ଓଡ଼ିଶାରେ ବିଜେଡି ପୁଣି ଏକ ନମ୍ବର, ବିଜେପିକୁ ପଡ଼ିଲା ଶନିଦଶା, କଂଗ୍ରେସକୁ ବୃହସ୍ପତି
ଭୁବନେଶ୍ୱର(ଓଡ଼ିଶା ଭାସ୍କର): ରାଜ୍ୟର ପଞ୍ଚାୟତ ନିର୍ବାଚନର ପ୍ରଥମ ଦିନର ଭୋଟ ଗଣତି ଶେଷ ହୋଇଛି । ମୋଟ ୩୧୫ଟି ଜିଲ୍ଲା ପରିଷଦ ଆସନ ମଧ୍ୟରୁ ବିଜେଡି ୨୮୨ଟି, କଂଗ୍ରେସ ୧୬ଟି ଓ ବିଜେପି ୧୨ଟିରେ ଆଗୁଆ ରହିଛନ୍ତି । ତେବେ ବିଜେଡି ପୂର୍ବପରି ଏକ ନମ୍ବରରେ ରହିଥିବା ବେଳେ ତା’ର ଛାଇକୁ ଛୁଇଁପାରି ନାହାନ୍ତି ଅନ୍ୟ କୌଣସି ଦଳ । ଚଳିତ ବର୍ଷର ସବୁଠାରୁ ରୋମାଞ୍ଚକର କଥା ହେଉଛି ବିଜେପିର ଅଧପତନ । କ’ଣ ଏପରି ହେଲା ଯେ ଦଳର ପ୍ରଦର୍ଶନ ଏତେ ନିମ୍ନମାନର ହୋଇଗଲା । ଗତ ୨୦୧୭ରେ ମୋଟ ୮୪୬ଟି ଜିଲ୍ଲା ପରିଷଦ ଆସନ ମଧ୍ୟରୁ ବିଜେପି ୨୯୭ଟି ଆସନ ଅକ୍ତିଆର କରି ବିଜେଡିକୁ କଡ଼ା ଟକ୍କର ଦେଇଥିଲା । ଅନ୍ୟପକ୍ଷରେ ଦୁର୍ବଳ ମନେହେଉଥିବା କଂଗ୍ରେସ ବିଜେପିକୁ ଚଳିତ ଥର ପଛକୁ ଠେଲିବାରେ ସକ୍ଷମ ହୋଇଛି ।
ତେବେ ନିର୍ବାଚନ କମିଶନଙ୍କ ଘୋଷଣା ପରେ ପ୍ରକୃତ ତଥ୍ୟ ସାମ୍ନାକୁ ଆସିଯିବ । ଏହି ଅଙ୍କରେ କିଛି ଉପର ତଳ ହୋଇପାରେ, ମାତ୍ର ଏତେ ବଡ଼ ଧରଣର ଫରକ ଏହା ପକାଇ ନପାରେ । ଆଜି ୩୦୭ଟି ଓ ଆସନ୍ତା କାଲି ୨୨୮ଟି ଆସନର ନିମନ୍ତେ ଗଣତି ହେବା ନେଇ ପୂର୍ବରୁ ସ୍ଥିରୀକୃତ ହୋଇସାରିଛି । ଗତ ୨୦୧୨ ନିର୍ବାଚନରେ ବିଜେପି ମାତ୍ର ୩୬ଟି ଆସନ ଅକ୍ତିଆର କରିଥିବା ବେଳେ ପରବର୍ତ୍ତୀ ନିର୍ବାଚନରେ ସମସ୍ତଙ୍କୁ ଚକିତ କରିଦେଇଥିଲା । ୧୬ଟି ଜିଲ୍ଲାରେ ବିଜେପି ଖାତା ଖୋଲି ପାରିନଥିବା ବେଳେ ନିଜର ଗଡ଼ରେ ମଧ୍ୟ ଧରାଶାୟୀ ହେବାକୁ ବାଧ୍ୟ ହୋଇଛି । ତେବେ କ’ଣ ହୋଇପାରେ ଏହା ପଛର କାରଣ? ଦେଶରେ ୫ଟି ରାଜ୍ୟରେ ବିଧାନସଭା ନିର୍ବାଚନ ଜାରି ରହିଥିବା ବେଳେ ବିଜେପିର କେନ୍ଦ୍ରୀୟ ନେତୃବୃନ୍ଦ ଓଡ଼ିଶାର ପଞ୍ଚାୟତ ନିର୍ବାଚନକୁ ଅଣଦେଖା କରିନାହାନ୍ତି ତ?
