ବ୍ରିଜ୍ ଉପରେ ହେଲା ଚେନ୍ ପୁଲିଂ: ଜୀବନକୁ ବାଜି ଲଗାଇ ଟ୍ରେନକୁ ରିସେଟ୍ କଲେ ରେଳକର୍ମୀ, ଦେଖନ୍ତୁ Video
ନୂଆଦିଲ୍ଲୀ: ଚଳନ୍ତା ଟ୍ରେନକୁ ବିନା କାରଣରେ ଚେନ୍ ଟାଣି ଅଟକାଇବା ହେଉଛି ଆଇନଗତ ଅପରାଧ । ରେଲୱେ ପକ୍ଷରୁ ସମୟ ସମୟରେ ଏନେଇ ଲୋକଙ୍କୁ ସଚେତନ କରାଯାଉଛି । ହେଲେବି ଏଭଳି ଘଟଣା ବନ୍ଦ ହେଉନାହିଁ । ଏପରି ଏକ ଘଟଣା ସାମ୍ନାକୁ ଆସିଛି, ଯେଉଁଠାରେ ବିନା କାରଣରେ ଚେନ୍ ପୁଲିଂ ଯୋଗୁଁ ଟ୍ରେନଟି ଏକ ବ୍ରିଜ୍ ଉପରେ ଅଟକିଯାଇଥିଲା । ଅବଶ୍ୟ ଭିଡିଓ କେବେକାର, ତାହା ଜଣାପଡିନାହିଁ । କିନ୍ତୁ ରେଲୱେ ନିଜର ଅଫିସିଆଲ ଟ୍ୱିଟର ସାଇଟରେ ଏହାକୁ ସେୟାର କରିଛି ।
ନଦୀ ଉପରେ ଥିବା ବ୍ରିଜ୍ ଉପରେ ଟ୍ରେନଟି ଅଟକିଯିବାରୁ ହଇଚଇ ସୃଷ୍ଟି ହୋଇଥିଲା । ଅବସ୍ଥା ଅତି ବିପଜ୍ଜନକ ଥିଲା । କିନ୍ତୁ ଜଣେ ରେଲୱେ କର୍ମଚାରୀ ନିଜ ଜୀବନକୁ ବାଜି ଲଗାଇ ଟ୍ରେନ୍ ତଳକୁ ଯାଇଥିଲେ ଓ ବହୁ କଷ୍ଟରେ ଆଲାର୍ମ ଚେନକୁ ରିସେଟ୍ କରିଥିଲେ । ଏହା ଫଳରେ ଟ୍ରେନଟି ପୁଣିଥରେ ଚାଲିବାକୁ ସକ୍ଷମ ହୋଇଥିଲା । ରେଳ ମନ୍ତ୍ରଣାଳୟ ଏହି ଘଟଣା ଭିଡିଓ ନିଜ ଫେସବୁକ ପେଜରେ ବି ସେୟାର କରିଛି, ଯାହାପରେ ଲୋକମାନେ ସେହି ରେଳକର୍ମଚାରୀଙ୍କୁ ପ୍ରଶଂସା କରୁଛନ୍ତି ।
ରେଲୱେର ସୂଚନା ଅନୁସାରେ, ଆଲାର୍ମ ଚେନ୍ ଟାଣିବାର ଏହି ଘଟଣା ଗୋଦାନ ଏକ୍ସପ୍ରେସ ଟ୍ରେନରେ ହୋଇଥିଲା । ଏହା ପରେ ଟ୍ରେନ ଟିଟୱାଲା ଓ ଖଡାୱଲି ଷ୍ଟେସନ ମଧ୍ୟରେ ଥିବା ଏକ ବ୍ରିଜ ଉପରେ ଅଟକିଯାଇଥିଲା । ରେଲୱେ ଦ୍ୱାରା ସେୟାର କରାଯାଇଥିବା ଏହି ୪୦ ସେକେଣ୍ଡର ଭିଡିଓରେ ଜଣେ ରେଳକର୍ମୀ ଜୀବନକୁ ପାଣି ଛଡ଼ାଇ ଟ୍ରେନ୍ ତଳକୁ ଯାଇଥିବା ନଜର ଆସିଛନ୍ତି । ସେ ଟ୍ରେନର ତଳକୁ ଯାଇ ଆଲାର୍ମ ଚେନକୁ ରିସେଟ୍ କରିଥିଲେ । ରେଲୱେ ବିଜ୍ର ଉପରେ ନିଜର ସନ୍ତୁଳନ ରକ୍ଷା କରି ସେ କୋଚ ନିକଟକୁ ଫେରିଆସିଥିଲେ । ବ୍ରିଜ ଉପରେ ଟ୍ରେନର ଚେନ୍ ଆଲାର୍ମ ରିସେଟ୍ କରିବା କେତେ ଯେ ବିପଜ୍ଜନକ, ତାହା ଆପଣ ଏହି ଭିଡିଓ ଦେଖି ଜାଣିପାରୁଥିବେ ।
Pulling the Alarm Chain for no reason can cause trouble to many!
Satish Kumar, Asst. Loco Pilot of CR,took the risk of resetting Alarm Chain of Godan Express,halted over the River Bridge between Titwala & Khadavli Station.
Pull the chain of a train only in case of an emergency. pic.twitter.com/I1Jhm9MESh
— Ministry of Railways (@RailMinIndia) May 6, 2022
ତେବେ ଟ୍ରେନକୁ ସାମାନ୍ୟ ସ୍ଥିତିକୁ ଫେରାଇଆଣିଥିବା ସେହି ବାହାଦୂର ରେଳକର୍ମୀଙ୍କ ନାଁ ସତୀଶ କୁମାର । ସେ ସେଣ୍ଟ୍ରାଲ ରେଲୱେରେ ଆସିଷ୍ଟାଣ୍ଟ ଲୋକୋ ପାଇଲଟ୍ ଭାବେ କାର୍ଯ୍ୟରତ ଅଛନ୍ତି । କେବଳ ଜରୁରୀକାଳୀନ ପରିସ୍ଥିତିରେ ଚେନ୍ ଟାଣନ୍ତୁ ବୋଲି ଏହି ପୋଷ୍ଟ କରି ଯାତ୍ରୀମାନଙ୍କୁ ନିବେଦନ କରିଛି ରେଲବାଇ ।
