ଅଫିସ ବାଥରୁମରେ ରିଲ୍ସ ଦେଖୁଥିଲେ ସାବଧାନ ! ଛାତ ଉପରୁ ଫଟୋ ଉଠାଇ କାନ୍ଥରେ ଛାପି ଦେଉଛି କମ୍ପାନୀ..

ନୂଆଦିଲ୍ଲୀ: କମ୍ପାନୀଗୁଡ଼ିକ ସେମାନଙ୍କ କର୍ମଚାରୀଙ୍କଠାରୁ କାମ ଆଦାୟ କରାଇବା ପାଇଁ ଅନେକ ପ୍ରକାର ତରିକା ଆପଣାଇଥାନ୍ତି । ତଥାପି, କିଛି କର୍ମଚାରୀ ଅଛନ୍ତି ଯେଉଁମାନେ ବାଥରୁମକୁ ଯାଇ ବସି ମୋବାଇଲରେ ରିଲ୍ ଦେଖନ୍ତି ।

ଏହାରି ଭିତରେ ଏକ ଚୀନ୍ କମ୍ପାନୀ ଏପରି ଏକ ପଦକ୍ଷେପ ନେଇଛି ଯେ ଏହା ବିବାଦରେ ଘେରିଯାଇଛି । କମ୍ପାନୀ କର୍ମଚାରୀମାନେ ବାଥରୁମରେ ଅତ୍ୟଧିକ ସମୟ ବିତାଉଥିବାର ଫଟୋ ଉଠାଇ ସାର୍ବଜନୀନ କରିଥିବା ଜଣାପଡିଛି ।

ବାଥରୁମର ଫଟୋ ଉଠାଇ କାନ୍ଥରେ ଛାପିଦେଲେ- ଚୀନର ଶେନଜେନ ସହରର ‘ଲିକ୍ସୁନ୍ ଡାଏନସେଙ୍ଗ’ କମ୍ପାନୀ ତାର କର୍ମଚାରୀଙ୍କ ଶୌଚାଳୟରେ ବସିଥିବା ଫଟୋ ଉଠାଇ ସର୍ବସାଧାରଣରେ ଲଗାଇଛି । ରିପୋର୍ଟ ଅନୁସାରେ, କିଛି କର୍ମଚାରୀ ଶୌଚାଳୟ ଯିବା ପରେ ଦ୍ୱାର ଖୋଲୁ ନଥିଲେ ।

ଯାହା ଫଳରେ କମ୍ପାନୀ କର୍ମଚାରୀମାନେ ରାଗି ଯାଇ ସିଡିରେ ଚଢ଼ି ଉପରୁ ସେମାନଙ୍କର ଫଟୋ ଉଠାଇଥିଲେ। ପରେ ଏହି ଫଟୋକୁ ଶୌଚାଳୟର କାନ୍ଥରେ ଲଗାଯାଇଥିଲା । ଯାହା ଦ୍ଵାରା ଅନ୍ୟ କର୍ମଚାରୀମାନେ ଏଗୁଡ଼ିକୁ ଦେଖିବା ପରେ ସତର୍କ ହୋଇଯାଇଥିବା ରିପୋର୍ଟରେ କୁହାଯାଇଛି ।

ତେବେ ଏହି କାର୍ଯ୍ୟ ପାଇଁ କମ୍ପାନୀକୁ ନିରନ୍ତର ସମାଲୋଚନାର ସମ୍ମୁଖୀନ ହେବାକୁ ପଡିଲ ।  ଯାହା ପରେ କମ୍ପାନୀ କିଛି ଘଣ୍ଟା ପରେ ଏହି ଫଟୋଗୁଡ଼ିକୁ ହଟାଇ ଦେଇ କହିଥିଲା ​​ଯେ, ଏହି ଫଟୋଗୁଡ଼ିକ ଭଲ ଦେଖାଯାଉ ନଥିଲା।

ତେବେ ଏହି ସମୟର ଫଟୋ ସୋସିଆଲ ମିଡିଆରେ ଭାଇରାଲ ହୋଇଥିଲା । ଅନେକ ଆଇନ ବିଶେଷଜ୍ଞ ଏହି ପଦକ୍ଷେପକୁ କର୍ମଚାରୀଙ୍କ ଗୋପନୀୟତା ଏବଂ ମାନବାଧିକାରର ଘୋର ଉଲ୍ଲଂଘନ ବୋଲି କହିଛନ୍ତି ।