ବଦଳିଗଲା ସ୍ୱର, ଟିକା ଲଗାଇବେ ଅଖିଳେଶ ଯାଦବ, କହିଲେ- ଏହା ଭାରତ ସରକାରଙ୍କ ଭ୍ୟାକ୍ସିନ
ଲଖନଉ : ଏହା ବିଜେପି ଭ୍ୟାକ୍ସିନ । ତେଣୁ ମୁଁ ଟିକା ନେବି ନାହିଁ । କରୋନାର ପ୍ରଥମ ଲହର ସମୟରେ ଏହି ମନ୍ତବ୍ୟ ଦେଇଥିଲେ ସମାଜବାଦୀ ପାର୍ଟି ଅଧ୍ୟକ୍ଷ ଅଖିଲେଶ ଯାଦବ । ହେଲେ ଦ୍ୱିତୀୟ ଲହରରେ ତାଙ୍କ ସ୍ୱର ବଦଳି ଯାଇଛି । ଯେଉଁ ବ୍ୟକ୍ତି ବିଜେପି ଟିକା କହି ଗୁଜବ ପ୍ରଚାର କରୁଥିଲେ ଏବେ ସେହି ଅଖିଳେଶ ଯାଦବ ଟିକା ନେବାକୁ ଆଗଭର ହେଉଛନ୍ତି । ଏପରିକି ଭ୍ୟାକ୍ସିନକୁ ବର୍ତମାନ ଭାରତ ସରକାରଙ୍କ ଭ୍ୟାକ୍ସିନ ବୋଲି କହୁଛନ୍ତି । କେବଳ ସେ ନୁହନ୍ତି ଏମିତି ଅନେକ ନେତା ଅଛନ୍ତି ଯେଉଁମାନେ ଟିକାକୁ ବିଜେପିର ଟିକା ବୋଲି କହୁଥିଲେ ।
ମୁଲାୟମ ସିଂହ ଯାଦବ କରୋନା ଟିକା ନେବା ପରେ ସମାଜବାଦ ପାର୍ଟିର ମୁଖ୍ୟ ଅଖିଳେଶ ଯାଦବଙ୍କ ସ୍ୱର ବଦଳି ଯାଇଛି । କରୋନା ଭ୍ୟାକ୍ସିନକୁ ବିଜେପି ଭ୍ୟାକ୍ସିନ ଦର୍ଶାଉଥିବା ଅଖିଳେଶ ମଙ୍ଗଳବାର ଟ୍ୱିଟ୍ କରି ଟିକା ନେବେ ବୋଲି କହିଛନ୍ତି । ସେ ଲେଖିଛନ୍ତି ଜନ ଆକ୍ରୋଶକୁ ଦୃଷ୍ଟିରେ ରଖି ଏବଂ ରାଜନୀତିକରଣ ବଦଳରେ ଭାରତ ସରକାରଙ୍କ ଟିକା ନେବାକୁ ନିଷ୍ପତି ନେଇଛନ୍ତି । ଆମେ ବିଜେପି ଟିକାକୁ ବିରୋଧ କରୁଥିଲୁ କିନ୍ତୁ ଏବେ ଭାରତ ସରକାରଙ୍କ ଟିକାକୁ ସ୍ୱାଗତ କରୁଛୁ । ଯେଉଁ ଲୋକେ ଏ ପର୍ଯ୍ୟନ୍ତ ଟିକା ନେଇ ନାହାନ୍ତି ସେମାନଙ୍କୁ ମୁଁ ଟିକା ଲଗାଇବାକୁ ଅପିଲ୍ କରୁଛି ବୋଲି ଅଖିଳେଶ ଟ୍ୱିଟ୍ କରିଛନ୍ତି ।
जनाक्रोश को देखते हुए आख़िरकार सरकार ने कोरोना के टीके के राजनीतिकरण की जगह ये घोषणा करी कि वो टीके लगवाएगी।
हम भाजपा के टीके के ख़िलाफ़ थे पर ‘भारत सरकार’ के टीके का स्वागत करते हुए हम भी टीका लगवाएंगे व टीके की कमी से जो लोग लगवा नहीं सके थे उनसे भी लगवाने की अपील करते हैं।
— Akhilesh Yadav (@yadavakhilesh) June 8, 2021
ମୁଲାୟମ ସିଂହଙ୍କ ଟିକା ଲଗାଇବାର ଫଟୋ ଭାଇରାଲ ହେବା ମାତ୍ରେ ବିଜେପି ଆକ୍ଷେପ କରି କହିଥିଲା ଯେ, ଅଖିଳେଶ କହୁଛନ୍ତି ଟିକା ବିଜେପିର । କିନ୍ତୁ ଏବେ ମୁଲାୟମ ସିଂହ ଯାଦବ ବିଜେପି ଟିକା ନେଇଛନ୍ତି । କଣ ମୁଲାୟମ ବିଜେପିର ପ୍ରଚାର କରୁଛନ୍ତି ନା ନିଜ ପୁତ୍ରଙ୍କ ଦ୍ୱାରା ପ୍ରଚାରିତ ଭ୍ରମକୁ ଭାଙ୍ଗୁଛନ୍ତି । ଆପଣ ସ୍ଥିର କରନ୍ତୁ କିଏ ଠିକ୍ କରୁଛି ! ନଗର ଉନ୍ନୟନ ମନ୍ତ୍ରୀ କେଶବ ପ୍ରସାଦ ମୌର୍ଯ୍ୟ ଟିକା ନେଇଥିବାରୁ ମୁଲାୟମ ସିଂହଙ୍କୁ ଧନ୍ୟବାଦ ଦେଇଛନ୍ତି ଏବଂ କହିଛନ୍ତି, ଆପଣ ଟିକା ନେବା ଏହା ପ୍ରମାଣିତ କରୁଛି ଯେ, ସମାଜବାଦ ପାର୍ଟିର ରାଷ୍ଟ୍ରୀୟ ଅଧ୍ୟକ୍ଷ ଭ୍ୟାକ୍ସିନକୁ ନେଇ ଅପ ପ୍ରଚାର କରିଥିଲେ । ଏଥିପାଇଁ ଅଖିଳେଶ ଯାଦବଙ୍କୁ କ୍ଷମା ମାଗିବା ଉଚିତ୍ ।
ସୂଚନାଯୋଗ୍ୟ, ଭ୍ୟାକ୍ସିନକୁ ବିଜେପିର ଟିକା କହି ଅଖିଲେଶ ଯାଦବ ଟିକା ନେବେ ନାହିଁ ବୋଲି କହିଥିଲେ । କିନ୍ତୁ କିଛି ସମୟ ପରେ ନିଜ ମନ୍ତବ୍ୟ ପ୍ରତ୍ୟାହାର କରି କହିଥିଲେ, ସଂପୂର୍ଣ୍ଣ ପରୀକ୍ଷା ପରେ ସେ କରୋନା ଟିକା ଲଗାଇବେ । କିନ୍ତୁ କରୋନାର ଦ୍ୱିତୀୟ ଲହର ପରେ ତାଙ୍କ ସ୍ୱର ବଦଳି ଯାଇଥିଲା । ସେ ସମସ୍ତ ଲୋକଙ୍କୁ ମାଗଣାରେ ଟିକା ଯୋଗାଇ ଦେବାକୁ ବିଜେପ ସରକାରଠାରେ ଦାବି କରିଥିଲେ ।
