fbpx

କୋଭିଡ୍-୧୯ ଭ୍ୟାକ୍ସିନ କାର୍ବେଭାକ୍ସର ଦାମ୍ କମିଲା, ଜାଣନ୍ତୁ ଏବେ କେତେ ଟଙ୍କା ଦେବାକୁ ପଡ଼ିବ

ନୂଆଦିଲ୍ଲୀ: ଗତ ଦୁଇବର୍ଷ ଧରି କରୋନା ଭାଇରାସ୍ ସମଗ୍ର ବିଶ୍ୱର ନିଦ ହଜାଇ ଦେଇଛି । ତେବେ ଏହା ମଧ୍ୟରେ କୋଭିଡ ସଂକ୍ରମଣ ହ୍ରାସ ପାଇଥିବା ବେଳେ ଭାରତର କିଛି ସ୍ଥାନରେ ଧୀରେଧୀରେ ସଂକ୍ରମଣ ବଢ଼ୁଥିବା ଦେଖାଯାଇଛି । ତେବେ ଏହି ପରିପ୍ରେକ୍ଷୀରେ କୋଭିଡ-୧୯ ଟିକାକୁ ନେଇ ଏକ ଖୁସି ଖବର ଆସିଛି । କୋଭିଡ୍ ଭ୍ୟାକ୍ସିନ କାର୍ବେଭାକ୍ସର ମୂଲ୍ୟ ହ୍ରାସ କରାଯାଇଛି ।

ଫର୍ମା କମ୍ପାନୀ ବାୟୋଲୋଜିକାଲ ଇ ଲିମିଟେଡ ପକ୍ଷରୁ କୁହାଯାଇଛି ଯେ, କୋଭିଡ୍-୧୯ ଭ୍ୟାକ୍ସିନ କାର୍ବେଭାକ୍ସର ମୂଲ୍ୟ ୮୪୦ ଟଙ୍କାରୁ ହ୍ରାସ କରାଯାଇ ୨୫୦ ଟଙ୍କା କରାଯାଇଛି । ଏହି ମୂଲ୍ୟ ସହିତ ଜିଏସଟି ସାମିଲ ରହିଛି । ଉପଭୋକ୍ତାଙ୍କୁ ଟ୍ୟାକ୍ସ ଓ ଟିକା ଲଗାଇବା ଶୁଳ୍କ ସହିତ ପ୍ରତ୍ୟେକ ଡୋଜ ପାଇଁ ୪୦୦ ଟଙ୍କା ଦେବାକୁ ପଡ଼ିବ । ଏହା ପୂର୍ବରୁ ଘରୋଇ ଟିକାକରଣ କେନ୍ଦ୍ରରେ ଏହାର ମୂଲ୍ୟ ୯୯୦ ଟଙ୍କା ରହିଥିଲା ।

ଚଳିତ ବର୍ଷ ମାର୍ଚ୍ଚ ମାସରେ ଦେଶରେ ୧୨ରୁ ୧୪ ବର୍ଷ ବୟସର ପିଲାଙ୍କ ପାଇଁ କାର୍ବେଭାକ୍ସ ଟିକାର ଟିକାକରଣ ଆରମ୍ଭ କରାଯାଇଥିଲା । ବାୟୋଲୋଜିକାଲ ଇ ଲିମିଟେଡ ଦ୍ୱାରା ୩୦ କୋଟି କାର୍ବେଭାକ୍ସ ଡୋଜ୍ ପ୍ରସ୍ତୁତ କରାଯାଇଛି । ପୂର୍ବରୁ କମ୍ପାନୀ କେନ୍ଦ୍ର ସରକାରଙ୍କୁ ପାଖାପାଖି ୧୦ କୋଟି ଡୋଜ୍ ସପ୍ଲାଇ କରିସାରିଛି । ୧୨ରୁ ୧୪ ବର୍ଷ ଆୟୁବର୍ଗର ପିଲାଙ୍କୁ କାର୍ବେଭାକ୍ସର ୩ କୋଟିରୁ ଅଧିକ ଡୋଜ୍ ଦିଆଯାଇ ସାରିଛି ।

କିଛିଦିନ ପୂର୍ବରୁ କମ୍ପାନୀ ପକ୍ଷରୁ ଭାରତୀୟ ଔଷଧ ନିୟାମକଙ୍କୁ କୋଭିଡ୍ ଟିକା ନେଇ ଏକ ଆବେଦନ କରାଯାଇଥିଲା । ଯେଉଁମାନେ କୋଭିଶିଲ୍ଡ ବା କୋଭାକ୍ସିନ ଦୁଇଟିଯାକ ଡୋଜ୍ ନେଇ ସାରିଛନ୍ତି, ସେମାନେ ବୁଷ୍ଟର ଡୋଜ୍ ଭାବେ କାର୍ବେଭାକ୍ସକୁ ଜରୁରୀକାଳୀନ ବ୍ୟବହାର ପାଇଁ ମଞ୍ଜୁରୀ ଦେବାକୁ ନିବଦେନ କରାଯାଇଥିଲା । ଭାରତୀୟ ଔଷଧି ମହାନିୟନ୍ତ୍ରକ ପକ୍ଷରୁ ପୂର୍ବରୁ ଦେଶରେ ବିକଶିତ ହୋଇଥିବା ଆରବିଡି ପ୍ରୋଟିନ ସବୟୁନିଟ ଭ୍ୟାକ୍ସିନ କାର୍ବେଭାକ୍ସକୁ ପାଞ୍ଚ ବର୍ଷରୁ ଅଧିକ ବୟସର ପିଲାଙ୍କ ପାଇଁ ଜରୁରୀକାଳୀନ ମଞ୍ଜୁରୀ ପ୍ରଦାନ କରିଥିଲା ।

Get real time updates directly on you device, subscribe now.