ଯଦି ମହାରାଷ୍ଟ୍ର ନିର୍ବାଚନ ଫଳାଫଳରେ ସ୍ପଷ୍ଟ ସଂଖ୍ୟାଗରିଷ୍ଠତା ମିଳିବନି, ତେବେ ତୃତୀୟ ମେଣ୍ଟ କୁଆଡ଼େ ଯିବ?
ମୁମ୍ୱାଇ : ମହାରାଷ୍ଟ୍ର ବିଧାନସଭା ନିର୍ବାଚନ ଫଳାଫଳ ଆଜି ପ୍ରକାଶ ପାଇବ । ରାଜ୍ୟରେ ୩ଟି ମେଣ୍ଟ ୨୮୮ ଆସନ ପାଇଁ ମୈଦାନକୁ ଓହ୍ଲାଇଥିବା ବେଳେ ଅନେକ ସ୍ୱାଧୀନ ଓ ବିଦ୍ରୋହୀ ମଧ୍ୟ ଭାଗ୍ୟ ପରୀକ୍ଷା କରୁଛନ୍ତି। ରାଜ୍ୟରେ ମୁଖ୍ୟ ପ୍ରତିଦ୍ୱନ୍ଦ୍ୱିତା ହେଉଛି ଶାସକ ମହାଯୁତି ଓ ମହାବିକାଶ ଆଘାଡି ମଧ୍ୟରେ । ତେବେ ତୃତୀୟ ମେଣ୍ଟ ବଞ୍ଚିତ ବହୁଜନ ଆଘାଡି ମଧ୍ୟ କଡ଼ା ଟକ୍କର ଦାବି କରୁଛି।
କାହାର ସରକାର ଗଢିବ ତାହା ଫଳାଫଳ ଆସିବା ପରେ ସ୍ପଷ୍ଟ ହେବ, ଯଦିଓ ତ୍ରିକୋଣୀୟ ନିର୍ବାଚନ ଫଳାଫଳକୁ ନେଇ କଳ୍ପନାଜଳ୍ପନା ମଧ୍ୟ ଚାଲିଛି । ଏଭଳି ସ୍ଥିତିରେ ବଞ୍ଚିତ ବହୁଜନ ଆଘାଡି (ଭିବିଏ) ସଂଖ୍ୟାବଳ ଥିବା ଦଳ ବା ମେଣ୍ଟକୁ ସମର୍ଥନ କରିବ ବୋଲି ଘୋଷଣା କରିଛି।
ତୃତୀୟ ମେଣ୍ଟର ମୁଖ୍ୟ ପ୍ରକାଶ ଆମ୍ବେଦକର ସୋସିଆଲ ମିଡିଆ ୱେବସାଇଟ ଏକ୍ସରେ ପୋଷ୍ଟ କରିଛନ୍ତି ଯେ ଯଦି ଭିବିଏକୁ ଆସନ ମିଳେ ତେବେ ଏହା କେବଳ ସେହି ଦଳ କିମ୍ବା ମେଣ୍ଟକୁ ସମର୍ଥନ କରିବ ଯାହା ସରକାର ଗଠନ କରିବ । ସେ ଲେଖିଛନ୍ତି, ଆମେ କ୍ଷମତାରେ ରହିବାକୁ ପସନ୍ଦ କରିବୁ। ମହାରାଷ୍ଟ୍ରରେ ସରକାର ଗଢ଼ିବାକୁ ହେଲେ ୧୪୫ ଆସନରେ ପହଞ୍ଚିବା ଅତ୍ୟନ୍ତ ଜରୁରୀ।
