ନାବାଳକ ଗାଡ଼ି ଚଳାଇବା ଉପରେ ଲାଗିଲା ଅଙ୍କୁଶ: ଏଣିକି ପିଲାଙ୍କୁ ଗାଡ଼ି ଦେଲେ ଅଭିଭାବକଙ୍କ ଉପରେ ହେବ କାର୍ଯ୍ୟାନୁଷ୍ଠାନ
କଟକ: ଏଣିକି ନାବାଳକ ପିଲାମାନଙ୍କୁ ଗାଡ଼ି ଦେଲେ ଅଭିଭାବକଙ୍କ ଉପରେ ହେବ କାର୍ଯ୍ୟାନୁଷ୍ଠାନା ଏ ନେଇ ଗାଡ଼ି ଚଳାଇବା ଉପରେ ଅଙ୍କୁଶ ଲଗାଇବ ପରିବହନ ବିଭାଗ । ତେଣୁ ପିଲାଙ୍କୁ ଗାଡ଼ି ଦେଉଥିଲେ ଅଭିଭାବକମାନେ ସାବଧାନ ରହିବାକୁ କୁହାଯାଇଛି । ନାବାଳକ ସ୍କୁଲ ପିଲା ବାଇକ୍ କିମ୍ବା ଅନ୍ୟ ଗାଡ଼ି ଚଳାଇ ପାରିବେନି । ଯଦି ସେମାନେ ଗାଡ଼ି ଚଳାଉଥିବା ବେଳେ ଧରାପଡ଼ିବେ, ତେବେ ଗାଡ଼ିର ମାଲିକକୁ ଧରି କୋର୍ଟ ଚାଲାଣ କରାଯିବ ।
ଯେଉଁ ୧୮ ବର୍ଷରୁ କମ୍ ସ୍କୁଲ ପିଲା ବିନା ଲାଇସେନସରେ ଗାଡ଼ି ଚଳାଉଥିବା ଧରାପଡ଼ିବେ ସମ୍ପୃକ୍ତ ଗାଡ଼ିର ମାଲିକଙ୍କୁ ୨୫ ହଜାର ଟଙ୍କା ଜୋରିମାନା କରାଯିବା ସହ ଗାଡିକୁ ଜବତ କରାଯିବ । ପରେ ଗାଡ଼ିର ପିକରଣ ବାତିଲ କରାଯିବ ଓ ଗାଡି ମାଲିକଙ୍କ ବିରୋଧରେ ମାମଲା କରାଯିବ । ଏହି ମାମଲାରେ ଆଇନ ଅନୁଯାୟୀ ଗାଡ଼ି ମାଲିକଙ୍କୁ ୩ ବର୍ଷ ପର୍ଯ୍ୟନ୍ତ ଜେଲ ଓ ଜାରିମାନା ବ୍ୟବସ୍ଥା ଅଛି । ଏଥିପାଇଁ ସ୍କୁଲ ଆଖପାଖରେ ଧରପଗଡ଼ ହେବ । ନାବାଳକମାନେ ଗାଡ଼ି ଚଳାଇବାବେଳେ ବିଭିନ୍ନ ନିୟମ ଉଲ୍ଲଙ୍ଘନ କରୁଥିବାଯୋଗୁଁ ସଡ଼କ ଦୁର୍ଘଟଣା ବଢ଼ିବାରେ ଲାଗିଛି । ତେଣୁ ନାବାଳକ ଛାତ୍ରଛାତ୍ରୀଙ୍କୁ ଗାଡ଼ି ଚଳାଇବା ଉପରେ ରୋକ୍ ଲାଗିବ ।
ତେବେ ଏହାକୁ ଧରିବା ପାଇଁ ସ୍କୁଲ ଗେଟ୍ ପାଖରେ ଚଢ଼ାଉ ହେବ ବୋଲି ପରିବହନ ଏନ୍ଫୋର୍ସମେଣ୍ଟ୍ ଅତିରିକ୍ତ କମିଶନର ଲାଲମୋହନ ସେଠୀ ସୂଚନା ଦେଇଛନ୍ତି । ଆସନ୍ତାକାଲି ଠାରୁ ଏପ୍ରିଲ ପ୍ରଥମ ସପ୍ତାହ ଯାଏ ସ୍ପେସାଲ ଡ୍ରାଇଭ ହେବ । ଟ୍ରାଫିକ୍ ପୋଷ୍ଟ ପାଖରେ ଧରପଗଡ଼ କଲେ ଟ୍ରାଫିକ୍ ଜାମ୍ ହେବା ଆଶଙ୍କା ଥିବାରୁ ସ୍କୁଲ ନିକଟରେ ଚଢ଼ଉ କରାଯିବ । ପୋଲିସ ସହ ମିଶି ପରିବହନ ଅଧିକାରୀ ଏହି ଚଢ଼ାଉ କରିବେ ।