୧୪୨ ବର୍ଷରେ ସବୁଠୁ ଗରମ ମାସ ଜୁଲାଇ, ଇତିହାସର ୧୦ଟି ଗରମ ବର୍ଷରେ ସାମିଲ୍ ହେବ ୨୦୨୧

ଓଡ଼ିଶା ଭାସ୍କର ବ୍ୟୁରୋ: ମୌସୁମୀର ନିୟମିତ ବର୍ଷା ଏ ଯାଏଁ ମିଳିନି ଓଡ଼ିଶାକୁ । ଧାରା ଶ୍ରାବଣ ମାସ ବୋଲି ଯାହା କୁହାଯାଏ, ତାହା ଚଳିତ ବର୍ଷ ଭୁଲ୍ ବୋଲି ପ୍ରମାଣିତ କରିଦେଇଛି । ଫ୍ୟାନ୍-ଏସି ନଦେଲେ ସମ୍ଭାଳି ହେଉନି ଗରମ, ସବୁରି ମୁହଁରେ ଏଭଳି କଥା । ବାସ୍ତବରେ ଏଯାଏଁ ତାତିର ପ୍ରଭାବ କମିନଥିଲାବେଳେ ଜୁଲାଇ ମାସ ସମ୍ପର୍କରେ ଯେଉଁ ତଥ୍ୟ ପ୍ରକାଶ ପାଇଛି ତାହା ସମସ୍ତଙ୍କ ମଥା ଘୂରାଇ ଦେଉଛି । ବିଗତ ୧୪୨ ବର୍ଷ ମଧ୍ୟରେ ଗତ ଜୁଲାଇ ସବୁଠୁ ଅଧିକ ଗରମ ମାସ ରହିଥିଲା । ଏଥିସହ ଇତିହାସର ୧୦ଟି ପ୍ରମୁଖ ଗରମ ବର୍ଷ ମଧ୍ୟରେ ୨୦୨୧ ସାମିଲ୍ ହେବ ବୋଲି ଜଣାପଡ଼ିଛି ।

ବିଶ୍ୱ ତାପାୟନ (ଗ୍ଲୋବାଲ୍ ୱାର୍ମିଂ) ଓ ଜଳବାୟୁ ପରିବର୍ତ୍ତନର ମହାପ୍ରଭାବ ବିଶ୍ୱବାସୀଙ୍କୁ ଭୋଗିବାକୁ ପଡୁଛି । ଏହାର ପ୍ରଭାବରେ ଜୁଲାଇ ୨୦୨୧ ଇତିହାସର ସବୁଠୁ ଅଧିକ ଗରମ ହେଉଥିବା ମାସ ପାଲଟିଗଲା । ବିଗତ ୧୪୨ ବର୍ଷର ରେକର୍ଡ ମଧ୍ୟ ଭାଙ୍ଗିଗଲା ୨୦୨୧ରେ । ଏ ସମ୍ପର୍କରେ ଆମେରିକାର ନ୍ୟାସନାଲ୍ ଓସୋନିକ୍ ଆଣ୍ଡ୍ ଅଟମୋସ୍ଫେରିକ୍ ଆଡମିନିଷ୍ଟ୍ରେସନ୍ ପକ୍ଷରୁ ସବିଶେଷ ତଥ୍ୟ ପ୍ରକାଶ ପାଇଛି । କ୍ଲାଇମେଟ୍ ଚେଞ୍ଜ୍ ସମ୍ପର୍କରେ ଅନୁଧ୍ୟାନ କରୁଥିବା ଇଣ୍ଟରଗଭର୍ଣ୍ଣମେଣ୍ଟାଲ୍ ପ୍ୟାନେଲ୍ ପକ୍ଷରୁ ନିକଟରେ କୁହାଯାଇଛି ଯେ ଦୀର୍ଘକାଳୀନ ପରିବର୍ତ୍ତନର ପ୍ରଭାବ ଆମ ବିଶ୍ୱ ଉପରେ ପଡୁଛି । ଏହି କାରଣରୁ ଅଧିକ ଗରମ ଅନୁଭୂତ ହେଉଛି । ସେହିପରି ଏନଓଏଏର ଜଣେ ଅଧିକାରୀ ରିକ୍ ସ୍ପିନରାଡ୍ କହିଛନ୍ତି ଯେ ସାଧାରଣତଃ ଜୁଲାଇରେ ବର୍ଷର ସବୁଠୁ ଅଧିକ ଗରମ ହୋଇଥାଏ କିନ୍ତୁ ୨୦୨୧ ଜୁଲାଇ ସର୍ବକାଳୀନ ରେକର୍ଡ କରିଦେଇଛି । ଇତିହାସରେ ସବୁଠୁ ଗରମ ମାସ ଭାବେ ପ୍ରମାଣିତ ହୋଇଯାଇଛି । ଏହି ତଥ୍ୟ ଜଳବାୟୁ ପରିବର୍ତ୍ତନକୁ ନେଇ ରହିଥିବା ଚିନ୍ତାକୁ ଆହୁରି ବଢ଼ାଇ ଦେଇଛି । ଖାଲି ସେତିକି ନୁହେଁ, ବିଶ୍ୱ ବିଘଟନ ପ୍ରକ୍ରିୟା ଆଡ଼କୁ ଗତି କରୁଥିବା ଆଶଂକା କରାଯାଉଛି ।

