣ ମାମଲାର ତଦନ୍ତ କରାଯାଉଛି।