ଭରିଯିବ କେନ୍ଦ୍ରୀୟ କର୍ମଚାରୀଙ୍କ ପକେଟ! କ୍ୟାବିନେଟ ବୈଠକର ଏଜେଣ୍ଡାରେ ଅନ୍ତର୍ଭୁକ୍ତ ହେଲା ଏହି ଫାଇଲ
ନୂଆଦିଲ୍ଲୀ: ଜୁଲାଇ ୧ ରୁ କେନ୍ଦ୍ର ସରକାରଙ୍କ କର୍ମଚାରୀ ଏବଂ ପେନସନଭୋଗୀଙ୍କ ପାଇଁ ମାହଙ୍ଗା ଭତ୍ତା ‘ଡିଏ’ ଏବଂ ମହଙ୍ଗା ରିଲିଫ୍ ‘ଡିଆର’ ପାଇବା ପାଇଁ ରାସ୍ତା ପ୍ରସ୍ତୁତ କରାଯାଇଛି। ‘ଡିଏ/ ଡିଆର’ ର ଫାଇଲ କେନ୍ଦ୍ ର କ୍ୟାବିନେଟ ବୈଠକର ଏଜେଣ୍ଡା ଟେବୁଲରେ ପହଞ୍ଚିଛି। ସୂଚନାନୁସାରେ, ବର୍ତ୍ତମାନ ସେହି ଫାଇଲ କ୍ୟାବିନେଟ ଦ୍ୱାରା ଅନୁମୋଦନ ହୋଇନାହିଁ। ଏହାପୂର୍ବରୁ, ଯେତେବେଳେ ବି ସେହି ଫାଇଲ ଟେବୁଲରେ ପହଞ୍ଚିଛି, ‘ଡିଏ/ ଡିଆର’ ଘୋଷଣା କରାଯାଇଛି। ଏଥର ‘ଡିଏ/ ଡିଆର’ ଚାରି ରୁ ପାଞ୍ଚ ପ୍ରତିଶତ ବୃଦ୍ଧି ହୋଇପାରେ। ବର୍ତ୍ତମାନ ୩୪ ପ୍ରତିଶତ ହାରରେ ମହଙ୍ଗା ଭତ୍ତା ମିଳୁଛି।ଯଦି ୪ ପ୍ରତିଶତ ବୃଦ୍ଧି ହୁଏ, ତେବେ ‘ଡିଏ/ ଡିଆର’ ହାର ୩୮ ପ୍ରତିଶତରେ ପହଞ୍ଚିବ।
ଖୁଚୁରା ମୁଦ୍ରାସ୍ଫୀତିର ତଥ୍ୟ ଆଧାରରେ କେନ୍ଦ୍ର ସରକାର ବର୍ଷକୁ ଦୁଇଥର ଅର୍ଥାତ୍ ଜାନୁଆରୀ ଏବଂ ଜୁଲାଇରେ ଦୁଇଥର ‘ଡିଏ/ ଡିଆର’ହାରକୁ ସଂଶୋଧନ କରନ୍ତି। ଯଦି ଆମେ ଦେଶର ସାମ୍ପ୍ରତିକ ପରିସ୍ଥିତି ବିଷୟରେ ଆଲୋଚନା କରିବା, ତେବେ ମୁଦ୍ରାସ୍ଫୀତି ବୃଦ୍ଧି ପାଉଛି। ମୁଦ୍ରାସ୍ଫୀତି ସ୍ତର ‘ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ’ର ଆକଳନଠାରୁ ଅଧିକ ପହଞ୍ଚିଛି। ଜୁନ୍ ମାସରେ ଖୁଚୁରା ମୁଦ୍ରାସ୍ଫୀତି ୭ ପ୍ରତିଶତରୁ ଅଧିକ ହୋଇଛି। ଚଳିତ ବର୍ଷ ଜାନୁଆରୀରୁ ‘ଡିଏ/ ଡିଆର’ ରେ ତିନି ପ୍ରତିଶତ ବୃଦ୍ଧି ଘଟିଛି। ଫଳସ୍ୱରୂପ, ‘ଡିଏ/ ଡିଆର’ ହାର ୩୪ ପ୍ରତିଶତରେ ପହଞ୍ଚିଛି। ବର୍ତ୍ତମାନ ଜୁଲାଇ ୧ ରୁ ମହଙ୍ଗା ଭତ୍ତା ୪-୫ ପ୍ରତିଶତ ବୃଦ୍ଧି ସ୍ଥିର ହୋଇଛି ବୋଲି ଜଣାପଡିଛି। କେନ୍ଦ୍ର ସରକାରଙ୍କ ଦ୍ୱାରା ‘ଡିଏ/ ଡିଆର’ ବୃଦ୍ଧି ହେବା ପରେ ସମସ୍ତ ରାଜ୍ୟ ସରକାର ମଧ୍ୟ ନିଜ ନିଜ କର୍ମଚାରୀଙ୍କୁ ଏହି ସୁବିଧା ପ୍ରଦାନ କରିଥାନ୍ତି। ମହଙ୍ଗା ଭର୍ତ୍ତା ବୃଦ୍ଧି ପାଇଲେ ପ୍ରାୟ ୪୭ ଲକ୍ଷ କେନ୍ଦ୍ରୀୟ କର୍ମଚାରୀ ଏବଂ ୬୩ ଲକ୍ଷ ପେନସନଭୋଗୀ ଉପକୃତ ହେବେ।