Video: ‘ଆମେ ପହଞ୍ଚିଗଲୁ, ଭାରତ ତୁମେ ପ୍ରସ୍ତୁତ କି?’, ଫାଇନାଲରେ ପହଞ୍ଚିବା ପରେ ଚ୍ୟାଲେଞ୍ଜ ଦେଲେ ଶୋଏବ ଅଖତର
ବୋଲରଙ୍କ ଚମତ୍କାର ପ୍ରଦର୍ଶନ ପରେ ନିଜର ଧମାକାଦାର ପ୍ରଦର୍ଶନ ସହିତ ନିଜର ଫର୍ମକୁ ଫେରିଥିବା ବାବର ଆଜାମ ଏବଂ ମହମ୍ମଦ ରିଜୱାନ୍ ଙ୍କ ଅର୍ଦ୍ଧଶତକ ବଳରେ ପାକିସ୍ତାନ ନ୍ୟୁଜିଲାଣ୍ଡକୁ ହରାଇ ଟି-୨୦ ବିଶ୍ୱକପ ଫାଇନାଲରେ ପହଞ୍ଚିଛି । ରବିବାର ହେବାକୁ ଥିବା ଫାଇନାଲରେ ପାକିସ୍ତାନର ମୁକାବିଲା ଭାରତ ଏବଂ ଇଂଲଣ୍ଡ ମଧ୍ୟରେ ଦ୍ୱିତୀୟ ସେମିଫାଇନାଲ ବିଜେତା ସହିତ ହେବ। ଗ୍ରୁପ୍ ପର୍ଯ୍ୟାୟରେ ଚମତ୍କାର ପ୍ରଦର୍ଶନ କରିଥିବା ନ୍ୟୁଜିଲାଣ୍ଡ ନକଆଉଟ୍ରେ ପାକିସ୍ତାନଠାରୁ ପରାଜୟ ବରଣ କରିଛି । ନ୍ୟୁଜିଲାଣ୍ଡ ପ୍ରଥମେ ବ୍ୟାଟିଂ କରି ୧୫୩ ଲକ୍ଷ୍ୟ ଧାର୍ଯ୍ୟ କରିଥିଲା । ଯାହାକୁ ପାକିସ୍ତାନ ମାତ୍ର ୩ ଉଇକେଟ୍ ହରାଇ ହାସଲ କରି ନେଇଥିଲା ।
ତେବେ ଆଜିର ବିଜୟ ପରେ ପାକିସ୍ତାନର ପୂର୍ବତନ ଦ୍ରୁତ ବୋଲର ଶୋଏବ ଅଖତର ତାଙ୍କ ୟୁଟ୍ୟୁବ ଚ୍ୟାନେଲରେ ଏକ ଭିଡିଓ ପୋଷ୍ଟ କରି ତାଙ୍କ ଦଳକୁ ଅଭିନନ୍ଦନ ଜଣାଇବା ସହ ରୋହିତ ଶର୍ମାଙ୍କ ଭାରତୀୟ ଦଳକୁ ଫାଇନାଲରେ ଭେଟିବାକୁ ଚ୍ୟାଲେଞ୍ଜ କରିଛନ୍ତି। ସେ ଶେଷରେ କହିଥିଲେ, ‘ଆମେ ପହଞ୍ଚିଗଲୁ, ଭାରତ ତୁମେ ପ୍ରସ୍ତୁତ କି? ମେଲବର୍ଣ୍ଣରେ ୯୨ ର ଇତିହାସ ବୋଧହୁଏ ପୁନରାବୃତ୍ତି ହେବ । ବୋଧହୁଏ ଇଂଲଣ୍ଡ ପୁଣି ଥରେ ପରାସ୍ତ ହେବ। କିନ୍ତୁ ମୁଁ ଫାଇନାଲରେ ଭାରତ ଚାହୁଁଛି ବୋଲି ସେ କହିଛନ୍ତି।
Dear India, good luck for tomorrow. We'll be waiting for you in Melbourne for a great game of cricket. pic.twitter.com/SdBLVYD6vm
— Shoaib Akhtar (@shoaib100mph) November 9, 2022
ଗ୍ରୁପ୍ ପର୍ଯ୍ୟାୟରେ ଦୁର୍ବଳ ପ୍ରଦର୍ଶନ ପରେ ଭାଗ୍ୟର ସାହାଯ୍ୟରେ ସେମିଫାଇନାଲରେ ପ୍ରବେଶ କରିଥିବା ପାକିସ୍ତାନୀ ଦଳର ମନୋଭାବ ଆଜି ସମ୍ପୂର୍ଣ୍ଣ ରୂପେ ବଦଳି ଯାଇଥିଲା। ବୋଲରମାନେ ଶୃଙ୍ଖଳିତ ପ୍ରଦର୍ଶନ କରିଥିବା ବେଳେ ଏବଂ ଫିଲ୍ଡିଂ ମଧ୍ୟ ବହୁତ ସକ୍ରିୟ ଥିଲା। ଅଧିନାୟକ ବାବର ଏବଂ ଓପନର୍ ରିଜୱାନ୍ ପ୍ରଥମ ୱିକେଟ୍ ପାଇଁ ୭୬ ବଲରେ ୧୦୫ ରନ୍ ଯୋଡି ପାକିସ୍ତାନ ପାଇଁ ଏକ ଭଲ ଆରମ୍ଭ କରିଥିଲେ।
ନିଜର ଖରାପ ଫର୍ମ ପାଇଁ ସମାଲୋଚିତ ହେଉଥିବା ବାବର ୪୨ ଟି ବଲରେ ସାତ ଚୌକା ସହ ୫୩ ରନ୍ ସଂଗ୍ରହ କରିଥିବାବେଳେ ରିଜୱାନ୍ ୪୩ ଟି ବଲରେ ୫୭ ରନ୍ ସଂଗ୍ରହ କରି ପାଞ୍ଚଟି ଚୌକା ସହ କରିଥିଲେ। ମହମ୍ମଦ ହରିସ୍ ୨୬ ବଲରେ ୩୦ ରନ୍ ସଂଗ୍ରହ କରିଥିଲେ। ତେବେ ନ୍ୟୁଜିଲାଣ୍ଡର ଖରାପ ଫିଲ୍ଡିଂ ପାକିସ୍ତାନର ବିଜୟ ପଥକୁ ସହଜ କରିଥିଲା। କିୱି ଖେଳାଳିମାନେ କେବଳ କ୍ୟାଚ୍ ଛାଡି ନାହାଁନ୍ତି ଫିଲ୍ଡିଂରେ ମଧ୍ୟ ଅନେକ ରନ୍ ଦେଇଥିଲେ।
