ହମାସ-ହିଜବୁଲ୍ଲା ନେତାଙ୍କ କଥା କହି ପାକିସ୍ତାନ ସରକାରଙ୍କୁ ସମାଲୋଚନା କଲେ ଇମ୍ରାନ୍ ଖାନ୍
ନୂଆଦିଲ୍ଲୀ: ଜେଲରେ ଥିବା ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ହିଜବୁଲ୍ଲା ନେତା ହାସନ ନସରଲ୍ଲା ଏବଂ ହାମାସ ନେତା ଇସ୍ମାଇଲ ହାନିଆଙ୍କ ମୃତ୍ୟୁରେ ଦୁଃଖ ପ୍ରକାଶ କରି ପାକିସ୍ତାନ ସରକାରଙ୍କୁ ଟାର୍ଗେଟ କରିଛନ୍ତି। ଇମ୍ରାନ୍ କହିଛନ୍ତି ଯେ ଏହି ଦୁଇ ନେତା ନିଜ ନିଜ ଦେଶର ସୁରକ୍ଷା ପାଇଁ ନିଜକୁ ବଳିଦାନ ଦେଇଛନ୍ତି। ବାହାଦୁର ଶାହ ଜାଫରଙ୍କ ଭଳି ମରିବା ଅପେକ୍ଷା ଟିପୁ ସୁଲତାନଙ୍କ ଭଳି ଦେଶ ପାଇଁ ଲଢ଼େଇ କରି ମରିବାକୁ ପସନ୍ଦ କରିବି।
ଟିପୁ ସୁଲତାନଙ୍କ ଭଳି ମୃତ୍ୟୁ ପାଇଁ ଖୁଦାଙ୍କ ନିକଟରେ ଦୁଆ କରୁଛି। ସେ ଲେଖିଛନ୍ତି, ବର୍ତ୍ତମାନ ପାକିସ୍ତାନରେ ପିଡିଏମଙ୍କ ସମେତ ତିନି ଗ୍ୟାଙ୍ଗ ପ୍ରତ୍ୟେକ ସରକାରୀ ଅନୁଷ୍ଠାନକୁ ଗୁଲାମ କରିବା ପାଇଁ ଷଡ଼ଯନ୍ତ୍ର କରୁଛି। କେବଳ ସୁପ୍ରିମ୍ କୋର୍ଟ ବାକି ରହିଛି, ଯାହାକୁ ସେମାନେ ଅସାମ୍ବିଧାନିକ ସଂଶୋଧନ ମାଧ୍ୟମରେ ଦମନ କରିବାକୁ ଚେଷ୍ଟା କରୁଛନ୍ତି। ଇମ୍ରାନ୍ ଖାନ୍ ତାଙ୍କ ପୋଷ୍ଟରେ କହିଛନ୍ତି ଯେ ପାକିସ୍ତାନରେ ଆଉ ଆଇନର ଶାସନ ନାହିଁ, କୌଣସି ଉତ୍ତରଦାୟିତ୍ୱ ନାହିଁ।
ସେ ପୋଷ୍ଟରେ ଲେଖିଛନ୍ତି ଯେ ଯିଏ ବି କ୍ଷମତାରେ ଅଛି, ତାଙ୍କ ସମ୍ପତ୍ତି ବିଦେଶରେ ଅଛି, ତେଣୁ ସେମାନେ ନିଜର ବ୍ୟକ୍ତିଗତ ଲାଭ ଓ କ୍ଷମତା ପାଇଁ ସରକାରୀ ଅନୁଷ୍ଠାନଗୁଡ଼ିକୁ ନଷ୍ଟ କରୁଛନ୍ତି। ଇମ୍ରାନ ପାକିସ୍ତାନବାସୀଙ୍କୁ କହିଛନ୍ତି ଯେ ସେ ସେମାନଙ୍କୁ ମୁକ୍ତ କରିବାକୁ ଚେଷ୍ଟା କରୁଛନ୍ତି। ଇମ୍ରାନ୍ ଖାନ୍ ଲେଖିଛନ୍ତି, ‘ମୁଁ କେବଳ ତୁମ ସ୍ୱାଧୀନତା ପାଇଁ ଏହି ବଳିଦାନ ଦେଇଛି। ବର୍ତ୍ତମାନ ସମୟ ଆସିଛି ଯେ ଆପଣ ନିଜ ବ୍ୟକ୍ତିଗତ ସ୍ୱାର୍ଥଠାରୁ ଊର୍ଦ୍ଧ୍ୱରେ ଚିନ୍ତା କରନ୍ତୁ ଏବଂ ଦେଶର ଭବିଷ୍ୟତ ପାଇଁ ପ୍ରତିବାଦ କରିବା ପାଇଁ ସମସ୍ତ ଆହ୍ୱାନ ନେଇ ଆଗେଇ ଆସନ୍ତୁ।
