ଏୟାରପୋର୍ଟରେ ପଶିଲା ପାଣି, ଟ୍ରାକ୍ଟରରେ ଟର୍ମିନାଲ ପର୍ଯ୍ୟନ୍ତ ଗଲେ ଯାତ୍ରୀ

ମଙ୍ଗଳବାର ବେଙ୍ଗାଲୁରୁରେ ପ୍ରବଳ ବର୍ଷା ହେତୁ ବିମାନବନ୍ଦର ସମେତ ସହରର ଅନେକ ରାସ୍ତା ପାଣିରେ ବୁଡ଼ି ଯାଇଥିଲା । ବେଙ୍ଗାଲୁରୁର କାମ୍ପାଗୋଡା ଅନ୍ତର୍ଜାତୀୟ ବିମାନବନ୍ଦରରେ ଆଣ୍ଠୁଏ ଉଚ୍ଚର ପାଣି ଜମିଥିଲା । ଯେଉଁଥିପାଇଁ ଯାତ୍ରୀମାନଙ୍କୁ ଅସୁବିଧାର ସମ୍ମୁଖୀନ ହେବାକୁ ମଧ୍ୟ ପଡ଼ିଥିଲା । ଏହି ସମୟରେ ବିମାନବନ୍ଦରର ଏକ ଭିଡିଓ ସାମ୍ନାକୁ ଆସିଥିଲା। ଯେଉଁଥିରେ ଲୋକମାନେ ବିମାନବନ୍ଦର ଟର୍ମିନାଲରେ ପହଞ୍ଚିବା ପାଇଁ ଟ୍ରାକ୍ଟର ବ୍ୟବହାର କରୁଥିବାର ଦେଖାଦେଇଥିଲା ।

ପ୍ରବଳ ବର୍ଷା ପରେ ପରିସ୍ଥିତି ଏପରି ହୋଇଛି ଯେ ଅନେକ କାର ମଧ୍ୟ ପାଣିରେ ଅଟକି ଯାଇଛନ୍ତି । ଯାହା ପରେ ଟର୍ମିନାଲ୍ ପର୍ଯ୍ୟନ୍ତ ଆସିପାରିନଥିଲେ ଯାତ୍ରୀ । ଏଭଳି ପରିସ୍ଥିତିରେ ଲୋକମାନେ ଦେଶୀ ଉପାୟ ଆପଣାଇଥିଲେ । ଆଉ ପାଣି ପାର ହୋଇ ଟର୍ମିନାଲରେ ପହଞ୍ଚିବାକୁ ଟ୍ରାକ୍ଟର ବ୍ୟବହାର କରିଥିଲେ ଲୋକେ ।

ବିମାନ ବନ୍ଦର ରାସ୍ତାରେ ପାଣି ଭରିବା ପରେ ଯାତ୍ରୀମାନେ ସମ୍ମୁଖୀନ ହେଉଥିବା ସମସ୍ୟାର ଏହି ଭିଡିଓ ସୋସିଆଲ ମିଡିଆରେ ମଧ୍ୟ ଭାଇରାଲ ହେବାରେ ଲାଗିଛି । ଭିଡିଓରେ ଟ୍ରାକ୍ଟରରେ ଯାତ୍ରୀମାନେ ଟର୍ମିନାଲକୁ ଯାଉଛନ୍ତି । ଯାତ୍ରୀମାନଙ୍କ ମଧ୍ୟରେ ଅନେକ ମହିଳା ଅଛନ୍ତି, ଯେଉଁମାନେ ଟ୍ରାକ୍ଟରରେ ଟର୍ମିନାଲରୁ ଫେରୁଥିବାର ନଜର ଆସିଛନ୍ତି ।