ଜାଲିଆନାୱାଲା ବାଗ୍ ନରସଂହାର, କାହିଁକି ଗୁଳି ଚଳାଇବାକୁ ନିର୍ଦ୍ଦେଶ ଦେଇଥିଲେ ଜେନେରାଲ୍ ଡାୟର
ନୂଆଦିଲ୍ଲୀ, ୧୩ା୪: ଆଜିର ଦିନରେ ଅର୍ଥାତ ଏପ୍ରିଲ୍ ୧୩ ତାରିଖ ୧୯୧୯ରେ ବ୍ରିଟିସ୍ ପଞ୍ଜାବର ଅମୃତସରସ୍ଥିତ ଜାଲିଆନାୱାଲା ବାଗ୍ରେ ଘଟିଥିଲା ଲୋମଟାଙ୍କୁରା ଘଟଣା । ବ୍ରିଗେଡିଅର ଜେନେରାଲ୍ ରେଜିନାଲ୍ଡ ଡାୟରଙ୍କ ଇଂରେଜ ସୈନିକମାନେ ଜାଲିଆନାୱାଲା ବାଗଠାରେ ଏକତ୍ରିତ ଲୋକଙ୍କ ଉପରକୁ ଆଖିବୁଜା ଗୁଳିମାଡ଼ କରିଥିଲେ । ଏହି ଘଟଣାରେ ବୃଦ୍ଧ, ମହିଳା, ପୁରୁଷ ସମେତ ଅନେକ ଶିଶୁଙ୍କ ମୃତ୍ୟୁ ହୋଇଥିଲା । ଅନେକ ଲୋକ ଆହତ ମଧ୍ୟ ହୋଇଥିଲେ । ଜାଲିଆନାୱାଲା ବାଗ୍ ହତ୍ୟାକାଣ୍ଡ ବ୍ରିଟ୍ରିଶ ଇତିହାସର ଅତ୍ୟାଚାର ବିଷୟରେ ବର୍ଣ୍ଣନା କରୁଛି । ଜାଲିଆନାୱାଲା ବାଗ୍ ଅମୃତସରର ସ୍ୱର୍ଣର୍ ମନ୍ଦିର ନିକଟରେ ଥିବା ଏକ ଛୋଟ ସବୁଜ ପଡ଼ିଆ । ଏହି ଅଞ୍ଚଳ ଏବେ ବି ବ୍ରିଟିସ ଶାସନ ଇତିହାସର ଜେନେରାଲ୍ ଡାୟରଙ୍କ ଲୋମଟାଙ୍କୁରା ଅତ୍ୟାଚାରର କାହାଣୀ ବର୍ଣ୍ଣନା କରୁଛି । ୧୩ ଏପ୍ରିଲ୍ ୧୯୧୯ରେ ଘଟିଥିବା ଏହି ହତ୍ୟାକାଣ୍ଡ ଆଜି ବି ବିଶ୍ୱର ସବୁଠାରୁ ବଡ଼ ନରସଂହାର ଭାବେ ଗଣା ଯାଉଛି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ଜାଲିଆନାୱାଲା ବାଗ୍ ନରସଂହାର ଘଟଣାର ସହିଦଙ୍କୁ ସଲାମ୍ କରିବା ସହ ସେମାନଙ୍କ ସାହାସିକତା ଓ ବୀରତାକୁ କେବେ ବି ଭୁଲି ହେବ ନାହିଁ ବୋଲି ଦର୍ଶାଇଛନ୍ତି । ସେମାନଙ୍କ ଅବଦାନ ଭାରତୀୟଙ୍କ ମଧ୍ୟରେ ସବୁଦିନ ପାଇଁ ମନେ ରହିବ ବୋଲି ମୋଦି ଦର୍ଶାଇଛନ୍ତି ।
