ମଦ ପିଇବା ପାଇଁ ୧୦୦ ଟଙ୍କା ମାଗିଥିଲେ ସ୍ୱାମୀ, ପେଟ୍ରୋଲ ଢ଼ାଳି ନିଆଁ ଲଗାଇ ଦେଲେ ପତ୍ନୀ; ଅବସ୍ଥା ଗୁରୁତର

ନୂଆଦିଲ୍ଲୀ: ମଧ୍ୟପ୍ରଦେଶର ଅନୁପପୁର ଜିଲ୍ଲାରୁ ଏକ ଅଜବ ମାମଲା ସାମ୍ନାକୁ ଆସିଛି । ଏଠାରେ ଜଣେ ସ୍ୱାମୀ ୧୦୦ ଟଙ୍କା ମାଗିବାରୁ ତାଙ୍କ ପତ୍ନୀ ଏତେ ରାଗି ଯାଇଥିଲେ ଯେ ସେ ତାଙ୍କ ଉପରେ ପେଟ୍ରୋଲ ଢ଼ାଳି ନିଆଁ ଲଗାଇ ଦେଇଥିଲେ । ସ୍ୱାମୀଙ୍କୁ ନିଆଁ ଲଗାଇବା ପରେ ନିଜେ ପତ୍ନୀ ହିଁ ଜଳିଯାଇଥିବା ସ୍ୱାମୀଙ୍କୁ ଡାକ୍ତରଖାନା ନେଇଥିଲେ । ସ୍ୱାମୀ ଅନୁପପୁର ଜିଲ୍ଲା ଡାକ୍ତରଖାନାରେ ଚିକିତ୍ସିତ ହେଉଛନ୍ତି । ସ୍ୱାମୀ ତାଙ୍କ ପତ୍ନୀଙ୍କୁ ଏହି ଘଟଣାରୁ ରକ୍ଷା କରିବାକୁ ଦାବି କରୁଛନ୍ତି ଯାହା ଦ୍ୱାରା ତାଙ୍କ ପତ୍ନୀଙ୍କ ଉପରକୁ କୌଣସି ଅସୁବିଧା ଆସିବ ନାହିଁ ଏବଂ ସେ କୌଣସି ଆଇନଗତ କାର୍ଯ୍ୟରେ ଫସିବେ ନାହିଁ ।

ତେବେ ଏହି ମାମଲାଟି ଅନୁପପୁର ଜିଲ୍ଲାର କୋଟମା ପୋଲିସ ଷ୍ଟେସନ ଅଞ୍ଚଳର ବୋଲି ଜଣାପଡିଛି । ୩୨ ବର୍ଷୀୟ ଅଙ୍ଗଦ ପ୍ରସାଦ ଚୌଧୁରୀ ମନମାରୀର ବାସିନ୍ଦା । ସେ ଏସଇସିଏଲ କୋଇଲା ଖଣିରେ ଶ୍ରମିକ ଭାବରେ କାର୍ଯ୍ୟ କରନ୍ତି । ଯେତେବେଳେ ସେ ତାଙ୍କ ପତ୍ନୀଙ୍କୁ ୧୦୦ ଟଙ୍କା ମାଗିଥିଲେ, ପତ୍ନୀ ଭାବିଲେ ଯେ ତାଙ୍କ ସ୍ୱାମୀ ପୁଣି ମଦ୍ୟପାନ କରିବା ପାଇଁ ଟଙ୍କା ମାଗୁଛନ୍ତି । ସ୍ୱାମୀ ଟଙ୍କା ମାଗିବା ମାତ୍ରେ ପତ୍ନୀ ରାଗି ଯାଇଥିଲେ ଏବଂ ତାଙ୍କୁ ଟଙ୍କା ଦେବା ବଦଳରେ ସେ ତାଙ୍କୁ ଏପରି ଦଣ୍ଡ ଦେଇଥିଲେ ଯେ ସ୍ୱାମୀ ବାର୍ ବଦଳରେ ଡାକ୍ତରଖାନା ଯାଇଥିଲେ । ପତ୍ନୀ ସ୍ୱାମୀଙ୍କ ଉପରେ ପେଟ୍ରୋଲ ଢ଼ାଳି ପୋଡି ଦେଇଥିଲେ, ଯାହା ଫଳରେ ଅଙ୍ଗଦ ପ୍ରସାଦ ଅତ୍ୟଧିକ ଜଳି ଯାଇଥିଲେ । ତାଙ୍କୁ ଜିଲ୍ଲା ହସ୍ପିଟାଲ ଅନୁପପୁରରେ ଚିକିତ୍ସା କରାଯାଉଛି ।

ପତ୍ନୀ ଅଭିଯୋଗ କରିଛନ୍ତି- ‘ସ୍ୱାମୀ ନିଜେ ପେଟ୍ରୋଲ ଢ଼ାଳି ନିଆଁ ଲଗାଇଥିଲେ’
ଅନ୍ୟପଟେ ପତ୍ନୀ ଅଙ୍ଗଦ ପ୍ରସାଦଙ୍କ ବିରୋଧରେ ଅଭିଯୋଗ କରିଛନ୍ତି ଯେ, ତାଙ୍କ ସ୍ୱାମୀ ସବୁବେଳେ ନିଶାରେ ଥାନ୍ତି । ସେ ମଦ ପିଇବାକୁ ୧୦୦ ଟଙ୍କା ମାଗୁ ଥିଲେ । ଯେତେବେଳେ ମୁଁ ୧୦୦ ଟଙ୍କା ଦେବାକୁ ମନା କରିଥିଲି, ସେ ନିଜ ଦେହରେ ପେଟ୍ରୋଲ ଢ଼ାଳି ନିଆଁ ଲଗାଇ ଦେଇଥିଲେ ।