(Video) ବିବାହ ବନ୍ଧନରେ ବାନ୍ଧିହେଲେ ଓଲିଉଡ୍ ଅଭିନେତ୍ରୀ ଶ୍ରଦ୍ଧା ପାଣିଗ୍ରାହୀ: କାହାର ହାତ ଧରିଲେ ଶ୍ରଦ୍ଧା

ଭୁବନେଶ୍ୱର(ଓଡ଼ିଶା ଭାସ୍କର): ବର୍ତ୍ତମାନ ମ୍ୟାରେଜ୍ ସିଜିନ୍ ଚାଲିଛି । ଏହି ଅବସରରେ ରୀତିନୀତି ଅନୁଯାୟୀ ବହୁ ଯୁବକ-ଯୁବତୀ ନୂଆ ଜୀବନ ସାଥୀଙ୍କ ସହିତ ନୂଆ ଜୀବନ ଆରମ୍ଭ କରୁଛନ୍ତି । ତେବେ ଏହା ମଧ୍ୟରେ ଓଡ଼ିଆ ଫିଲ୍ମ ଜଗତରୁ ଆସିଛି ଏକ ଖୁସି ଖବର । ଓଲିଉଡର ଜଣେ ଚୁଲବୁଲି ନାୟିକା ହାତକୁ ଦି’ ହାତ ହୋଇଛନ୍ତି । ଏହି ଖବର ଓଡ଼ିଆ ସିନେ ପ୍ରଶଂସକଙ୍କ ପାଇଁ ନିଶ୍ଚିତ ଭାବେ ଏକ ଖୁସି ଖବର ।

ସୂଚନା ମୁତାବକ, ଓଡ଼ିଆ ଅଭିନେତ୍ରୀ ଶ୍ରଦ୍ଧା ପାଣିଗ୍ରାହୀ ହାତକୁ ଦି’ ହାତ ହୋଇଛନ୍ତି । ନିଜର ଅଭିନୟର ଯାଦୁରେ ଦର୍ଶକଙ୍କ ମନ ଜିଣିପାରିଥିବା ଶ୍ରଦ୍ଧା ଏବେ ନୂଆ ଇନିଂସ ଖେଳିଛନ୍ତି । ସନ୍ଦିପଙ୍କୁ ନିଜର ଜୀବନସାଥୀ ଭାବେ ବାଛିଛନ୍ତି ଶ୍ରଦ୍ଧା । ଶ୍ରଦ୍ଧା ଜଣେ ଅଭିନେତ୍ରୀ ଭାବେ ଦର୍ଶକଙ୍କ ଗହଣରେ ପରିଚିତ ଥିବା ବେଳେ ସନ୍ଦିପ ମଧ୍ୟ କଳା କ୍ଷେତ୍ର ସହ ଖୁବ୍ ପରିଚିତ । ସନ୍ଦିପ ଜଣେ ଭଲ କଣ୍ଠଶିଳ୍ପୀ ହୋଇଥିବା ବେଳେ ସେ ଅନେକ ଓଡ଼ିଆ ଗୀତରେ କଣ୍ଠଦାନ କରିଛନ୍ତି । ସନ୍ଦିପଙ୍କ ସ୍ୱରର ଯାଦୁରେ ଦର୍ଶକ ମତୁଆଲା ହୋଇଥିବା ବେଳେ ଏବେ ସେ ଶ୍ରଦ୍ଧାଙ୍କ ସହିତ ନୂଆ ଜୀବନ ଆରମ୍ଭ କରିଛନ୍ତି ।

ସନ୍ଦିପ ଓ ଶ୍ରଦ୍ଧାଙ୍କ ମଧ୍ୟରେ ପ୍ରଥମେ ପ୍ରେମ ସମ୍ପର୍କ ଆରମ୍ଭ ହୋଇଥିଲା । ଆଉ ଏବେ ଦୁହେଁ ଦୁହିଁଙ୍କୁ ସାତ ଜନମର ସାଥୀ ଭାବେ ଗ୍ରହଣ କରିଛନ୍ତି । ବେଦୀ ନିଆଁକୁ ଶପଥ କରି ଦୁହେଁ ପରସ୍ପରଙ୍କୁ ଜୀବନସାଥୀ ଭାବେ ଗ୍ରହଣ କରିଛନ୍ତି । ଦୁହେଁ ଏବେ ଜୀବନର ଚଲାପଥରେ ସୁଖ, ସୁଃଖର ସାଥୀ ହୋଇ ଆଗକୁ ଚାଲିବେ । ବୈଦିକ ରୀତିନୀତି ଅନୁସାରେ ଏହି ଦମ୍ପତ୍ତିଙ୍କ ବିବାହ କାର୍ଯ୍ୟ ସମ୍ପନ୍ନ ହୋଇଛି । ଏହି ଷ୍ଟାର ଦମ୍ପତ୍ତିଙ୍କ ମ୍ୟାରେଜ ପାର୍ଟିରେ ବହୁ ଓଡ଼ିଆ କଳାକାର ଉପସ୍ଥିତ ରହି ନବଦମ୍ପତ୍ତିଙ୍କୁ ଆଶିର୍ବାଦ ଦେଇଥିଲେ ।