ହ୍ୱାଟ୍ସଆପରେ ଭୟଙ୍କର ସ୍କାମ, ଫଟୋ-ଭିଡିଓ ଡାଉନଲୋଡ କରିବା ମାତ୍ରେ ଖାଲି ହୋଇଯାଉଛି ଆକାଉଣ୍ଟ

ନୂଆଦିଲ୍ଲୀ: DoT ଏକ ନୂତନ ପ୍ରକାରର ଠକେଇ ପ୍ରତି ସତର୍କ ରହିବାକୁ ଯୁଜର୍ସଙ୍କୁ କହିଛି। ଟେଲିକମ୍ ନିୟାମକ ହ୍ୱାଟ୍ସଆପ୍, ଟେଲିଗ୍ରାମ ଭଳି ଇନଷ୍ଟାଣ୍ଟ ମେସେଜିଂ ଆପ୍ସରୁ ଫଟୋ, ଭିଡିଓ ଇତ୍ୟାଦି ଡାଉନଲୋଡ୍ କରିବାକୁ ମଧ୍ୟ ନିଷେଧ କରିଛି।

ଆଜିକାଲି, ହ୍ୟାକର୍ସମାନେ ଫଟୋ ଏବଂ ଭିଡିଓ ମାଧ୍ୟମରେ ୟୁଜର୍ସଙ୍କ ଫୋନକୁ ବିପଦଜନକ ମାଲୱେର ଅର୍ଥାତ୍ ଭାଇରସ ପଠାଉଛନ୍ତି, ଯାହା ସେମାନଙ୍କ ବ୍ୟାଙ୍କ ଆକାଉଣ୍ଟ ବିବରଣୀ ଚୋରି କରିନେଉଛି।

ଭୟଙ୍କର ଠକେଇ: ଆଜିକାଲି ଯୁଜର୍ସଙ୍କ ପାଇଁ ସ୍ମାର୍ଟଫୋନ୍ ଏକ ଆବଶ୍ୟକତା ପାଲଟିଛି। ଉପଭୋକ୍ତାମାନେ କେବଳ କଲ୍ କରିବା ପାଇଁ ସେମାନଙ୍କର ଫୋନ୍ ବ୍ୟବହାର କରୁନାହାନ୍ତି, ବରଂ ଏହା ମାଧ୍ୟମରେ UPI କାରବାର, ବ୍ୟାଙ୍କ ଇତ୍ୟାଦି ମଧ୍ୟ ଆକ୍ସେସ୍ କରୁଛନ୍ତି।

ଏପରି ପରିସ୍ଥିତିରେ, ଯଦି କେହି ଆପଣଙ୍କ ଫୋନର ଆକ୍ସେସ୍ ପାଆନ୍ତି, ତେବେ ଆପଣଙ୍କ ବ୍ୟାଙ୍କ ଆକାଉଣ୍ଟ ହ୍ୟାକ୍ ହୋଇପାରେ। ଠକମାନେ ସର୍ବଦା ନୂଆ ଉପାୟ ଅବଲମ୍ବନ କରି ଲୋକଙ୍କୁ ଠକିବାକୁ ଚେଷ୍ଟା କରୁଛନ୍ତି। ଏହି ପ୍ରକାରର ଠକେଇକୁ ଷ୍ଟେଗାନୋଗ୍ରାଫି କୁହାଯାଉଛି।

ଏହି ନୂତନ ଠକେଇ ବିଷୟରେ ସୂଚନା ଦେଇ ଦୂରସଂଚାର ବିଭାଗ ଏହାର ଅଫିସିଆଲ୍ X ହ୍ୟାଣ୍ଡେଲ ମାଧ୍ୟମରେ କହିଛି ଯେ, ଠକମାନେ ହ୍ୱାଟ୍ସଆପ୍, ଟେଲିଗ୍ରାମ, ଫେସବୁକ୍ ମେସେଞ୍ଜର, ଇନଷ୍ଟାଗ୍ରାମ ଭଳି ସୋସିଆଲ ମିଡିଆ ପ୍ଲାଟଫର୍ମ ବ୍ୟବହାର କରି ନିମନ୍ତ୍ରଣ କିମ୍ବା ଅଫର ଇତ୍ୟାଦି ନାମରେ ଆପଣଙ୍କୁ ଫଟୋ କିମ୍ବା ଭିଡିଓ ସେୟାର କରୁଛନ୍ତି।

ବ୍ୟବହାରକାରୀମାନେ ନୂତନ ଅଫର ପାଇଁ ସେହି ଫଟୋ କିମ୍ବା ଭିଡିଓଗୁଡ଼ିକୁ ସେମାନଙ୍କ ଫୋନରେ ଡାଉନଲୋଡ୍ ଯଦି କରନ୍ତି, ତେବେ ଠକମାନେ ବ୍ୟବହାରକାରୀଙ୍କ ଫୋନରେ ବିପଦଜନକ ଭାଇରସ ପ୍ରବେଶ କରାଇ ସେମାନଙ୍କ ଫୋନରେ ପ୍ରବେଶ କରନ୍ତି।

ଫଟୋ ଏବଂ ଭିଡିଓ ମାଧ୍ୟମରେ ଫୋନ୍ ହ୍ୟାକିଂ: ହ୍ୱାଟ୍ସଆପ୍, ଇନଷ୍ଟାଗ୍ରାମ୍ ଭଳି ଆପ୍ ମାଧ୍ୟମରେ ଫଟୋ ଏବଂ ଭିଡିଓଗୁଡ଼ିକ ଫୋନରେ ସ୍ୱୟଂଚାଳିତ ଭାବରେ ଡାଉନଲୋଡ୍ ହୋଇଯାଏ, ଏହା ୟୁଜର୍ସ ଜାଣିପାରନ୍ତି ନାହିଁ।

ଏପରି ବ୍ୟବହାରକାରୀଙ୍କୁ ଏହି ଆପ୍ସର ସେଟିଂସକୁ ଯାଇ ସ୍ୱୟଂଚାଳିତ ଭାବରେ ଫଟୋ ଏବଂ ଭିଡିଓ ଡାଉନଲୋଡ୍ କରିବାର ବିକଳ୍ପକୁ ବନ୍ଦ କରିବାକୁ ପଡିବ। ଏହା ଦ୍ୱାରା ବ୍ୟବହାରକାରୀମାନେ ଦୁଇ ପ୍ରକାରର ଲାଭ ପାଇବେ। ପ୍ରଥମତଃ, ସେମାନଙ୍କ ଫୋନ୍‌ର ଡାଟା ଶୀଘ୍ର ସରିଯିବ ନାହିଁ ଏବଂ ଦ୍ୱିତୀୟତଃ, ଏପରି ଠକେଇକୁ ଏଡ଼ାଇ ଦିଆଯାଇପାରିବ।