ମା’ ଲକ୍ଷ୍ମୀଙ୍କୁ ପ୍ରସନ୍ନ କରିବା ପାଇଁ ଖେଳୁଥିଲେ ଜୁଆ, ୩୧୫ ଗିରଫ, ୧୧୫ ମୋବାଇଲ, ୫୬ ବାଇକ୍, ୩ କାର୍ ଜବତ
ଗଞ୍ଜାମ: (ଓଡ଼ିଶା ଭାସ୍କର) ଗଞ୍ଜାମ ଜିଲ୍ଲାରେ ଗତ ୧୦ ଦିନ ମଧ୍ୟରେ ଚଢ଼ାଉ କରି ୩୧୫ ଜଣଙ୍କୁ ଗିରଫ କରାଯିବା ସହ ସେମାନଙ୍କ ନିକଟରୁ ୧୨ ଲକ୍ଷ ୯୮ ହଜାରରୁ ଅଧିକ ନଗଦ ଟଙ୍କା ଜବତ କରାଯାଇଛି। ଗୁରୁବାର ପୁଲିସ ଏହି ସୂଚନା ଦେଇଛି। ଚଢ଼ାଉ ସମୟରେ ୧୧୫ଟି ମୋବାଇଲ, ୫୬ଟି ମୋଟର ସାଇକେଲ ଓ ୩ଟି କାର୍ ଜବତ କରାଯାଇଛି।
ଏନେଇ ମୋଟ ୫୪ଟି ମାମଲା ରୁଜୁ ହୋଇଛି। ଗଞ୍ଜାମରେ ଦଶହରା ପର୍ବ ପରେ ଲୋକମାନେ ପ୍ରାୟତଃ ଜୁଆ ଖେଳନ୍ତି ଏବଂ କୁମାର ପୂର୍ଣ୍ଣିମା ପର୍ଯ୍ୟନ୍ତ ଏଭଳି କାର୍ଯ୍ୟ ଜାରି ରହିଥାଏ । ଜୁଆ ଖେଳ କୁମାର ପୂର୍ଣ୍ଣିମା ଉତ୍ସବର ଏକ ଅଂଶ ଏବଂ ଜିଲ୍ଲାର ପ୍ରାୟ ସବୁ ଗାଁରେ କିଛି ଲୋକ ଏଭଳି କାର୍ଯ୍ୟରେ ସମ୍ପୃକ୍ତ ଅଛନ୍ତି ବୋଲି ସ୍ଥାନୀୟ ଲୋକେ କହିଛନ୍ତି।
ଦିନରେ ମା’ ମହାଲକ୍ଷ୍ମୀଙ୍କୁ ପୂଜା କରାଯାଉଥିବା ବେଳେ ପର୍ବ ରାତିରେ ଲୋକମାନେ ଜୁଆ ଖେଳନ୍ତି। ତେବେ ଏଭଳି ବେଆଇନ କାର୍ଯ୍ୟକଳାପ ବିରୋଧରେ ପୁଲିସ କାର୍ଯ୍ୟାନୁଷ୍ଠାନ ମଧ୍ୟ ଗ୍ରହଣ କରୁଛି। ବ୍ରହ୍ମପୁର ବିଶ୍ୱବିଦ୍ୟାଳୟର ଅବସରପ୍ରାପ୍ତ ପ୍ରଫେସର ଭଗବାନ ସାହୁ କହିଛନ୍ତି, ଏହି ଦିନ ଜୁଆ ଖେଳିବା ଦ୍ୱାରା ମା’ ଲକ୍ଷ୍ମୀଙ୍କ ଆଶୀର୍ବାଦ ମିଳିଥାଏ ବୋଲି ଅନେକ ଲୋକ ବିଶ୍ୱାସ କରନ୍ତି।
ସେମାନେ ନୂଆ ପୋଷାକ ପିନ୍ଧନ୍ତି ଏବଂ ଜୁଆ ଖେଳନ୍ତି । ବ୍ରହ୍ମପୁର ଆରକ୍ଷୀ ଅଧୀକ୍ଷକ ସରୱାନ ବିବେକ ଏମ୍ କହିଛନ୍ତି, କୁମାର ପୂର୍ଣ୍ଣିମା ଦିନ ଜିଲ୍ଲାରେ ପରମ୍ପରା ଅନୁଯାୟୀ ବହୁ ବର୍ଷ ଧରି ଏଭଳି କାର୍ଯ୍ୟ ଚାଲିଆସୁଛି। ପରମ୍ପରା ନାଁରେ ଆମେ ଜୁଆ ଖେଳିବାକୁ ଅନୁମତି ଦେଇପାରିବୁ ନାହିଁ।
