ବ୍ରାଣ୍ଡେଡ୍ କମ୍ପାନି ନାଁରେ ନକଲି ଇଞ୍ଜିନ ଅଏଲ୍: ଏସବୁ ସହରରେ ହେଉଥିଲା ବିକ୍ରି
ରାଉରକେଲା: ରାଉରକେଲା ସହରର ବିସ୍ରା ଅଞ୍ଚଳରେ ଚାଲିଥିବା ଏକ ନକଲି ଇଞ୍ଜିନ ଅଏଲ୍ ଉତ୍ପାଦନ ୟୁନିଟ୍ର ପର୍ଦ୍ଦାଫାଶ କରିଛି ପୋଲିସ। ଏହି ବେଆଇନ୍ ସଂସ୍ଥା ଏକ ଭଡ଼ା ଘର ଭିତରେ ଚାଲୁଥିଲା, ଯେଉଁଠାରେ ପ୍ରତିଷ୍ଠିତ ବ୍ରାଣ୍ଡ୍ ନାମରେ ନକଲି ଇଞ୍ଜିନ ଅଏଲ୍ ଉତ୍ପାଦନ ଏବଂ ପ୍ୟାକେଜିଂ କରାଯାଉଥିଲା।
ଚଢାଉ ସମୟରେ ପୋଲିସ ପ୍ରାୟ ୪,୦୦୦ ଲିଟର ନକଲି ଇଞ୍ଜିନ ଅଏଲ୍ ସହିତ ବହୁ ସଂଖ୍ୟକ ଖାଲି ବୋତଲ, ଲେବଲ୍ ଏବଂ ଜଣାଶୁଣା କମ୍ପାନୀର ପ୍ୟାକେଜିଂ ସାମଗ୍ରୀ ଜବତ କରିଛି। ଅଭିଯୁକ୍ତମାନେ ବଜାରରେ ନକଲି ଉତ୍ପାଦ ବିକ୍ରୟ କରିବା ପାଇଁ ବ୍ରାଣ୍ଡ ଲୋଗୋ ଏବଂ ପ୍ୟାକେଜିଂ ଡିଜାଇନ୍ କପି କରିଥିବା ଅଭିଯୋଗ ହୋଇଛି। ଏଠାରୁ ରାଜ୍ୟର ବିଭିନ୍ନ ସହରକୁ ଚାଲାଣ ହେଉଥିବା ମଧ୍ୟ କୁହାଯାଉଛି।
ଏହି ମାମଲାରେ ଜଣେ ବ୍ୟକ୍ତିଙ୍କୁ ଅଟକ ରଖାଯାଇଛି ଏବଂ ଅଧିକ ତଦନ୍ତ ଚାଲିଛି। ଯୋଗାଣ ଶୃଙ୍ଖଳାକୁ ଠାବ କରିବା ଏବଂ ବେଆଇନ କାର୍ଯ୍ୟରେ ସମ୍ପୃକ୍ତ ଅନ୍ୟମାନଙ୍କୁ ଚିହ୍ନଟ କରିବା ପାଇଁ ପୋଲିସ ସନ୍ଦିଗ୍ଧ ବ୍ୟକ୍ତିଙ୍କୁ ପଚରାଉଚରା କରୁଛି।