ପୁଣି ଏକ ହାତୀର ମୃତ୍ୟୁ: ଅସୁସ୍ଥ ହୋଇ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଲା ଗଜରାଜ
ଅନୁଗୁଳ: ରାଜ୍ୟରେ ଥମୁନି ହାତୀ ମୃତ୍ୟୁ ଘଟଣା । ବିଭିନ୍ନ ଜଙ୍ଗଲରେ ଏବଂ ଅଭୟାରଣ୍ୟରେ ହାତୀଙ୍କ ମୃତ୍ୟୁ ଏବେ ପ୍ରଶାସନର ଚିନ୍ତା ବଢାଇ ଦେଇଛି । ଆଜି ପୁଣି ଏକ ହାତୀର ମୃତ୍ୟୁ ଘଟିଥିବା ଘଟଣା ସାମନାକୁ ଆସିଛି । କାଲିଠୁ ଅସୁସ୍ଥ ହୋଇ ଚିକିତ୍ସାଧୀନ ଅବସ୍ଥାରେ ଆଜି ସକାଳେ ହାତୀ ମୃତ୍ୟୁବରଣ କରିଛି । ତେବେ ବାରମ୍ବାର ହାତୀ ମୃତ୍ୟୁ ଘଟଣା ଏବେ ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଛି ।
ସୂଚନା ଅନୁସାରେ, ଅନୁଗୁଳ ଜିଲ୍ଲା ସାତକୋଶିଆ କୁଶଖଳି ଜଙ୍ଗଲରେ ହାତୀର ମୃତ୍ୟୁ ହୋଇଥିବା ସୂଚନା ମିଳିଛି । ଗତକାଲିଠୁ ହାତୀଟି ଅସୁସ୍ଥ ହୋଇ ଚିକିତ୍ସାରତ ଥିଲା । ତେବେ ଆଜି ସକାଳେ ଚିକିତ୍ସାଧୀନ ଅବସ୍ଥାରେ ପାଣ ହରାଇଛଇ ଗଜରାଜ । ଏ ନେଇ ଅଞ୍ଚଳର ଡିଏଫଓ ସୂଚନା ଦେଇଛନ୍ତି । ତେବେ ପ୍ରାଣ ହରାଇଥିବା ହାତୀର ବୟସ ୩ରୁ ୪ ବର୍ଷ ବୋଲି ଜଣାଯାଇଛି ।
ହାତୀର ମୃତ୍ୟୁ ପରେ ଏହାର କାରଣ ଜାଣିବା ପାଇଁ ରକ୍ତ ନମୁନାକୁ ପରୀକ୍ଷା ପାଇଁ ପଠାଯାଇଛି । ତେବେ ଗତ କିଛି ଦିନରୁ ରାଜ୍ୟରେ ହାତୀ ମୃତ୍ୟୁ ଘଟଣା ଏବଂ ହାତୀ କଙ୍କାଳ ଉଦ୍ଧାର ଘଟଣାରେ ବୃଦ୍ଧି ହୋଇଛି । ଯାହା ଏବେ ବନ ବିଭାଗ ଏବଂ ପ୍ରଶାସନ ପାଇଁ ଚିନ୍ତାର ବିଷୟ ପାଲଟି ଯାଇଛି ।