ବୈଜ୍ଞାନିକଙ୍କ ଚମତ୍କାର…ଏବେ ସମୁଦ୍ର ହେବ ପେଟ୍ରୋଲ ପମ୍ପ୍

ନୂଆଦିଲ୍ଲୀ: ଏବେ ପେଟ୍ରୋଲ ପମ୍ପରେ ପରିଣତ ହେବ ସମୁଦ୍ର । ନୂତନ ପ୍ରଯୁକ୍ତିବିଦ୍ୟା ସାହାଯ୍ୟରେ ପାଣିରୁ ବାହାର କରାଯିବ ହାଇଡ୍ରୋଜେନ୍ ଇନ୍ଧନ । ସଂଯୁକ୍ତ ଆରବ ଏମିରାତର ଶାରଜାହା ବିଶ୍ୱବିଦ୍ୟାଳୟର ବୈଜ୍ଞାନିକମାନେ ଏକ ଅନନ୍ୟ ପ୍ରଯୁକ୍ତିବିଦ୍ୟା ବିକଶିତ କରିଛନ୍ତି । ଯାହା ସିଧାସଳଖ ସମୁଦ୍ର ପାଣିରୁ ସ୍ବଚ୍ଛ ହାଇଡ୍ରୋଜେନ୍ ଇନ୍ଧନ ବାହାର କରିପାରିବ, ତାହା ମଧ୍ୟ କୌଣସି ରାସାୟନିକ ପଦାର୍ଥ କିମ୍ବା ମହଙ୍ଗା ଡିସାଲିନେସନ୍ (ଲୁଣ ବାହାର କରି) ପ୍ରକ୍ରିୟା ବିନା।

ଲୁଣ ଅପସାରଣ ବା ବାହାର ନକରି ସିଧାସଳଖ ହାଇଡ୍ରୋଜେନ୍ ଉତ୍ପାଦନ

ଏହି ପ୍ରଯୁକ୍ତିବିଦ୍ୟା ଖଣିଜ ଲବଣ ଅପସାରଣ ନକରି ସମୁଦ୍ରର ଲୁଣିଆ ପାଣିରୁ ଶିଳ୍ପ ସ୍ତରରେ ହାଇଡ୍ରୋଜେନ୍ ଉତ୍ପାଦନ ସମ୍ଭବ କରିଥାଏ। ସାଧାରଣତଃ, ହାଇଡ୍ରୋଜେନ୍ ତିଆରି କରିବା ପାଇଁ ବିଶୁଦ୍ଧ ପାଣି ଆବଶ୍ୟକ, ଯାହା ଅନେକ ଦେଶରେ ଉପଲବ୍ଧ ନୁହେଁ, କିନ୍ତୁ ଏହି ନୂତନ ଆବିଷ୍କାର ସେହି ଆବଶ୍ୟକତାକୁ ଦୂର କରିଛି ।

ମଲ୍ଟିଲେୟର୍ଡ ଇଲେକ୍ଟ୍ରୋଡ୍

ଏହି ଗବେଷଣାର ପ୍ରମୁଖ ବୈଜ୍ଞାନିକ ଡକ୍ଟର ତନବୀର ଉଲ୍ ହଙ୍କଙ୍କ ଅନୁଯାୟୀ, ଦଳ ଏକ ବହୁସ୍ତରୀୟ ଇଲେକ୍ଟ୍ରୋଡ୍ ପ୍ରସ୍ତୁତ କରିଛି, ଯାହା ସମୁଦ୍ର ପାଣିରେ କ୍ଲୋରାଇଡ୍ ଆୟନ ଦ୍ୱାରା ହେଉଥିବା କ୍ଷୟ ଏବଂ ଅବକ୍ଷୟରୁ ନିଜକୁ ରକ୍ଷା କରେ। ଏହି ଇଲେକ୍ଟ୍ରୋଡ୍ ଏକ ସୂକ୍ଷ୍ମ-ପରିବେଶ ସୃଷ୍ଟି କରେ ଯାହା ହାଇଡ୍ରୋଜେନ୍ ଉତ୍ପାଦନକୁ ତ୍ୱରାନ୍ୱିତ କରେ ଏବଂ ଡିଭାଇସକୁ ଦୀର୍ଘ ସମୟ ପାଇଁ ସ୍ଥାୟୀ କରିଥାଏ ବା ଠିକ ରଖିଥାଏ ।

କୌଣସି ଡିସାଲିନେସନ୍ କି କୌଣସି ପ୍ରଦୂଷଣ ନାହିଁ

ଏହି ସିଷ୍ଟମରେ କୌଣସି ରାସାୟନିକ ପଦାର୍ଥ ବ୍ୟବହାର କରାଯିବ ନାହିଁ ଏବଂ ଏହା କୌଣସି କାର୍ଯ୍ୟଦକ୍ଷତା କ୍ଷତି ବିନା 300 ଘଣ୍ଟା ପର୍ଯ୍ୟନ୍ତ କାମ କରେ। କେବଳ ଏତିକି ନୁହେଁ, 98% ଇଲେକ୍ଟ୍ରିକ ଇନପୁଟ୍ ସିଧାସଳଖ ହାଇଡ୍ରୋଜେନ୍ ଗ୍ୟାସରେ ରୂପାନ୍ତରିତ ହୁଏ, ଯାହା ଏହାକୁ ଅତ୍ୟନ୍ତ ଦକ୍ଷ ଏବଂ ସ୍ଥାୟୀ କରିଥାଏ।