ବିଦ୍ୟୁତ ବିଲରେ ଆଶ୍ୱସ୍ତି; ଏଥର ଶସ୍ତା ହୋଇଯିବ ବିଦ୍ୟୁତ, ଭାରତ ସରକାର ନେଲେ ବଡ଼ ନିଷ୍ପତ୍ତି

ନୂଆଦିଲ୍ଲୀ: ବିଦ୍ୟୁତ୍ ବିଲରେ ଆଶ୍ବସ୍ତି । ଭାରତ ସରକାର ନେଲେ ବଡ଼ ନିଷ୍ପତ୍ତି । କମିଯିବ ବିଦ୍ୟୁତ୍ ବିଲ । ପ୍ରତି ମାସରେ ବଢୁଥିବା ବିଦ୍ୟୁତ୍ ବିଲକୁ ନେଇ ଅସୁବିଧାର ସମ୍ମୁଖୀନ ହେଉଥିବା ବ୍ୟକ୍ତିଙ୍କ ପାଇଁ ଏହା ଏକ ଆଶ୍ବସ୍ତିକର ଖବର ।

ଭାରତ ସରକାର କୋଇଲା ଆଧାରିତ ବିଦ୍ୟୁତ୍ କେନ୍ଦ୍ର ପାଇଁ ଫ୍ଲୁ ଗ୍ୟାସ୍ ଡି-ସଲଫରାଇଜେସନ୍ (FGD) ନିୟମରେ ଗୁରୁତ୍ୱପୂର୍ଣ୍ଣ ପରିବର୍ତ୍ତନ କରିଛନ୍ତି । ଯଦ୍ବାରା ଆଗାମୀ ସମୟରେ ବିଦ୍ୟୁତ୍ ମୂଲ୍ୟ (Electricity Cost Cut) ପ୍ରତି ୟୁନିଟ୍ ୨୫ ରୁ ୩୦ ପଇସା ହ୍ରାସ ହୋଇପାରିବ ।

ସରକାରଙ୍କ ନୂତନ ନିଷ୍ପତ୍ତି କ’ଣ?

ସରକାର ଏକ ବିଜ୍ଞପ୍ତି ଜାରି କରିଛନ୍ତି, ଯେଉଁଥିରେ 2015 ମସିହାର ନିୟମକୁ ପରିବର୍ତ୍ତନ କରାଯାଇଛି । 2015 ମସିହାରେ ସରକାର ସମସ୍ତ କୋଇଲା ଆଧାରିତ ବିଦ୍ୟୁତ ପ୍ଲାଣ୍ଟରେ FGD ସିଷ୍ଟମ୍ ସ୍ଥାପନ କରିବାକୁ ବାଧ୍ୟତାମୂଳକ କରିଥିଲେ । ଏହି ସିଷ୍ଟମ୍ କୋଇଲାରୁ ନିର୍ଗତ ସଲଫର ଡାଇଅକ୍ସାଇଡ୍ (SO2) ଗ୍ୟାସକୁ ହ୍ରାସ କରିଥାଏ, ଯାହାକୁ ବାୟୁ ପ୍ରଦୂଷଣର ଏକ ପ୍ରମୁଖ କାରଣ ଭାବରେ ବିବେଚନା କରାଯାଏ।

ଏବେ ଏହି ନିୟମ କେବଳ ସେହି ପ୍ଲାଣ୍ଟଗୁଡ଼ିକ ପାଇଁ ପ୍ରଯୁଜ୍ୟ ହେବ ଯାହା 10 କିଲୋମିଟର ବ୍ୟାସାର୍ଦ୍ଧ ମଧ୍ୟରେ ଅଛି ଏବଂ ଯେଉଁଠାରେ 10 ଲକ୍ଷରୁ ଅଧିକ ଜନସଂଖ୍ୟା ଥିବେ। ଅର୍ଥାତ୍ ଦେଶର ପ୍ରାୟ 79 ପ୍ରତିଶତ ତାପଜ ବିଦ୍ୟୁତ୍ ପ୍ଲାଣ୍ଟଗୁଡ଼ିକୁ ଆଉ ଏହି ସିଷ୍ଟମ୍ ସ୍ଥାପନ କରିବାକୁ ବାଧ୍ୟ କରାଯିବ ନାହିଁ।

ନୂତନ ନିୟମ ସହିତ ବିଦ୍ୟୁତ୍ କିପରି ଶସ୍ତା ହେବ ?

