ପୁଣି ଭୂମିକମ୍ପରେ ଥରିଲା ଚୀନ, ରିକ୍ଟର ସ୍କେଲରେ ମପାଗଲା ଏତିକି ତୀବ୍ରତା
ନୂଆଦିଲ୍ଲୀ: ଚୀନରେ ପୁଣି ଥରେ ଶକ୍ତିଶାଳୀ ଭୂମିକମ୍ପ ଅନୁଭୂତ ହୋଇଛି। ଉତ୍ତର-ପଶ୍ଚିମ ଜିନଜିଆଙ୍ଗ ଅଞ୍ଚଳରେ ୫.୫ ମ୍ୟାଗ୍ନିଚ୍ୟୁଡର ଏକ ଭୂକମ୍ପ ଘଟିଛି। ଚୀନ ଭୂମିକମ୍ପ ନେଟୱାର୍କ କେନ୍ଦ୍ର (CENC) ଦ୍ୱାରା ଏହି ଭୂମିକମ୍ପ ବିଷୟରେ ସୂଚନା ଦିଆଯାଇଛି।
ଏହାର କିଛି ଘଣ୍ଟା ପୂର୍ବରୁ ଚୀନ୍ର ଗାନସୁ ଏବଂ କିନଘାଇ ପ୍ରଦେଶରେ ୬.୨ ମ୍ୟାଗ୍ନିଚ୍ୟୁଡର ଭୟଙ୍କର ଭୂକମ୍ପ ଘଟିଥିଲା ଯେଉଁଥିରେ ଅତି କମରେ ୧୧୧ ଜଣଙ୍କର ମୃତ୍ୟୁ ଘଟିଛି। ସ୍ଥାନୀୟ ଅଧିକାରୀ କହିଛନ୍ତି ଯେ, ଚୀନର ଗାନସୁରେ ୪୭୦୦ ଘର ନଷ୍ଟ ହୋଇଯାଇଛି। ସିସିଟିଭି ନ୍ୟୁଜ୍ ରିପୋର୍ଟ କରିଛି ଯେ, ଭୂକମ୍ପର କେନ୍ଦ୍ରସ୍ଥଳ ୧୦ କିଲୋମିଟର ଗଭୀରରେ ଥିଲା। ଏହା ବ୍ୟତୀତ ଚୀନ୍ ନ୍ୟୁଜ୍ ଚ୍ୟାନେଲ୍ ରିପୋର୍ଟ କରିଛି ଯେ, ଏହି ଅଞ୍ଚଳରେ ଜଳ, ବିଦ୍ୟୁତ୍ ଏବଂ ପରିବହନ ସେବା ସ୍ଥଗିତ ରହିଛି।
ଗତ ବର୍ଷ ସେପ୍ଟେମ୍ବରରେ ୬.୮ ମ୍ୟାଗ୍ନିଚ୍ୟୁଡର ଏକ ଭୂକମ୍ପରେ ୭୪ ଜଣଙ୍କର ମୃତ୍ୟୁ ହୋଇଥିଲା। ୨୦୦୮ ରେ ଚୀନ୍ ଇତିହାସରେ ସବୁଠାରୁ ଭୟଙ୍କର ଭୂକମ୍ପ ଘଟିଥିଲା। ୨୦୦୮ ରେ ଚାଇନାର ସିଚୁଆନ୍ ପ୍ରଦେଶରେ ୭.୯ ମ୍ୟାଗ୍ନିଚ୍ୟୁଡର ଏକ ଭୂକମ୍ପ ଘଟିଥିଲା। ଏହି ଭୂକମ୍ପରେ ୯୦ ହଜାର ଲୋକଙ୍କ ମୃତ୍ୟୁ ଘଟିଥିଲା।
ରିପୋର୍ଟ ଅନୁଯାୟୀ, ସୋମବାର ରାତିରେ ଘଟିଥିବା ଶକ୍ତିଶାଳୀ ଭୂମିକମ୍ପ ଯୋଗୁଁ ଗାନସୁ ଏବଂ କିନଘାଇ ପ୍ରଦେଶରେ ୨୦୦ ରୁ ଅଧିକ ଲୋକ ଆହତ ହୋଇଛନ୍ତି। ଜିନହୁଆଙ୍କ ଅନୁଯାୟୀ ପଡୋଶୀ କିନଘାଇ ପ୍ରଦେଶର ହାଇଡୋଙ୍ଗ ସହରରେ ୯ ଜଣଙ୍କର ମୃତ୍ୟୁ ଘଟିଥିବା ବେଳେ ୧୨୪ ଜଣ ଆହତ ହୋଇଛନ୍ତି। ଚୀନ୍ର ଅଫିସିଆଲ୍ ନ୍ୟୁଜ୍ ମିଡିଆ ଗ୍ଲୋବାଲ୍ ଟାଇମ୍ସ ରିପୋର୍ଟ କରିଛି ଯେ, ଏହି ଭୂକମ୍ପକୁ ନେଇ ଚୀନ୍ ରାଷ୍ଟ୍ରପତି ସି ଜିନପିଙ୍ଗ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଦେଇଛନ୍ତି। ରାଷ୍ଟ୍ରପତିଙ୍କ ନିର୍ଦ୍ଦେଶ ଅନୁଯାୟୀ, ପ୍ରଭାବିତ ଲୋକମାନଙ୍କର ଉପଯୁକ୍ତ ପୁନର୍ବାସ, ନିରାପତ୍ତା ଏବଂ ଉଦ୍ଧାର କାର୍ଯ୍ୟ ସମେତ ଲୋକଙ୍କ ନିରାପଦ ଉଦ୍ଧାର କାର୍ଯ୍ୟ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
