ଦେଢ଼ କୋଟି ପାଇଁ ସାଙ୍ଘାତିକ କାମ: ସମାଧିରୁ ମୃତଦେହ କାଢ଼ି ପୋଡ଼ିଲେ ସମ୍ପର୍କୀୟ
ନୂଆଦିଲ୍ଲୀ: ଗୁଜରାଟର ବନାସକଣ୍ଠା ଜିଲ୍ଲାରେ ଏମିତି ଏକ ଘଟଣା ସାମ୍ନାକୁ ଆସିଛି, ଯାହା ଏକ ଥ୍ରିଲର ଫିଲ୍ମର କାହାଣୀ ଭଳି ଲାଗୁଛି । ଦେଢ଼ କୋଟି ଟଙ୍କାର ବୀମା ଦାବି ପାଇଁ ଜଣେ ବ୍ୟକ୍ତି ଏଭଳି ଦୁର୍ନୀତି କରିଛନ୍ତି, ଯାହା ପୁଲିସକୁ ବି ଆଶ୍ଚର୍ଯ୍ୟ କରିଛି।
ହୋଟେଲ ଋଣ ଛାଡ଼ କରିବା ପାଇଁ ଅଭିଯୁକ୍ତମାନେ ମୃତଦେହକୁ କବରରୁ ବାହାର କରି କାର୍ ରେ ଜାଳି ଦେଇଥିଲେ। ୨୪ ଘଣ୍ଟା ମଧ୍ୟରେ ଏହି ଷଡ଼ଯନ୍ତ୍ରର ପର୍ଦ୍ଦାଫାସ କରିଛି ପୁଲିସ।
ଦୁଇ ଦିନ ତଳେ ବନାସକଣ୍ଠାର ୱାଡଗାମ ତହସିଲଅନ୍ତର୍ଗତ ଧନପୁରା ଗାଁରେ ଏକ ପୋଡ଼ି ଯାଇଥିବା କାର୍ ମିଳିଥିଲା। କାର୍ ରେ ଏକ ମୃତଦେହ ମଧ୍ୟ ଥିଲା, ଯାହା ଗୁରୁତର ଭାବେ ଜଳି ଯାଇଥିଲା।
କାର୍ ର ନମ୍ବର ପ୍ଲେଟ୍ (ଜିଜେ୦୧ ଏଚ୍ ଜେ ୯୭୧୮)ରୁ ଜଣାପଡିଛି ଯେ କାରଟି ଭଗବାନ ରାଜପୁତ ନାମକ ଜଣେ ବ୍ୟକ୍ତିଙ୍କର। ପ୍ରାଥମିକ ତଦନ୍ତରୁ ଜଣାପଡିଛି ଯେ ଭଗବାନ ରାଜପୁତଙ୍କ ମୃତ୍ୟୁ କାର୍ ରେ ପୋଡ଼ି ଯିବା କାରଣରୁ ହୋଇଛି।
ପୂର୍ବରୁ ପୁଲିସକୁ ସନ୍ଦେହ ହୋଇଥିଲା: ଆରମ୍ଭରୁ ଏହି ଘଟଣାରେ କିଛି ଦୁର୍ନୀତି ହୋଇଥିବା ପୁଲିସ ସନ୍ଦେହ କରିଥିଲା। ମୃତଦେହକୁ ଚିହ୍ନଟ ପାଇଁ ଫରେନସିକ୍ ଏବଂ ଡିଏନଏ ପରୀକ୍ଷା ପାଇଁ ପଠାଯାଇଥିଲା। ତଦନ୍ତରୁ ଜଣାପଡିଛି ଯେ କାର୍ ରେ ପୋଡ଼ି ଯାଇଥିବା ମୃତଦେହ ଭଗବାନ ରାଜପୁତଙ୍କ ନୁହେଁ।
କବରରୁ ଉଦ୍ଧାର ହେଲା ମୃତଦେହ: ଭଗବାନ ରାଜପୁତ ତାଙ୍କ ହୋଟେଲ ପାଇଁ କୋଟି କୋଟି ଟଙ୍କାର ଋଣ ନେଇଥିଲେ। ଋଣ ପରିଶୋଧ କରିବା ପରିବର୍ତ୍ତେ ବୀମା ଦାବି ଜରିଆରେ ଟଙ୍କା ପାଇବା ପାଇଁ ଷଡ଼ଯନ୍ତ୍ର କରିଥିଲେ।
ନିଜ ଗାଁ ଢେଲାଣାସ୍ଥିତ ଶ୍ମଶାନରେ ପୋତି ଦିଆଯାଇଥିବା ଏକ ମୃତଦେହକୁ ବାହାର କରି ଧନପୁରା ଗାଁ ଉପକଣ୍ଠରେ କାର୍ରେ ରଖି ନିଆଁ ଲଗାଇ ଦେଇଥିଲେ।