ଉତ୍ତରାଖଣ୍ଡରେ ପ୍ରସ୍ତୁତ UCC ଡ୍ରାଫ୍ଟ; ଚୂଡ଼ାନ୍ତ ସ୍ପର୍ଶ ପରେ ଖୁବଶୀଘ୍ର ମୁଖ୍ୟମନ୍ତ୍ରୀଙ୍କୁ ଦିଆଯିବ ରିପୋର୍ଟ

ନୂଆଦିଲ୍ଲୀ: ଉତ୍ତରାଖଣ୍ଡରେ ୟୁନିଫର୍ମ ସିଭିଲ କୋଡ୍ (ୟୁସିସି) ଲାଗୁ କରିବା ଦିଗରେ ଏକ ବଡ଼ ପଦକ୍ଷେପ ନିଆଯାଇଛି। ରାଜ୍ୟ ସରକାରଙ୍କ ଦ୍ୱାରା ଗଠିତ ୟୁସିସି କମିଟି ଏହାର ଚୂଡ଼ାନ୍ତ ରିପୋର୍ଟ ପ୍ରସ୍ତୁତ କରି ଖୁବଶୀଘ୍ର ସରକାରଙ୍କୁ ପ୍ରଦାନ କରିବ। ଉତ୍ତରାଖଣ୍ଡରେ ୟୁନିଫର୍ମ ସିଭିଲ କୋଡ୍ ଲାଗୁ କରିବା ପାଇଁ ପ୍ରସ୍ତୁତ ସୁପାରିସର ଏକ ଡ୍ରାଫ୍ଟ ହେଉଛି ଏହି ରିପୋର୍ଟ, ଯେଉଁଥିରେ ବିବାହ, ଛାଡ଼ପତ୍ର, ଉତ୍ତରାଧିକାରୀ ଏବଂ ପୋଷ୍ୟ ସନ୍ତାନ ଗ୍ରହଣ ଭଳି ବ୍ୟକ୍ତିଗତ ଆଇନକୁ ସମାନ ଭାବରେ ପ୍ରୟୋଗ କରିବାର ବ୍ୟବସ୍ଥା ରହିଛି।

ୟୁସିସିର ମୁଖ୍ୟ ଉଦ୍ଦେଶ୍ୟ ହେଉଛି ସମସ୍ତ ନାଗରିକଙ୍କ ପାଇଁ ଏକ ସମାନ ନାଗରିକ ଆଇନ ଲାଗୁ କରିବା, ଯାହା ଧର୍ମ, ଜାତି କିମ୍ବା ସମ୍ପ୍ରଦାୟ ନିର୍ବିଶେଷରେ ସମସ୍ତଙ୍କ ପାଇଁ ସମାନ ଭାବରେ ଲାଗୁ ହେବ। ବର୍ତମାନ ଭାରତରେ ବିବାହ, ଛାଡ଼ପତ୍ର, ପୋଷ୍ୟ ସନ୍ତାନ ଗ୍ରହଣ ଏବଂ ସମ୍ପତ୍ତି ସମ୍ବନ୍ଧୀୟ ମାମଲାଗୁଡିକର ମୁକାବିଲା ପାଇଁ ବିଭିନ୍ନ ଧାର୍ମିକ ଏବଂ ସାମାଜିକ ଗୋଷ୍ଠୀଙ୍କ ପାଇଁ ଅଲଗା ଅଲଗା ବ୍ୟକ୍ତିଗତ ଆଇନ ରହିଛି। ଏହି ଆଇନଗୁଡ଼ିକର ବିବିଧତା ଅନେକ ଜଟିଳତା ସୃଷ୍ଟି କରିଥାଏ, ଯାହାକୁ ୟୁସିସି ଉଚ୍ଛେଦ କରିବାକୁ ଚେଷ୍ଟା କରୁଛି।

ରାଜ୍ୟର ସମସ୍ତ ନାଗରିକଙ୍କୁ ସମାନ ଅଧିକାର ଓ ଆଇନଗତ ସୁରକ୍ଷା ଦେବା ଉଦ୍ଦେଶ୍ୟରେ କମିଟି ଆଇନରେ ସଂଶୋଧନ କରି ନୂଆ ବ୍ୟବସ୍ଥା ଯୋଡ଼ିଛି। ମୁଖ୍ୟତଃ ଦେଖିବାକୁ ମିଳିଛି ଯେ କୌଣସି ସମ୍ପ୍ରଦାୟ କିମ୍ବା ବର୍ଗର ଅଧିକାରଉଲ୍ଲଂଘନ ହେବା ଉଚିତ ନୁହେଁ ଏବଂ ସମସ୍ତଙ୍କୁ ସମାନ ନ୍ୟାୟ ମିଳିବା ଉଚିତ୍। ପୂର୍ବତନ ମୁଖ୍ୟ ଶାସନ ସଚିବ ଶତ୍ରୁଘ୍ନ ସିଂହଙ୍କ ଅଧ୍ୟକ୍ଷତାରେ ଆଜି ରାଜ୍ୟ ଅତିଥି ଭବନର ସଭାଗୃହରେ ୟୁସିସି କମିଟିର ଶେଷ ବୈଠକ ଅନୁଷ୍ଠିତ ହୋଇଥିଲା। ଏହି ରିପୋର୍ଟ ପ୍ରସ୍ତୁତ କରିବା ସମୟରେ ଆମେ ସମସ୍ତ ଆଇନଗତ ଓ ସାମାଜିକ ଦିଗ ପ୍ରତି ଧ୍ୟାନ ଦେଇଛୁ।

ବିବାହ, ଛାଡ଼ପତ୍ର, ପୋଷ୍ୟ ସନ୍ତାନ ଗ୍ରହଣ ଓ ଉତ୍ତରାଧିକାରୀ ଭଳି ପ୍ରସଙ୍ଗ ବିଶେଷ ଭାବେ କେନ୍ଦ୍ରୀଭୂତ ହୋଇଛି। ଖୁବଶୀଘ୍ର ସରକାରଙ୍କୁ ରିପୋର୍ଟ ପ୍ରଦାନ କରାଯିବ। ଏହି କମିଟି ଗତ କିଛି ମାସ ଧରି ୟୁସିସିର ଡ୍ରାଫ୍ଟ ଉପରେ କାର୍ଯ୍ୟ କରୁଛି ଏବଂ ଏହି ସମୟରେ ରାଜ୍ୟର ବିଭିନ୍ନ ସଂଗଠନ, ଧାର୍ମିକ ଏବଂ ସାମାଜିକ ଗୋଷ୍ଠୀଙ୍କ ସହ ଆଲୋଚନା କରାଯାଇ ଏକ ଅନ୍ତର୍ଭୁକ୍ତ ଏବଂ ସନ୍ତୁଳିତ ଆଇନ ପ୍ରସ୍ତୁତ କରାଯାଇଥିଲା।