ବାଂଲାଦେଶ ଫେରିଯିବେ କି ହାସିନା? ବିଦେଶ ମନ୍ତ୍ରଣାଳୟ ଦେଲା ଏହି ଉତ୍ତର…
ନୂଆଦିଲ୍ଲୀ,୪ା୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ବାଂଲାଦେଶର ମୁଖ୍ୟ ପରାମର୍ଶଦାତା ଡକ୍ଟର ମହମ୍ମଦ ୟୁନୁସ୍ ଶୁକ୍ରବାର ଥାଇଲାଣ୍ଡର ରାଜଧାନୀ ବ୍ୟାଙ୍କକରେ ସାକ୍ଷାତ କରିଥିଲେ। ଗତବର୍ଷ ପଡ଼ୋଶୀ ଦେଶରେ ହୋଇଥିବା ବିଦ୍ରୋହ ପରେ ପ୍ରଧାନମନ୍ତ୍ରୀ ମୋଦୀ ଏବଂ ମହମ୍ମଦ ୟୁନୁସ ପ୍ରଥମ ଥର ପାଇଁ ସାକ୍ଷାତ କରିଛନ୍ତି। ଏହି ବୈଠକ ପ୍ରାୟ ୪0 ମିନିଟ୍ ଧରି ଚାଲିଥିଲ। ଏହି ଦୁଇ ନେତାଙ୍କ ସାକ୍ଷାତ ପରେ ଶେଖ୍ ହାସିନାଙ୍କୁ ନେଇ ଅନେକ ପ୍ରଶ୍ନ ଉଠିଛି । ଏହି ସମୟରେ, ବୈଦେଶିକ ମନ୍ତ୍ରଣାଳୟ କହିଛି ଯେ, ଦୁହେଁ ଶେଖ ହସିନାଙ୍କ ପ୍ରତ୍ୟର୍ପଣ, ସଂଖ୍ୟାଲଘୁଙ୍କ ପ୍ରସଙ୍ଗ ଏବଂ ବାଂଲାଦେଶ ନିର୍ବାଚନ ବିଷୟରେ ଆଲୋଚନା କରିଥିଲେ।
ବୈଦେଶିକ ମନ୍ତ୍ରଣାଳୟ ସଚିବ ବିକ୍ରମ ମିଶ୍ର କହିଛନ୍ତି, ଶେଖ ହାସିନାଙ୍କ ସମ୍ପର୍କରେ ବାଂଲାଦେଶରୁ ମିଳିଥିବା ଅନୁରୋଧ ସମ୍ପର୍କରେ ଆଲୋଚନା ହୋଇଛି। ବୈଦେଶିକ ମନ୍ତ୍ରଣାଳୟ କହିଛି, ‘ଆମେ ପୂର୍ବରୁ ଜଣାଇଛୁ ଯେ ଏକ ଅନୁରୋଧ ଆସିଛି, ଏହି ପ୍ରସଙ୍ଗରେ ଅଧିକ କିଛି କହିବା ଉପଯୁକ୍ତ ହେବ ନାହିଁ।’
ବୈଦେଶିକ ମନ୍ତ୍ରଣାଳୟ କହିଛି, ବାଂଲାଦେଶରେ ସଂଖ୍ୟାଲଘୁଙ୍କ ପ୍ରସଙ୍ଗ ମଧ୍ୟ ଉଠାଇଛି ଏବଂ ପ୍ରଧାନମନ୍ତ୍ରୀ ମୋଦୀ ମହମ୍ମଦ ୟୁନୁସଙ୍କୁ ତାଙ୍କର ଚିନ୍ତା ଜଣାଇଛନ୍ତି। ମହମ୍ମଦ ୟୁନୁସ୍ ସଂଖ୍ୟାଲଘୁଙ୍କ ପ୍ରସଙ୍ଗରେ ଭାରତକୁ ଆଶ୍ୱାସନା ଦେଇଛନ୍ତି ଯେ, ବାଂଲାଦେଶ ସରକାର ଏହାର ଦାୟିତ୍ୱ ନିର୍ବାହ କରିବ। ଗତ ବର୍ଷ ବିଦ୍ରୋହ ପରେ, ବାଂଲାଦେଶରେ ଅନେକ ହିଂସାତ୍ମକ ଘଟଣା ଘଟିଥିଲା ଯେଉଁଥିରେ ହିନ୍ଦୁ ଏବଂ ଅନ୍ୟାନ୍ୟ ସଂଖ୍ୟାଲଘୁ ସମ୍ପ୍ରଦାୟକୁ ଟାର୍ଗେଟ କରାଯାଇଥିଲା। ଭାରତ ସରକାର ମଧ୍ୟ ଏହାର କଡ଼ା ପ୍ରତିବାଦ କରିଥିଲେ ଏବଂ ବାଂଲାଦେଶ ସରକାରଙ୍କୁ ସଂଖ୍ୟାଲଘୁଙ୍କ ସୁରକ୍ଷା ସୁନିଶ୍ଚିତ କରିବାକୁ ଦାବି କରିଥିଲେ।
ବାଂଲାଦେଶରେ ନିର୍ବାଚନ ଉପରେ ଭାରତର ମତ
ବୈଦେଶିକ ମନ୍ତ୍ରଣାଳୟ କହିଛି, ବାଂଲାଦେଶରେ ନିର୍ବାଚନ ବିଷୟରେ ମଧ୍ୟ ଆଲୋଚନା ହେଉଛି ଏବଂ ପ୍ରଧାନମନ୍ତ୍ରୀ ମୋଦୀ ମଧ୍ୟ ଏହି ପ୍ରସଙ୍ଗରେ ମହମ୍ମଦ ୟୁନୁସଙ୍କୁ ନିଜର ମତାମତ ଜଣାଇଥିଲେ। ମୋଦୀ କହିଛନ୍ତି. ନିୟମିତ ନିର୍ବାଚନ ଯେକୌଣସି ଗଣତନ୍ତ୍ରର ଏକ ଗୁରୁତ୍ୱପୂର୍ଣ୍ଣ ଅଂଶ। ସେ କହିଥିଲେ ଯେ ନିର୍ବାଚନ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରେ। ସେ ବାଂଲାଦେଶରେ ଏକ ଗଣତାନ୍ତ୍ରିକ ଅନ୍ତର୍ଭୁକ୍ତି ଦେଖିବାକୁ ଚାହୁଁଛନ୍ତି।
ବାଂଲାଦେଶରେ ଛାତ୍ର ଆନ୍ଦୋଳନ ଯୋଗୁ ୫ ଅଗଷ୍ଟ ୨୦୨୪ରେ ଶେଖ ହାସିନାଙ୍କୁ ପ୍ରଧାନମନ୍ତ୍ରୀ ପଦରୁ ଇସ୍ତଫା ଦେଇ ଦେଶ ଛାଡି ପଳାଇବାକୁ ପଡିଲା। ଏହା ପରେ ସେ ଭାରତରେ ଆଶ୍ରୟ ନେଇଥିଲେ ଏବଂ ସେବେଠାରୁ ସେ ଏଠାରେ ଅଛନ୍ତି। ମହମ୍ମଦ ୟୁନୁସ୍ ସରକାର ଶେଖ୍ ହାସିନାଙ୍କ ଫେରିଯିବା ସମ୍ପର୍କରେ ଭାରତକୁ ଏକ ଚିଠି ମଧ୍ୟ ଲେଖିଛନ୍ତି। ବାଂଲାଦେଶରେ ଏହି ପରିବର୍ତ୍ତନ ପରେ ଏହା ପ୍ରଥମ ଥର ପ୍ରଧାନମନ୍ତ୍ରୀ ଏବଂ ମହମ୍ମଦ ୟୁନୁସଙ୍କ ମଧ୍ୟରେ ସାକ୍ଷାତ ହୋଇଛି। ତେବେ ଦେଖାଯାଉ ହାସିନା ବାଂଲାଦେଶ ଫେରି ଯାଉଛନ୍ତି ନା ଭାରତରେ ରହୁଛନ୍ତି ।