ଚିନ୍ତା ବଢାଇଲାଣି କରୋନା: ଚୀନ୍ ସମେତ ୬ ଦେଶରୁ ଆସୁଥିବା ଯାତ୍ରୀଙ୍କ ପାଇଁ RT-PCR ଟେଷ୍ଟ ବାଧ୍ୟତାମୂଳକ
ନୂଆଦିଲ୍ଲୀ: ପୁଣି ଥରେ ଭାରତ ପ୍ରତି ବଢୁଥିବା କରୋନା ବିପଦକୁ ଦୃଷ୍ଟିରେ ରଖି କେନ୍ଦ୍ର ସରକାର ବଡ଼ ନିଷ୍ପତି ନେଇଛନ୍ତି । ସ୍ୱାସ୍ଥ୍ୟମନ୍ତ୍ରୀ ମନସୁଖ ମାଣ୍ଡବ୍ୟ ଟ୍ୱିଟ୍ କରି କହିଛନ୍ତି ଯେ, ୧ ଜାନୁଆରୀ ୨୦୨୩ରୁ ଚୀନ୍, ହଙ୍ଗକଙ୍ଗ, ଜାପାନ, ଦକ୍ଷିଣ କୋରିଆ, ସିଙ୍ଗାପୁର ଏବଂ ଥାଇଲାଣ୍ଡରୁ ଆସୁଥିବା ଯାତ୍ରୀଙ୍କ ପାଇଁ ଆରଟି-ପିସିଆର ଟେଷ୍ଟ ବାଧ୍ୟତାମୂଳକକ କରାଯାଇଛି । ଯାତ୍ରୀମାନଙ୍କୁ ଯାତ୍ରା ପୁର୍ବରୁ ଏୟାର ସୁବିଧା ପୋର୍ଟାଲରେ ଏହି ରିପୋର୍ଟକୁ ଅପଲୋଡ କରିବାକୁ ପଡ଼ିବ ।
ଆଗାମୀ ୪୦ ଦିନ ଭାରତ ପାଇଁ ବେଶ ଗୁରୁତ୍ୱପୂର୍ଣ୍ଣ ବୋଲି ବିଶେଷଜ୍ଞମାନେ କହିବା ପରେ କେନ୍ଦ୍ର ସରକାର ଏହି ନିଷ୍ପତି ନେଇଛନ୍ତି । ଜାନୁଆରୀ ମାସରେ ଭାରତରେ କରୋନା ମାମଲା ବୃଦ୍ଧି ପାଇପାରେ ବୋଲି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଳାୟ ସୁତ୍ରରୁ ଖବର ମିଳିଥିଲା ।
1 जनवरी 2023 से चीन, हांगकांग, जापान, साउथ कोरिया, सिंगापुर और थाईलैंड से आने वाले यात्रियों के लिए RTPCR टेस्ट अनिवार्य कर दिया गया है। यात्रा से पहले उन्हें अपनी रिपोर्ट एयर सुविधा पोर्टल पर अपलोड करनी होगी।
— Dr Mansukh Mandaviya (@mansukhmandviya) December 29, 2022
ଜଣେ ଅଧିକାରୀ କହିଛନ୍ତି, ‘ଅତୀତରେ ଏହା ଦେଖାଯାଇଛି ଯେ ପୂର୍ବ ଏସିଆରେ କରୋନା ମହାମାରୀ ଏହାର ପ୍ରଭାବ ବିସ୍ତାର କରିବାର ୩୦-୩୫ ଦିନ ପରେ ମହାମାରୀର ଏକ ନୂଆ ଲହର ଭାରତକୁ ଆସିଥିଲା । ଏହା ଏକ ଧାରା ହୋଇସାରିଛି । ତେଣୁକରି ଭାରତ ସରକାର ଏବେଠୁ ସତର୍କତା ମୁଳକ ଭାବେ ଏଭଳି ନିଷ୍ପତି ନେଉଛନ୍ତି । ତେବେ ସ୍ୱାସ୍ଥ୍ୟ ମନ୍ତ୍ରଣାଳୟର ସୂତ୍ରରୁ ପ୍ରକାଶ ଯେ ସଂକ୍ରମଣର ଗମ୍ଭୀରତା କମ୍ । କୋଭିଡ ଏକ ନୂଆ ଲହର ଅସିଲେ ମଧ୍ୟ ସଂକ୍ରମିତ ଲୋକଙ୍କ ମୃତ୍ୟୁ ଏବଂ ଡାକ୍ତରଖାନାରେ ଭର୍ତ୍ତି ହେବା ହାର ବହୁତ କମ୍ ହେବ ।’
ଚୀନ୍ ଏବଂ ଦକ୍ଷିଣ କୋରିଆ ସମେତ କେତେକ ଦେଶରେ କୋଭିଡ -୧୯ ମାମଲା ଦ୍ରୁତ ଗତିରେ ବୃଦ୍ଧି ପାଉଥିବାରୁ ସରକାର ଲୋକଙ୍କୁ ସଜାଗ ରହିବାକୁ କହିଛନ୍ତି ଏବଂ କୌଣସି ଅପ୍ରତ୍ୟାଶିତ ପରିସ୍ଥିତିର ମୁକାବିଲା ପାଇଁ ପ୍ରସ୍ତୁତ ହେବାକୁ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳଗୁଡିକୁ କହିଛନ୍ତି ।
