ବ୍ୟାଙ୍କ କର୍ମଚାରଙ୍କୁ ସୀତାରମଣଙ୍କ ଉପହାର; ୩୦ ପ୍ରତିଶତ ବଢିଲା ପେନସନ ରାଶି
ନୂଆଦିଲ୍ଲୀ: ଅବସର ଗ୍ରହଣ କରିଥିବା ଲକ୍ଷାଧିକ ବ୍ୟାଙ୍କ କର୍ମଚାରୀଙ୍କ ପାଇଁ ଖୁସି ଖବର । କେନ୍ଦ୍ର ସରକାର ବ୍ୟାଙ୍କ କର୍ମଚାରୀଙ୍କ ଫ୍ୟାମିଲି ପେନସନରେ ବୃଦ୍ଧି କରିଛନ୍ତି । ପେନସନ ଭୋଗୀମାନେ ଶେଷ ବେତନର ୩୦% ରାଶିକୁ ପେନସନ୍ ଆକାରରେ ପାଇବେ । ପୂର୍ବରୁ କର୍ମଚାରୀଙ୍କ ପେନସନ ୯୨୮୪ ଟଙ୍କାରେ ସୀମିତ ଥିଲା । ଆଗାମୀ ଦିନରେ ସେଥିରେ ୩୦-୩୫ ହଜାର ଟଙ୍କା ପର୍ୟ୍ୟନ୍ତ ବୃଦ୍ଧି ହେବ ବୋଲି ଆଶା କରାଯାଉଛି । ବିଭିନ୍ନ ବର୍ଗର ବ୍ୟାଙ୍କ କର୍ମଚାରୀଙ୍କ ଫ୍ୟାମିଲି ପେନସନକୁ ଯଥାକ୍ରମେ ୧୫%, ୨୦% ଓ ୩୦% ହାରରେ ବୃଦ୍ଧି କରିବା ଲାଗି ଭାରତୀୟ ବ୍ୟାଙ୍କ ସଂଘ (ଆଇବିଏ) ପକ୍ଷରୁ ସୁପାରିସ କରାଯାଇଥିଲା । ଅର୍ଥ ମନ୍ତ୍ରଣାଳୟ ସେହି ସୁପାରିସକୁ ଗ୍ରହଣ କରିଛି । ଏଥି ସହିତ ବ୍ୟାଙ୍କ ପକ୍ଷରୁ କର୍ମଚାରୀଙ୍କ ଏନପିଏସ ପାଇଁ ଯେଉଁ ଅବଦାନ ଦିଆଯାଉଛି ତାହାର ହାର ବେତନର ୧୦ରୁ ବଢ଼ାଇ ୧୪% କରିବାକୁ ବ୍ୟାଙ୍କଗୁଡ଼ିକୁ କୁହାଯାଇଛି ।
ଅର୍ଥମନ୍ତ୍ରୀ ନିର୍ମଳା ସୀତାରମଣ ସରକାରୀ ବ୍ୟାଙ୍କର ପରିଚାଳନା ନିର୍ଦ୍ଦେଶକ ଓ କାର୍ୟ୍ୟନିର୍ବାହୀ ଅଧିକାରୀମାନଙ୍କ ସହ ବ୍ୟାଙ୍କଗୁଡ଼ିକର କାର୍ୟ୍ୟ ଅଗ୍ରଗତିର ସମୀକ୍ଷା କରିଥିଲେ । ମହାମାରୀ ସତ୍ତ୍ୱେ ସାମଗ୍ରିକ ଭାବେ ଉନ୍ନତ ପ୍ରଦର୍ଶନ କରି ବ୍ୟାଙ୍କଗୁଡ଼ିକ କଠୋର ପ୍ରମ୍ପଟ୍ କରେକ୍ଟିଭ ଆକ୍ସନ (ପିସିଏ)ରୁ ମୁକୁଳି ପାରିଛନ୍ତି ବୋଲି ମନ୍ତ୍ରଣାଳୟ ପକ୍ଷରୁ କୁହାଯାଇଛି । ଅଧିକ ଲୋକଙ୍କ ପାଖରେ ଋଣ ପହଞ୍ଚାଇବା ଲାଗି ଦେଶର ପ୍ରତି ଜିଲ୍ଲାରେ ଋଣ ପ୍ରଦର୍ଶନୀ ଆୟୋଜନ କରିବାକୁ ବ୍ୟାଙ୍କଗୁଡ଼ିକୁ କୁହାଯାଇଛି । ବ୍ୟାଙ୍କ ବାହାରୁ ଲୋକମାନେ ଋଣ ନେଉଛନ୍ତି । ଋଣ ଲକ୍ଷ୍ୟ ଧାର୍ୟ୍ୟ କରିବା ବେଳେ ତାହା ବିଚାରକୁ ନେବାକୁ ବ୍ୟାଙ୍କଗୁଡ଼ିକୁ କୁହାଯାଇଛି । ଚଳିତ ମାସରେ ବ୍ୟାଙ୍କ କର୍ମଚାରୀ ଓ ପେନସନଭୋଗୀମାନଙ୍କ ମହଙ୍ଗା ଭତ୍ତା ଓ ମହଙ୍ଗା ସହାୟତାରେ ବୃଦ୍ଧି କରାଯାଇଥିଲା ।
