ଫାଇନାଲ ଖେଳିବାକୁ ଦୀର୍ଘ ଦିନର ଅପେକ୍ଷା ଶେଷ: ୨୪ ବର୍ଷ ପରେ ଫାଇନାଲରେ ପହଞ୍ଚିଲା ଇଂଲଣ୍ଡ

ଆଣ୍ଟିଗୁଆ: ଅଣ୍ଡର ୧୯ ବିଶ୍ୱକପରେ ଆଫଗାନିସ୍ତାନକୁ ମାତ ଦେଇ ଫାଇନାଲରେ ପହଞ୍ଚିଛି ଇଂଲଣ୍ଡ । ଡକ-ୱର୍ଥ-ଲୁଇସ ନିୟମ ଅନୁସାରେ ଇଂଲଣ୍ଡ ଆଫଗାନିସ୍ତାନକୁ ୧୫ ରନରେ ହରାଇ ଫାଇନାଲର ଟିକେଟ ହାସଲ କରିଛି । ତେବେ ସବୁଠୁ ରୋଚକ କଥା ହେଉଛି ଟୁର୍ଣ୍ଣାମେଣ୍ଟର ଫାଇନାଲରେ ପ୍ରବେଶ କରିବା ପାଇଁ ଇଂଲଣ୍ଡକୁ ୨୪ ବର୍ଷ ଅପେକ୍ଷା କରିବାକୁ ପଡିଥିଲା । ଗୋଟିଏ ପଟେ ଇଂଲଣ୍ଡର ୨୪ ବର୍ଷର ଅପେକ୍ଷା ଶେଷ ହୋଇଥିବା ବେଳେ ଅନ୍ୟପଟେ ଆଫଗାନିସ୍ତାନର ଫାଇନାଲ ଖେଳିବାର ସ୍ୱପ୍ନ ଧୂଳିସାତ ହୋଇଯାଇଛି ।

ବର୍ଷା ଯୋଗୁଁ ମ୍ୟାଚ ବାଧାପ୍ରାପ୍ତ ହୋଇ ୪୭ ଓଭର ବିଶିଷ୍ଟ କରାଯାଇଥିଲା । ତେବେ ପ୍ରଥମେ ବ୍ୟାଟିଂ କରି ଆଫଗାନିସ୍ତାନକୁ ୨୩୨ ରନର ଟାର୍ଗେଟ ଦେଇଥିଲା ଇଂଲଣ୍ଡ । ତେବେ ଜବାବରେ ଆଫଗାନିସ୍ତାନ ନିର୍ଦ୍ଧାରିତ ଓଭରରେ ୯ ୱିକେଟ ହରାଇ ୨୧୫ ରନ ହିଁ ସଂଗ୍ରହ କରି ପାରିଥିଲା । ଫଳରେ ଏହି ମ୍ୟାଚରେ ବିଜୟ ହାସଲ କରି ୨୪ ବର୍ଷ ପରେ ଫାଇନାଲ ମ୍ୟାଚ ପାଇଁ ଟିକେଟ ହାସଲ କରିଛି ଇଂଲଣ୍ଡ ଦଳ । ତେବେ ଦ୍ୱିତୀୟ ସେମି ଫାଇନାଲରେ ମୁହାଁମୁହିଁ ହେବେ ଭାରତ ଏବଂ ଅଷ୍ଟ୍ରେଲିଆ । ଏହି ମ୍ୟାଚରେ ବିଜୟୀ ଟିମ ଇଂଲଣ୍ଡକୁ ଫାଇନାଲରେ ଭେଟିବ ।