ବୈବାହିକ ଜୀବନରେ ଝଡ଼, ସ୍ତ୍ରୀ ସହ ଝଗଡ଼ା ହେବାରୁ ଝୁଲିପଡିଲେ ଯୁବକ

ନୂଆଦିଲ୍ଲୀ: ଜଣେ 40 ବର୍ଷୀୟ ମାର୍କେଟିଂ ମ୍ୟାନେଜରଙ୍କ ଝୁଲନ୍ତା ଅବସ୍ଥାରେ ମୃତଦେହ ଉଦ୍ଧାର କରାଯାଇଛି । ବେଙ୍ଗାଲୁରୁରୁ ସାମ୍ନାକୁ ଆସିଛି ଏଭଳି ଘଟଣା । ପ୍ରାଥମିକ ତଦନ୍ତରୁ ଜଣାପଡିଛି ଯେ ତାଙ୍କର ବୈବାହିକ ବିବାଦ ଥିଲା। ଏପର୍ଯ୍ୟନ୍ତ କୌଣସି ସୁଇସାଇଡ୍ ନୋଟ୍ ମିଳିନାହିଁ ।

ମୃତକଙ୍କ ନାମ ପ୍ରଶାନ୍ତ ନାୟାର ହୋଇଥିବା ବେଳେ ତାଙ୍କର ଆଠ ବର୍ଷର ଝିଅ ରହିଛି । ସେ ଏକ ଟେକ୍ କମ୍ପାନୀରେ ଏକ ବରିଷ୍ଠ ପଦବୀରେ କାର୍ଯ୍ୟରତ ଥିଲେ । ତାଙ୍କ ସ୍ତ୍ରୀ ପୂଜା ନାୟାର ଅନ୍ୟ ଏକ ବହୁରାଷ୍ଟ୍ରୀୟ ସଂସ୍ଥାରେ କାମ କରନ୍ତି ।

ଉତ୍ତର ବେଙ୍ଗାଲୁରୁର ଡେପୁଟି କମିଶନର ଅଫ୍ ପୋଲିସ (ଡିସିପି) ସାଇଦୁଲୁ ଆଦାଭଥ କହିଛନ୍ତି ଯେ, ତାଙ୍କ ସ୍ତ୍ରୀଙ୍କ ଦ୍ୱାରା ନିର୍ଯାତନାର କୌଣସି ଅଭିଯୋଗ ନାହିଁ ଏବଂ ସେମାନେ ଏକ ବର୍ଷ ପୂର୍ବରୁ ଅଲଗା ହୋଇଯାଇଥିଲେ ।

ପ୍ରଶାନ୍ତ ନାୟାରଙ୍କ ବାପା ପୋଲିସକୁ ଦେଇଥିବା ଅଭିଯୋଗରେ କହିଛନ୍ତି ଯେ ତାଙ୍କ ପୁଅ ଏବଂ ବୋହୂ ଅଲଗା ରହୁଥିଲେ । ଶୁକ୍ରବାର ଦିନ ତାଙ୍କ ବିଚ୍ଛିନ୍ନ ପତ୍ନୀଙ୍କ ସହ ତାଙ୍କର ଝଗଡା ହୋଇଥିଲା।

ଅଭିଯୋଗକାରୀ କହିଛନ୍ତି ଯେ, ତାଙ୍କ ପୁଅ ତାଙ୍କ ବୈବାହିକ ସମସ୍ୟା ଯୋଗୁଁ ଆତ୍ମହତ୍ୟା କରିଛି ବୋଲି ସେ ବିଶ୍ୱାସ କରନ୍ତି, କିନ୍ତୁ ସେ କାହାକୁ ସନ୍ଦେହ କରନ୍ତି ନାହିଁ । ସୋଲାଦେବନହଲ୍ଲୀ ପୋଲିସ ଷ୍ଟେସନରେ ଏକ ମାମଲା ରୁଜୁ ହୋଇଥିବା ବେଳେ ତଦନ୍ତ ଜାରି ରହିଛି ।