୧୦ରୁ ଟିକାକରଣ ଆରମ୍ଭ, ଘରୋଇ ମେଡିକାଲରେ ଦିଆଯିବ ବୁଷ୍ଟର ଡୋଜ୍
ଭୁବନେଶ୍ୱର, (ଭାସ୍କର ନ୍ୟୁଜ୍): ଆସନ୍ତା ୧୦ ତାରିଖ ରବିବାରଠାରୁ ଆରମ୍ଭ ହେବ ଟିକାକରଣ ପ୍ରକ୍ରିୟା । ସାଧାରଣ ଲୋକ ନେବେ କୋଭିଡ୍ ବୁଷ୍ଟର ଡୋଜ୍ । ୧୮ ବର୍ଷରୁ ଅଧିକ ବୟସ୍କ ବ୍ୟକ୍ତିଙ୍କୁ ଦିଆଯିବ ଏହି ଡୋଜ୍ । ଦୁଇଟିଯାକ ଡୋଜ୍ ନେଇଥିବା ବ୍ୟକ୍ତି ଘରୋଇ ହସ୍ପିଟାଲରେ ବୁଷ୍ଟର ଡୋଜ୍ ନେଇପାରିବେ । ସରକାରୀ ମେଡିକାଲରେ ମଧ୍ୟ ଦୁଇଟି ଯାକ ଟିକା ନେଇଥିବା ବ୍ୟକ୍ତି ଘରୋଇ ହସପିଟାଲରେ ବୁଷ୍ଟର ଡୋଜ୍ ନେଇପାରିବେ । କୋଭିଡ୍ର ଦୁଇଟିଯାକ ଡୋଜ୍ ନେବାର ୯ ମାସ ପରେ ବୁଷ୍ଟର ଡୋଜ୍ ନେଇପାରିବେ ।
ମିଳିଥିବା ସୂଚନା ମୁତାବକ ଦେଶରେ ୧୫ ବର୍ଷରୁ ଅଧିକ ବୟସ୍କ ପିଲା ଗୋଟିଏ ଟିକା ନେଇଥିବା ସଂଖ୍ୟା ୯୬ ପ୍ରତିଶତ ରହିଛି । ସେହି ରି ଡବଲ ଡୋଜ୍ ନେଇଥିବା ଲୋକଙ୍କ ସଂଖ୍ୟା ୮୩ ପ୍ରତିଶତ । ବର୍ତ୍ତମାନ ସୁଦ୍ଧା ୨.୪ କୋଟିରୁ ଅଧିକ ବୁଷ୍ଟର ଡୋଜ୍ ସ୍ୱାସ୍ଥ୍ୟକର୍ମୀ ଓ ୬୦ରୁ ଅଧିକ ବୟସ୍କ ଲୋକଙ୍କୁ ଦିଆଯାଇଛି । ଅନ୍ୟପଟେ ୧୨ରୁ ୧୪ ବର୍ଷ ବୟସର ୪୫ ପ୍ରତିଶତ ପିଲା ଟିକା ନେଇସାରିଛନ୍ତି । ଏହି ଡୋଜ୍ ନେବା ପାଇଁ ଉପଭୋକ୍ତାଙ୍କୁ ୬୦୦ ଟଙ୍କା ଦେବାକୁ ପଡ଼ିବ । ଏ ନେଇ ଟିକା ପ୍ରସ୍ତୁତକାରୀ କମ୍ପାନୀ ସେରମ ଇନଷ୍ଟିଚ୍ୟୁଟ୍ ପକ୍ଷରୁ ସୂଚନା ଦିଆଯାଇଛି । ତେବେ ଘରୋଇ ହସ୍ପିଟାଲଗୁଡ଼ିକୁ ରିହାତି ଦରରେ ଏହି ଟିକା ଯୋଗାଇ ଦିଆଯିବ ବୋଲି ସେରମ ପକ୍ଷରୁ କୁହାଯାଇଛି ।