ସରକାରୀ ଅଧିକାରୀଙ୍କ ଅନୁଯାୟୀ, FGD ସିଷ୍ଟମ୍ ସ୍ଥାପନ ଏବଂ ଚଲାଇବାରେ ବିପୁଳ ପରିମାଣରେ ଖର୍ଚ୍ଚ ହେଉଛି । ଯାହା ପୂର୍ବରୁ ବିଦ୍ୟୁତ୍ ଉତ୍ପାଦନ ଖର୍ଚ୍ଚ ବୃଦ୍ଧି କରୁଥିଲା। ବର୍ତ୍ତମାନ ଅଧିକାଂଶ ପ୍ଲାଣ୍ଟକୁ ଏଥିରୁ ମୁକ୍ତ କରାଯାଇଛି । ଯଦ୍ବାରା ଏହା ବିଦ୍ୟୁତ୍ ଉତ୍ପାଦନ ଶସ୍ତା କରିବ ଏବଂ ସାଧାରଣ ଲୋକମାନେ ଏଥିରୁ ଲାଭ ପାଇବେ। ତେବେ ଆକଳନ କରାଯାଇଛି ଯେ, ଏହା ବିଦ୍ୟୁତ୍ ମୂଲ୍ୟ ପ୍ରତି ୟୁନିଟ୍ 25-30 ପଇସା ହ୍ରାସ କରିପାରିବ।

କେଉଁ ସ୍ଥାନରେ FGD ନିୟମ ଏପର୍ଯ୍ୟନ୍ତ ପ୍ରଯୁଜ୍ୟ ହେବ ?

ସରକାର ଏହା ମଧ୍ୟ ସ୍ପଷ୍ଟ କରିଛନ୍ତି ଯେ, ଯେଉଁ ପାୱାର ପ୍ଲାଣ୍ଟ ଅତ୍ୟନ୍ତ ପ୍ରଦୂଷିତ ଅଞ୍ଚଳ କିମ୍ବା ଗମ୍ଭୀର ବାୟୁ ଗୁଣବତ୍ତା ଥିବା ସହରରେ ଅଛି, ତାଙ୍କ ଉପରେ ଏହି ନିୟମ ଏବେ ବି ଲାଗୁ ହେବ ।

କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (CPCB) ଏକ ରିପୋର୍ଟରେ କହିଛି ଯେ ବର୍ତ୍ତମାନ ଦେଶର ଅଧିକାଂଶ ଅଞ୍ଚଳରେ ସଲଫର ଡାଇଅକ୍ସାଇଡର ସ୍ତର ଜାତୀୟ ମାନଦଣ୍ଡ ମଧ୍ୟରେ ଅଛି। ଏହା ବ୍ୟତୀତ, IIT ଦିଲ୍ଲୀ, CSIR-NEERI ଏବଂ NIAS ଭଳି ପ୍ରତିଷ୍ଠାନ ଦ୍ୱାରା କରାଯାଇଥିବା ଅଧ୍ୟୟନରୁ ଏହା ମଧ୍ୟ ଜଣାପଡିଛି ଯେ FGD ସିଷ୍ଟମ ଯୋଗୁଁ କାର୍ବନ ଡାଇଅକ୍ସାଇଡ ନିର୍ଗମନ ବୃଦ୍ଧି ପାଇପାରେ।