ପଛରେ ପଡ଼ିଗଲା ୨୦୧୬ ଜୁଲାଇ

ବିଂଶ ଶତାବ୍ଦୀରେ ସ୍ଥଳଭାଗରେ ହାରାହାରି ତାପମାତ୍ରା ୧୫.୮ ଡିଗ୍ରୀ ଥିବାବେଳେ ପୃଥିବୀରେ ସମାହିତ ଜଳଭାଗର ତାପମାତ୍ରା ୦.୯୩ ଡିଗ୍ରୀ ରହିଥିଲା । ଏପରିକି ଜୁଲାଇ ୨୦୧୬ରେ କରାଯାଇଥିବା ରେକର୍ଡଠାରୁ ଗତ ଜୁଲାଇ ୦.୦୧ ଡିଗ୍ରୀ ସେଲସିଅସ୍ ଅଧିକ ରହିଥିଲା । ସେହିପରି ୨୦୧୯ ଓ ୨୦୨୦ରେ ମଧ୍ୟ ଜୁଲାଇର ତାପମାତ୍ରା ୨୦୧୬ ସ୍ତର ପାଖାପାଖି ରହିଥିଲା ।

ଏସିଆରେ ୧୧ବର୍ଷର ରେକର୍ଡ ଭାଙ୍ଗିଲା

ଜୁଲାଇ ୨୦୨୧ ଏସିଆରେ ସବୁଠୁ ଗରମ ମାସ ଭାବେ ରେକର୍ଡ କରାଯାଇଛି । ଏହା ପୂର୍ବରୁ ୨୦୧୦ରେ ତାପମାତ୍ରା ସବୁଠୁ ଅଧିକ ରହିଥିଲା । ଆମେରିକୀୟ ଅଧିକାରୀ ସ୍ପିନରେଡ୍ କହିଛନ୍ତି ଯେ ସାରା ବିଶ୍ୱର ବୈଜ୍ଞାନିକମାନେ ଜଳବାୟୁ ପରିବର୍ତ୍ତନକୁ ନେଇ ଏଭଳି ନୂଆ ତଥ୍ୟରେ ଉପନୀତ ହୋଇଛନ୍ତି । ଯାହା କି ମାନବ ସଭ୍ୟତା ପାଇଁ ଘାତକ ସାବ୍ୟସ୍ତ ହେବାକୁ ଯାଉଛି । ପରିବେଶ ଓ ପରିବର୍ତ୍ତନର ସନ୍ଧିକ୍ଷଣରେ ମାନବ ସମାଜ ଗମ୍ଭୀର ସମସ୍ୟା ସାମ୍ନା କରିବାକୁ ଯାଉଛି ବୋଲି ସେ ଆଶଙ୍କା ପ୍ରକାଶ କରିଛନ୍ତି ।

ଗ୍ରୀନହାଉସ୍ ଗ୍ୟାସ୍ ନିଷ୍କର୍ସ କମାଇବାକୁ ହବ

ରିପୋର୍ଟ ଅନୁସାରେ ଆସନ୍ତା ୧୦ ବର୍ଷ ମଧ୍ୟରେ ଗ୍ଲୋବାଲ୍ ୱାର୍ମିଂ ୧.୫ ଡିଗ୍ରୀ ସେଲସିଅସ୍ ହାର କିମ୍ବା ତାଠାରୁ ଅଧିକ ହୋଇପାରେ । ଏଥିପାଇଁ ଗ୍ରୀନହାଉସ୍ ଗ୍ୟାସ୍ ନିର୍ଗମନ ତ୍ୱରିତ୍ ଭାବେ କମାଇବାକୁ ହିଁ ହେବ । ଯଦି ଏଥିରେ ବିଫଳ ହୁଅନ୍ତି, ତେବେ ତାପାମାତ୍ରା ୧.୫ରୁ ୨ ଡିଗ୍ରୀ ସେଲସିଅସ୍ ପର୍ଯ୍ୟନ୍ତ ପହଞ୍ଚି ଯାଇପାରେ । ଆଉ ସେଭଳି ପରିସ୍ଥିତିର ସାମ୍ନା କରିବା ମଣିଷ ସମାଜ ପାଇଁ ଅସହ୍ୟ ହୋଇପଡ଼ିବ ।