ଛତିଶଗଡ଼ରେ ସଫଳ ହେଲା ମାଓ ବିରୋଧୀ ଅପରେସନ; ସୁରକ୍ଷାକର୍ମୀଙ୍କ ଏନକାଉଣ୍ଟରରେ ୯ ମାଓବାଦୀ ନିହତ
ରାୟପୁର: ଛତିଶଗଡ଼ର ଦାନ୍ତେଓ୍ଵାଡ଼ା ଓ ବିଜାପୁର ଜିଲ୍ଲାରେ ଆଜି ସକାଳେ ସୁରକ୍ଷାବାହିନୀ ସହ ଏନକାଉଣ୍ଟରରେ ୯ ଜଣ ମାଓବାଦୀ ନିହତ ହୋଇଛନ୍ତି। ସିଆରପିଏଫର ଜଣେ ଅଧିକାରୀଙ୍କ ସୂଚନା ଅନୁଯାୟୀ, ସେପ୍ଟେମ୍ବର ୩ ତାରିଖ ମଙ୍ଗଳବାର ସକାଳେ ଜିଲ୍ଲା ରିଜର୍ଭ ଗାର୍ଡ ଏବଂ କେନ୍ଦ୍ରୀୟ ରିଜର୍ଭ ସୁରକ୍ଷା ବଳର ଏକ ମିଳିତ ଟିମ୍ ନକ୍ସଲ ବିରୋଧୀ ଅଭିଯାନରେ ବାହାରିଥିଲେ। ଦାନ୍ତେଓ୍ଵାଡ଼ା ଓ ବିଜାପୁର ସୀମାରେ ଥିବା ଲୋହାଗାଓଁ ପିଡ଼ିଆ ଜଙ୍ଗଲରେ ପୂର୍ବାହ୍ନ ପ୍ରାୟ ସାଢ଼େ ୧୦ଟା ବେଳେ ଏନକାଉଣ୍ଟର ଆରମ୍ଭ ହୋଇଥିଲା।
ଦାନ୍ତେଓ୍ଵାଡ଼ା ଜିଲ୍ଲା ଆରକ୍ଷୀ ଅଧୀକ୍ଷକ ଗୌରବ ରାୟ କହିଛନ୍ତି, ସେପ୍ଟେମ୍ବର ୨ ତାରିଖରେ ପଶ୍ଚିମ ବସ୍ତର ଡିଭିଜନ, ଦରଭା ଡିଭିଜନ ଓ ପିଏଲଜିଏ କମ୍ପାନି ନମ୍ବର ୨ ଥାନା ଅଧୀନରେ ଥିବା ପୁରଙ୍ଗଲର ଆନ୍ଦ୍ରିରେ ମାଓବାଦୀଙ୍କ ଉପସ୍ଥିତି ସମ୍ପର୍କରେ ସୂଚନା ମିଳିଥିଲା। ଏହି ସୂଚନା ପାଇବା ପରେ ବସ୍ତର ଫାଇଟର, ଡିଆରଜି ଓ ସିଆରପିଏଫ ର ଟିମ୍ ସହ ମିଳିତ ଅପରେସନ ଆରମ୍ଭ ହୋଇଥିଲା। ଦାନ୍ତେଓ୍ଵାଡ଼ା ପୁଲିସ ଏକ ବିବୃତ୍ତିରେ କହିଛି, ଆଜି ସକାଳେ, ଯେତେବେଳେ ସୁରକ୍ଷା ବାହିନୀ ଘେରାଉ କରିଥିଲେ, ସେତେବେଳେ ମାଓବାଦୀ ଗୁଳିଚାଳନା ଆରମ୍ଭ ହୋଇଥିଲେ।
ଯାହାର ପାଲଟା ଯବାବ ଦେଇଥିଲେ ସୁରକ୍ଷାକର୍ମୀ, ପ୍ରାଣ ହରାଇଲେ ୯ ଜଣ ମାଓବାଦୀ। ଘଟଣାସ୍ଥଳରୁ ଏସ୍ଏଲ୍ଆର୍, ୩୦୩ ରାଇଫଲ୍ ଓ ୩୧୫ ବୋର ରାଇଫଲ୍ ସମେତ ବିପୁଳ ପରିମାଣର ଅସ୍ତ୍ରଶସ୍ତ୍ର ଜବତ କରାଯାଇଛି। ୨୦୨୪ ଜାନୁଆରୀରୁ ଛତିଶଗଡ଼ରେ ସୁରକ୍ଷାବାହିନୀ ସହ ଏନକାଉଣ୍ଟରରେ ୧୪୦ରୁ ଅଧିକ ମାଓବାଦୀ ନିହତ ହୋଇଛନ୍ତି। ଏମାନଙ୍କ ମଧ୍ୟରୁ ବସ୍ତର ଡିଭିଜନରେ ୧୩୦ରୁ ଅଧିକ ମାଓବାଦୀ ନିହତ ହୋଇଛନ୍ତି।