I bow to those martyrs who were killed mercilessly in Jallianwala Bagh on this day. We will never forget their courage and sacrifice. Their valour will inspire Indians for the years to come. pic.twitter.com/JgDwAoWkAy
— Narendra Modi (@narendramodi) April 13, 2020
ତେବେ ସବୁଠାରୁ ଆଶ୍ଚର୍ଯ୍ୟଜନକ ଘଟଣା ହେଉଛି ଯେତେବେଳେ ଜେନେରାଲ୍ ଡାୟରଙ୍କୁ ତଦନ୍ତକାରୀ ଅଧିକାରୀମାନେ ପଚାରିଥିଲେ ଯେ, ସେ କାହିଁକି ଆଖିବୁଜା ଗୁଳି ଚଳାଇବାକୁ ନିର୍ଦ୍ଦେଶ ଦେଇଥିଲେ । ଜେନେରାଲ ଡାୟର ଭିନ୍ନ ଉତ୍ତର ରଖିଥିଲେ । ଗୋଲ୍ଡେନ୍ ଟେମ୍ପୁଲ୍ ଦର୍ଶନ ପରେ ଜାଲିଆନାୱାଲା ବାଗଠାରେ ଲୋକଙ୍କ ଭିଡ଼ ଜମିବାରେ ଲାଗିଥିବା ତାଙ୍କ ନିକଟରେ ଖବର ପହଞ୍ଚିଥିଲା । ଏହାପରେ ସେ ୪ ଘଣ୍ଟା ଚିନ୍ତା କରିଥିଲେ ଯେ, ଏକତ୍ରିତ ଲୋକଙ୍କୁ କିପରି ଦମନ କରାଯିବ । ପରେ କୌଣସି ଉପାୟ ନପାଇ ଜାଲିଆନାୱାଲା ବାଗ୍ରେ ଲୋକଙ୍କ ପ୍ରବେଶ ପଥକୁ ବନ୍ଦ କରି ଆଖିବୁଜା ଗୁଳିମାଡ଼ କରିବାକୁ ନିର୍ଦ୍ଦେଶ ଦେଇଥିଲେ । ୧୦ରୁ ୧୫ ମିନିଟ୍ ପର୍ଯ୍ୟନ୍ତ ହୋଇଥିବା ଏହି ହତ୍ୟାକାଣ୍ଡରେ ୧୬୫୦ ରାଉଣ୍ଡ ଗୁଳି ଚଳା ଯାଇଥିଲା । ଅନେକ ଲୋକ ଭୟରେ ସେଠାରେ ଥିବା ଏକ କୂଅକୁ ଡେଇଁ ପଡ଼ିଥିଲେ । ଡିସଅର୍ଡର ଇନକ୍ୱାରୀ କମିଟି (୧୯୧୯-୧୯୨୦) ନିକଟରେ ଉତ୍ତର ରଖି ଜେନେରାଲ ଡାୟର କହିଛନ୍ତି ଯେ, ସେଠାରେ ଏକତ୍ରିତ ଲୋକଙ୍କୁ ଦମନ ପାଇଁ ଏହା ଜରୁରୀ ଥିଲା ଏବଂ ଗୁଳି ଚଳା ଯାଇନଥିଲେ ଜାଲିଆନାୱାଲା ବାଗରୁ ଫେରିଥିବା ଲୋକମାନେ ତାଙ୍କ ଉପରେ ହସିଥାନ୍ତେ । ଏପରିକି ଜେନେରାଲ୍ ଡାୟର ଜଣେ ମୁର୍ଖ ବୋଲି କହିଥାନ୍ତେ । ଏପରି ସମାଲୋଚନାକୁ ପ୍ରତିହତ କରିବା ପାଇଁ ଗୁଳି ଚାଳନା ପାଇଁ ନିର୍ଦ୍ଦେଶ ଦେଇଥିଲି ବୋଲି ଜେନେରାଲ ଡାୟର ସ୍ପଷ୍ଟୀକରଣ ରଖିଥିଲେ ।
